លោកវរសេនីយ៏ឯក ទេព ចាន់ណា អធិការនគរបាលស្រុកសូទ្រនិគមន៍ បានឲ្យដឹងថា នៅវេលាម៉ោង១៩.00 នាទី ថ្ងៃទី២៣ ខែមិថុនា ឆ្នាំ២០១៩នេះ មានករណីគ្រោះថ្នាក់ចរាចរណ៍មួយ បានកើតនៅលើកំណាត់ផ្លូវជាតិលេខ ៦ ស្ថិតក្នុងភូមិខ្ចាស់ ឃុំខ្ចាស់ ស្រុកសូទ្រនិគម ខេត្តសៀមរាប។
លោកវរសេនីយ៏ឯក បន្តថា ករណីគ្រោះថ្នាក់ចរាចរណ៍នេះបង្ករឡើងរវាងរថយន្តម៉ាកហ៊ីយិនដាយ ពណ៌ទឹកដោះគោ ពាក់ស្លាកលេខ សៀមរាប ៣A-១៥១៤ បើកបរដោយជនមិនស្គាល់អត្តសញ្ញាណ បើកបរក្នុងទិសដៅពីកើត ទៅលិច បានបើកទៅបុកម៉ូតូសណ្តោងរឺម៉ក ០១គ្រឿង ម៉ាកហុងដាទ្រីម ពណ៌ខ្មៅ ពាក់ស្លាកលេខ១N-៦៤២៩ បើកបរដោយបុរសម្នាក់ ឈ្មោះនូ ឆុន ភេទប្រុស អាយុ 44 ឆ្នាំ រស់នៅភូមិបិតមាស ឃុំសំរោង ស្រុកសូទ្រនិគម ខេត្តសៀមរាប បើកបរក្នុងទិសដៅពីលិច ទៅកើត ក្នុងទិសដៅបញ្ច្រាសទិសគ្នា លុះដល់កន្លែងកើតហេតុ ម៉ូតូក៏បានបតឆ្វេងខ្វះការប្រុងប្រយ័ត្ន ហើយរថយន្តបានបុកពេញទំហឹង បណ្ដលឲ្យបុរសជាអ្នកបើករឺម៉កស្លាប់នៅនឹងកន្លែង។ ហើយក្រោយពេលកើតហេតុអ្នកបើកបររថយន្តបានចុះពីរថយន្តរត់គេចខ្លួនបាត់ពីកន្លែងកើតហេតុ។
ក្រោយពេលកើតហេតុ កម្លាំងនគរបាលជំនាញ ក៏បានចុះទៅដល់កន្លែងកើតហេតុ ហើយបានពិនិត្យ និងធ្វើការវាស់វែង និងបានកសាងសុំណុំរឿងអនុវត្តទៅតាមនីតិវិធីបន្ត ៕
ព័ត៌មានជាតិ ថ្មីៗ
អត្ថបទនិង រូបភាព ៖ ថាច់ ពិសុទ្ធ
កែសម្រួល ៖ អ៊ុន ណារាជ្យ
