ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ហៅកាត់ថា ស.ស.យ.ក បានថ្លែងថា ចាប់តាំងពីថ្ងៃកកើតមកដល់ពេលបច្ចុប្បន្ន ស.ស.យ.ក បានក្លាយជាវេទិការសម្រាប់យុវជនកម្ពុជា ដែលមានបំណងចូលរួមជួយសង្គម ។ឯកឧត្តម ហ៊ុន ម៉ានី បានលើកឡើងបែបនេះ នៅក្រោយពេលបញ្ចប់កិច្ចប្រជុំ២ថ្ងៃរបស់គណៈកម្មាធិការកណ្តាល សហភាពសហព័ន្ធយុវជនកម្ពុជាមានរយៈពេល២ថ្ងៃ(២២/២៣ មិថុនា ២០១៩) នៅខេត្តសៀមរាប។
ឯកឧត្តមបន្តថា កន្លងមកសហភាពសហព័ន្ធយុវជនកម្ពុជា បានសម្រេចនូវសមិទ្ធផលធំៗជាច្រើនដែលទទួលបានការវាយតម្លៃខ្ពស់ និងកោតសរសើរពីសាធារណជន និងថ្នាក់ដឹកនាំ មិនថាថ្នាក់ជាតិ ថ្នាក់តំបន់ និងថ្នាក់ពិភពលោក។ ស.ស.យ.ក. បានចូលរួមក្នុងកិច្ចការងារ ការពារ ថែរក្សា និងលើកស្ទួយការផ្សព្វផ្សាយវប្បធម៌ អរិយធម៌ទៅដល់យុវជន តាមរយៈការដឹកនាំរៀបចំមហាព្រឹត្តិការណ៍អង្គរសង្ក្រាន្ត ការគៀរគរយុវជន និងប្រជាជនខ្មែរមករួមគ្នាសម្រេចស្នាដៃបំបែកឯតទគ្គកម្មពិភពលោក (ក្រមាវែងជាគេលើពិភពលោក) និងការទទួលបានមេដាយ និងពាន់រង្វាន់អន្តរជាតិជាបន្តបន្ទាប់។ ស.ស.យ.ក. ក៏បានចូលរួមយ៉ាងសកម្មក្នុងកិច្ចការងារសង្គម និងមនុស្សធម៌ ក្នុងនោះរួមមាន ការបរិចាគឈាម ការចុះជួយប្រជាជនមូលដ្ឋានដែលជួបការលំបាក ឬរងប៉ះពាល់ដោយគ្រោះធម្មជាតិផ្សេងៗ ការចូលរួមសង្កេតការណ៍ការបោះឆ្នោត និងការប្រលងមធ្យមសិក្សាទុតិយភូមិ ការគាំទ្រនូវគម្រោង ឬកម្មវិធីផ្សេងៗដែលចូលរួមចំណែកក្នុងការអភិវឌ្ឍសង្គមជាតិ។
ឯកឧត្តមហ៊ុន ម៉ានី បន្តឲ្យដឹងទៀតថា ទន្ទឹមនឹងនោះដែរ ស.ស.យ.ក. បាន និងកំពុងជំរុញអោយយុវជនយកចិត្តទុកដាក់លើការសិក្សា និងពង្រឹងសមត្ថភាព ហើយត្រៀមខ្លួនសម្រាប់ការប្រលង តាមរយៈការរៀបចំនូវវគ្គបំប៉នថ្នាក់ទី១២ ក្នុងទូទាំងខេត្តក្រុង ដែលបានឆ្លុះបញ្ចាំងពីការចូលរួមលើការងារពង្រឹង និងលើកកម្ពស់វិស័យអប់រំក្នុងប្រទេស។
ឯកឧត្តមហ៊ុន ម៉ានី បានបញ្ជាក់ថា សមិទ្ធផលដែលបានរៀបរាប់ខាងលើ គឺកើតចេញពីការចូលរួមដោយស្ម័គ្រចិត្តរបស់សមាជិក សមាជិកា ស.ស.យ.ក. ម្នាក់ៗ ដែលបានឆ្លុះបញ្ចាំងពីទឹកចិត្ត ហ៊ានលះបង់ កម្លាំងកាយ និងចិត្ត ក្នុងនាមយុវជនកម្ពុជា ដើម្បីផ្តល់ត្រលប់ទៅសង្គមជាតិដែលខ្លួនរស់នៅ និងដើម្បីអនាគតកម្ពុជា ៕
អត្ថបទ និងរូបភាព ៖ ជា ស្រស់, ខេង ឧត្តម
កែសម្រួល ៖ អ៊ុន ណារាជ្យ
