នៅថ្ងៃទី៩ ខែកុម្ភៈ ឆ្នាំ២០២៦ ឯកឧត្តម ហ៊ុន ប៊ុនថាន អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានដឹកនាំក្រុមការងារតំណាងក្រសួងរៀបចំដែនដី ក្រសួងវប្បធម៌ អាជ្ញាធរអប្សរា រដ្ឋបាលខេត្តសៀមរាប និងអាជ្ញាធរពាក់ព័ន្ធប្រជុំពិនិត្យពិភាក្សា និងចុះពិនិត្យទីតាំងតាមបណ្តាភូមិ សម្រាប់ការរៀបចំផែនការប្រើប្រាស់ដីភូមិក្នុងភូមិសាស្ត្រស្រុកប្រាសាទបាគង ខេត្តសៀមរាប។
ឯកឧត្តម ហ៊ុន ប៊ុនថាន លើកឡើងថាកិច្ចប្រជុំពិនិត្យពិភាក្សាថ្ងៃនេះ ក្នុងគោលដៅរៀបចំតាក់តែងសេចក្តីព្រាងផែនការប្រើប្រាស់ដីភូមិទាំង១១៤ ក្នុងតំបន់រមណីយដ្ឋានអង្គរ ឱ្យបានគ្រប់ជ្រុងជ្រោយ ក្នុងការឈានទៅរៀបចំគោលការណ៍ និងផែនការគ្រប់គ្រងតំបន់រមណីយដ្ឋានបេតិកភណ្ឌពិភពលោកអង្គរ ដើម្បីពង្រឹងការធ្វើការអភិរក្សប្រាសាទ ការអភិរក្ស និងលើកតម្លៃបេតិកភណ្ឌ វប្បធម៌ សិល្បៈ ទំនៀមទម្លាប់ប្រពៃណី ការលើកកម្ពស់ជីវភាពរស់នៅរបស់ប្រជាពលរដ្ឋអ្នកស្រុកអង្គរដែលជាបេតិកភណ្ឌរស់។
ឯកឧត្តមបញ្ជាក់ថា ក្នុងតំបន់១ និងតំបន់២ នៃរមណីយដ្ឋានបេតិកភណ្ឌពិភពលោកអង្គរ ដូចមានចែងក្នុងព្រះរាជក្រឹត្យលេខ ០០១/នស ចុះថ្ងៃទី២៨ ខែឧសភា ឆ្នាំ១៩៩៤ ស្តីពីការកំណត់ និងការចាត់ចែង គ្រប់គ្រងតំបន់សៀមរាបអង្គរ ផ្ទៃដីទំហំ ៤០១គីឡូម៉ែត្រក្រឡា នៃភូមិទាំង១១៤ និងត្រូវបានធ្វើចំណាត់ថ្នាក់ជា ៦ទីតាំង ដើម្បីរៀបចំលក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ ស្របតាមស្ថានភាពភូមិសាស្ត្រ ការតាំងទីលំនៅ និងការប្រកបមុខរបរចិញ្ចឹមជីវិតជាក់ស្តែងរបស់ប្រជាពលរដ្ឋ និងអាទិភាពនៃការអភិរក្ស បុរាណដ្ឋាន។ ក្នុងនោះរួមមាន ១.ទីតាំងត្រូវការពារដាច់ខាត ២.ទីតាំងទ្រនាប់ ៣.ទីតាំងភូមិឋានជនបទ ៤.ទីតាំងភូមិឋានទីប្រជុំជន ៥.ទីតាំងអាជីវកម្ម និង៦.ទីតាំងកសិកម្ម៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
