ព្រះមេគណខេត្តសៀមរាប ផ្តល់ឱវាទ ជម្រុញឲ្យមន្ត្រីសង្ឃ និង ព្រះគ្រូចៅអធិការវត្តនានា យកព្រះទ័យទុកដាក់ ដល់ការពង្រឹងធម្មវិន័យសង្ឃ និង ជម្រុញកិច្ចដំណើរការ លើវិស័យអប់រំផ្នែកពុទ្ធិចក្រ ឲ្យមានដំណើរការដោយរលូន បើទោះជាវិស័យអប់រំផ្នែកពុទ្ធិចក្រ មានគម្លាតឆ្ងាយពីការរីកចម្រើនរបស់ វិស័យអប់រំផ្នែកអាណាចក្រយ៉ាងណាក៏ដោយ។
នៅក្នុងឱវាទសម្តែង របស់ព្រះតេជគុណ ព្រះធម្មសិរី ជុំ គឹមលេង អាភាករោ ព្រះរាជាគណថ្នាក់កិត្តិយស ជាព្រះសុមង្គលសីលាចារ្យ ព្រះមេគណខេត្តសៀមរាប មានថេរដីការថា ៖ វិស័យពុទ្ធិចក្រ និង វិស័យអាណាចក្រ គប្បីធ្វើដំណើរឲ្យបានទន្ទឹមគ្នាជារៀងរហូត ។ ព្រះអង្គជម្រុញឲ្យព្រះករុណាជាមន្ត្រីសង្ឃគ្រប់អង្គ យកព្រះទ័យទុកដាក់កសាងគ្រប់គ្រងទីអារាមឲ្យបានល្អប្រពៃ ព្រមទាំងពង្រឹងធម្មវិន័យ ដើម្បីបានឆ្លើយតបទៅនឹងការគោរពបូជា និង ជំនឿ របស់ពុទ្ធបរិស័ទ ។ ប្រមុខនៃរាជរដ្ឋាភិបាលកម្ពុជា ( សម្តេចអគ្គមហាសេនាបតីតេជោ ហ៊ុន សែន ) ក៏បានបង្ហាញនូវទស្សនវិស័យ លើកកម្ពស់វិស័យព្រះពុទ្ធសាសនា ថាបានដើរតួនាទីយ៉ាងសំខាន់មិនអាចខ្វះបាន ក្នុងការកសាងសីលធម៌សង្គម ប្រកបតាមគន្លងនៃសាមគ្គីធម៌ រក្សាបានវប្បធម៌សន្តិភាព ឆ្ពោះទៅរកការអភិវឌ្ឍប្រទេសជាតិ ។
ព្រះតេជគុណព្រះមេគណខេត្តសៀមរាប លើកឡើងនូវថេរដីកាយ៉ាងដូច្នេះ ខណៈពេលដែលព្រះអង្គ និមន្តជាព្រះធិបតីភាព នៅក្នុងពិធីបើកបវេសនកាល សាលាពុទ្ធិកបឋមសិក្សាវត្តត្រាំនាគ ក្រុងសៀមរាប ឆ្នាំសិក្សា២០១៩-២០២០ នារសៀលថ្ងៃសៅរ៍ ទី២២ ខែមិថុនា ឆ្នាំ២០១៩ ដោយភ្ជាប់ជាមួយនឹងពិធីបុណ្យចំរើនព្រះជន្ម ព្រះគ្រូ សាសនវរោ ស រ៉ា ព្រះគ្រូចៅអធិការវត្តត្រាំនាគ ។
ជាមួយឱកាសនោះដែរ ព្រះអង្គក៏បានបង្ហាញអំពីព្រះទ័យយកចិត្តទុកដាក់ ចំពោះវិស័យអប់រំផ្នែកពុទ្ធិចក្រ ដោយធៀបជាមួយ វិស័យអប់រំផ្នែកអាណាចក្រ ដែលកំពុងមានល្បឿននៃរីកចម្រើន ឆ្លើយតបទៅនឹងការអភិវឌ្ឍប្រទេសជាតិ ។ ព្រះអង្គបញ្ជាក់ថា បើទោះជាការរីកចម្រើននៃវិស័យអប់រំផ្នែកពុទ្ធិចក្រ មានគម្លាតឆ្ងាយពីវិស័យអប់រំផ្នែកអាណាចក្រយ៉ាងណាក៏ដោយ តែសូមឲ្យមន្ត្រីសង្ឃខិតខំយកព្រះទ័យទុកដាក់ ខិតខំជម្រុញឲ្យមានដំណើរទៅមុខដោយរលូន ទោះក្នុងល្បឿនណាក៏ដោយ ដើម្បីបណ្តុះបណ្តាលធនធានព្រះសង្ឃ ឲ្យបានល្អប្រសើរ ។
តាមរបាយការណ៍ របស់ព្រះគ្រូ សាសនវរោ ស រ៉ា ព្រះគ្រូចៅអធិការវត្តត្រាំនាគ បានឲ្យដឹងថា សារុបសមណៈសិស្សសាលាពុទ្ធិកបឋមសិក្សាត្រាំនាគ ដែលបានបើកដំណើការចាប់ពីឆ្នាំឆ្នាំ២០០៥ ដល់ឆ្នាំ២០១៨ មានចំនួន៤៩៥អង្គ ប្រឡងជាប់វិញ្ញាបនបត្រពុទ្ធិកបឋមសិក្សា ១២៦អង្គ ប្រឡងចូលសាលាពុទ្ធិកវិទ្យាល័យវត្តរាជបូណ៌ ៨១អង្គ ។ ឆ្នាំសិក្សាបើកបវេសនកាលថ្មី ២០១៩-២០២០ មានសមណសិស្សនិងសិស្ស ចំនួន ៥៩ អង្គ-នាក់ ។
បើយោងតាមរបាយការណ៍របស់មន្ទីរធម្មការនិងសាសនា បានឲ្យដឹងដែរថា នៅក្នុងទូទាំងខេត្តសៀមរាប មានវត្តអារាមព្រះពុទ្ធសាសនាចំនួន ២៤៣វត្ត មានព្រះសង្ឃសារុប ៤ ៦៩៧ អង្គ ។ នៅក្នុងបណ្តាវត្តអារាមទាំងនោះមានសាលាពុទ្ធិកបឋមសិក្សាចំនួន៤៤កន្លែង សាលាពុទ្ធិកសិក្សាបឋមភូមិ ២កន្លែង និងមានសាលាពុទ្ធិកសិក្សាទុតិយភូមិ ១កន្លែង ដែលចំនួនសាលាពុទ្ធិកសិក្សាទាំងអស់នេះ ពុំទាន់ឆ្លើយតបបាន ទៅនឹងតម្រូវការបណ្តុះបណ្តាលធនធានសង្ឃ នៅឡើយ នោះទេ ៕
អត្ថបទ និងរូបភាព៖ លោក ងិន គឹមឡេង
