កាលពីពេលថ្មីៗនេះ និស្សិតនៃសកលវិទ្យាល័យ សកលវិទ្យាល័យ Dankook University នៃសាធារណៈរដ្ឋកូរ៉េខាងត្បូង ប្រមាណជា៤០នាក់ បានមកទស្សនកិច្ចសិក្សានៅក្នុងសាលាបឋមសិក្សាប្រិយ ភូមិប្រិយ ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដើម្បីយកបទពិសោធ៍និងស្វែងយល់ពីប្រទេសកម្ពុជា ក្រោមការដឹកនាំរបស់លោកគ្រូសាស្ត្រាចារ្យ Hyeong Soo Kim ដោយសហការជាមួយអង្គការសេវាកម្ម ដើម្បីសន្តិភាពកម្ពុជា ។
នៅក្នុងដំណើរទស្សនកិច្ចនេះ ក្រុមនិស្សិតបាន ជួយបង្រៀនដល់សិស្សានុសិស្សផ្នែកអប់រំអនាម័យ , សិក្សាសង្គម , កីឡាសម្ព័ន្ធ , ជួយជួលជុលអគារសិក្សា , បំពាក់ឧបករណ៍ក្មេងលេង , ធ្វើក្លោងទ្វារផ្លូវចូលសាលា , បំពាក់សម្ភារសិក្សា សម្រាប់ការិយាល័យ , សម្លៀកបំពាក់សិស្ស , សម្អាតទីធ្លាសាលា ,លាបថ្នាំថ្មីដល់អគារសិក្សា , គូររូបលម្អសាលាសម្រាប់ក្មេង , ចាក់ដីបំពេញទីធ្លាសាលា ព្រមទាំងបានជួយអង្ករ និង ធ្វើម្ហូបអាហារដល់កុមារចំនួនប្រហែល ៤០០នាក់នៅក្នុងអង្កការ ដែល (DAIL) នៅសង្តាត់សៀមរាប ក្រុងសៀមរាបផងដែរ ។
កាលធ្វើទស្សនកិច្ចនេះ គឺជាការចូលរួមចំណែកជួយអភិវឌ្ឍន៍ និង ស្វែងយល់អំពីវប្បធម៌រវាងប្រទេសកម្ពុជា និង ប្រទេសកូរ៉េខាងត្បូង ដែលជាការទំនាក់ទំនងដ៏ជិតស្និតជាមួយប្រទេសកម្ពុជា ក្នុងនាមជាគ្រួសារមនុស្សជាតិតែមួយ បើទោះបីជាមានសញ្ជាតិ និង ជំនឿផ្សេងៗគ្នាក៏ដោយ គឺដើម្បីបង្កើតនូវសន្ដិភាពជាសកលនៅលើពិភពលោក និង ការចូលរួមសកម្មភាពជួយដល់សហគមន៍ក្រីក្រ ព្រមទាំងការចូលរួមអភិវឌ្ឍន៍វិស័យអប់រំ និងសេដ្ឋកិច្ចនៅក្នុងប្រទេសកម្ពុជា ហើយនៅពេលកន្លងមកនេះ ក្រុមនេះ បានចុះតាមខេត្តនានា បានចុះជួយនៅតាមសាសាបឋមសិក្សា សហគមន៍ក្រីក្រ មជ្ឈមណ្ឌលកុមាកំព្រា មជ្ឈមណ្ឌលជនពិការ មជ្ឈមណ្ឌលពេទ្យកុមាររស់នៅដោយមានផ្ទុកមេរោគអេដស៍ ដោយបានជួយឧបត្ថមនូវសម្ភារសិក្សាមួយចំនួន ដូចជា សម្ភារសម្រាប់សិស្សសិក្សា , សម្ភារកីឡា និង សម្ភាររស់នៅមួយចំនួនទៀត ដល់សាលា និង មជ្ឈមណ្ឌលផ្សេងៗ ។
សូមបញ្ជាក់ថា តាំងតែពីឆ្នាំ២០០៩ដល់បច្ចុប្បន្ននេះ សាកលវិទ្យាល័យ Dankook university នៃសាធារណរដ្ឋកូរ៉េបានចុះមកទស្សនកិច្ចសិក្សានៅក្នុងសាលាបឋមសិក្សាជាច្រើននៅក្នុងប្រទេសកម្ពុជា ដែលមានចំនួន១១លើករួចមកហើយ ហើយមានគម្រោងជួយដល់សាលាបឋមសិក្សានានា ដោយជួយនូវបង្គន់ និងប្រព័ន្ធទឹកស្អាត សម្រាប់សិស្សានុសិស្សប្រើប្រាស់ជាប្រចាំថ្ងៃ ដែលអាចពិសារបាននៅក្នុងសាលាថែមទៀត ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
