កាលពីថ្ងៃទី២៤ ខែមិថុនា ឆ្នាំ២០១៩ និស្សិតនៃ សាកលវិទ្យាល័យ ដេនឃូក នៃសាធារណរដ្ឋកូរ៉េ ប្រមាណ៤០នាក់ បានមកទស្សនៈកិច្ចសិក្សានៅ សាលាបឋមសិក្សា ប្រិយ៍ ស្ថិតនៅភូមិប្រិយ៍ ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដើម្បីជួយជួលជុល អាគារសិក្សា បំពាក់ឧបករណ៏ក្មេងលេង កសាងក្លោងទ្វារផ្លូវចូលសាលាថ្មី រួមនិងសមិទ្ធផលជាច្រើនទៀត។
ចាប់តាំងពីឆ្នាំ២០០៩មក សាកលវិទ្យាល័យ ដេនឃូក នៃសាធារណរដ្ឋកូរ៉េនេះ បានចុះមកធ្វើទស្សនៈកិច្ចសិក្សា នៅប្រទេសកម្ពុជាចំនួន ១១លើកមករួចមកហើយ។ គោលបំណង នៃដំណើរទស្សនៈកិច្ចនៅតាមបណ្ដាខេត្ត និងសាលានានា ក្នុងព្រះរាជរាណាចក្រកម្ពុជានេះ ដើម្បីចូលរួមជាមួយអ្នកស្ម័គ្រចិត្តនៅក្នុងកម្មវិធីអភិវឌ្ឍន៍សហគមន៍ ដែលកំពុងបន្តនៅទូទាំងពិភពលោក។ កម្មវិធីអភិវឌ្ឍន៍សហគមន៍នេះដែរ ត្រូវបានបង្កើតឡើង ដើម្បីលើកកម្ពស់កំណើន និង ការអភិវឌ្ឍន៍របស់បុគ្គល និង សហគមន៍ តាមរយៈបទពិសោធន៍ចែករំលែកនៃសេវាកម្មស្ម័គ្រចិត្ត ដោយមានការគាំទ្រពីសេវាសន្តិភាពសហគមន៍នៅទូទាំងពិភពលោក និង ក្លាយជាគំរូនៃការអភិវឌ្ឍន៍តាមសហគមន៍ដោយប្រជាជនគ្រប់មជ្ឈដ្ឋានធ្វើការជាមួយគ្នា ដើម្បីបំពេញនូវចក្ខុវិស័យរួមគ្នា ហើយក៏ដើម្បីសិក្សាស្វែងយល់អំពីវប្បធម៌រវាងប្រទេសទាំងពីរគឺ កម្ពុជា-កូរ៉េ ។
ជាក់ស្តែងនៅពេលកន្លងមកនេះ ក្រុមនេះបានចុះតាមខេត្តនានា ហើយក៏បានចុះជួយនៅតាមសាសាបឋមសិក្សា សហគមន៍ក្រីក្រ មជ្ឈមណ្ឌលកុមាកំព្រា មជ្ឈមណ្ឌលជនពិការ មជ្ឈមណ្ឌលពេទ្យកុមាររស់នៅដោយមានផ្ទុកមេរោគអេដស៍។
រយៈពេល១០ឆ្នាំកន្លងមកនេះ កម្មវិធីអភិវឌ្ឍន៍សហគមន៍ សាកលវិទ្យាល័យ ដេនឃូក បានផ្ដោតទៅលើសាសាបឋមសិក្សា សហគមន៍ក្រីក្រ មជ្ឈមណ្ឌលកុមាកំព្រា មជ្ឈមណ្ឌលជនពិការ មជ្ឈមណ្ឌលពេទ្យកុមាររស់នៅដោយមានផ្ទុកមេរោគអេដស៍។ ក្នុងនោះសមិទ្ធផលជាប្រយោជន៍ដល់សហគមន៍ និងសាលារៀនទាំងនោះ តាមរយៈការចុះមកធ្វើទស្សនកិច្ចសិក្សារបស់ក្រុមនិស្សិតកូរ៉េទាំងនោះរួមមាន ជួលជុលអាគារសិក្សា បំពាក់ឧបករណ៏ក្មេងលេងនៅតាមសាលាបឋមសិក្សា ធ្វើក្លោទ្វារចូលសាលា បំពាក់សម្ភារៈសិក្សា និងកីឡា ធ្វើទីលានកីឡា ធ្វើបរិស្ថានទីធ្លាសាលា គូររូបលម្អរសាលាសំរាប់កុមារ ព្រមទាំងបានជួយអង្ករ និង ធ្វើម្ហូបអាហារដល់កុមារផងដែរ។
