អនុក្រឹត្យលេខ ១២៩ អនក្រ.បក របស់រាជរដ្ឋាភិបាលកម្ពុជា ស្តីពីការលុបចោល និង ការដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ និង ការទទួលពាក្យសុំជាជនបរទេសអន្តោប្រវេសន្ត មានឱសានវាទនៃការអនុវត្តត្រឹមថ្ងៃទី៣០ ខែមិថុនា ឆ្នាំ២០១៩ ។
តាមរបាយការណ៍របស់ការិយាល័យគ្រប់គ្រងជនបរទេស នៃស្នងការដ្ឋាននគរបាលខេត្តសៀមរាប បានឲ្យដឹងនៅក្នុងកិច្ចប្រជុំបូកសារុបលទ្ធផលការងារ ដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកំពុងកាន់កាប់ប្រើប្រាស់ ការទទួលពាក្យប្រកាសទទួលស្កាល់ និង ប័ណ្ណស្នាក់នៅអចិន្ត្រៃ នាព្រឹកថ្ងៃទី២៥ ខែមិថុនា ឆ្នាំ២០១៩នេះ នៅសាលប្រជុំសាលាខេត្តសៀមរាប បានឲ្យដឹងថា ឯកសាររដ្ឋបាលកម្ពុជាមិនប្រក្រតីដែលត្រូវដកហូតមានចំនួន ៦៣៤ ឯកសារ ជាលទ្ធផលជាក់ស្តែង ឯកសារដែលត្រូវដកហូតបានមានចំនួន ៥៥៤ ឯកសារ ស្មើនឹង ៩៤% បើប្រៀបធៀបលទ្ធផលសារុប ទាំងក្នុងនិងក្រៅតារាងឧបសម្ព័ន្ធ មានចំនួន ៩៣២ ឯសារ ស្មើនឹង ១៤៧% ។ លទ្ធផលនៃការទទួលពាក្យ សុំប្រកាសទទួលស្គាល់ជាជនបរទេស អន្តោប្រវេសន្តចំនួន ៣ ១៩៣ ច្បាប់ ស្មើនឹងចំនួន ១ ៨៥៧ គ្រួសារ សារុបសមាជិកនៃគ្រួសារទាំងនោះ ស្មើនឹង ៥ ០៦០ នាក់ ក្នុងនោះរួមមាន ៥ សញ្ជាតិ ( វៀតណាម ថៃ ឡាវ ភូមា និង នេប៉ាល់ ) ។ ការស្នើសុំប័ណ្ណស្នាក់នៅអចិន្ត្រៃយ៍មានចំនួន ២ ៨៣២ ច្បាប់ ស្មើនឹង ១ ៦១២ គ្រួសារ មានសមាជិកនៃគ្រួសារទាំនោះចំនួន ៤ ៥៨០ នាក់ និងបានទទួលពាក្រសុំបន្តសុពលភាពប័ណ្ណស្នាក់អចិន្ត្រៃយ៍ ចំនួន ៣៦៩នាក់ ក្នុងនោះរួមមាន៥សញ្ជាតិ ( វៀតណាម ថៃ ឡាវ ភូមា និង នេប៉ាល់ ) ។
គោលដៅនៃការអនុវត្តអនុក្រឹត្យនេះ មាននៅក្នុងក្រុងសៀមរាប ស្រុកសូទ្រនិគម ស្រុកជីក្រែង ស្រុកប្រាសាទបាគង និងនៅស្រុកពួក ហើយឯកសារដែលពួកគេកាន់កាប់ប្រើប្រាស់ដោយខុសច្បាប់នោះ រួមមាន សៀវភៅស្នាក់ ( ក២ ) សៀវភៅគ្រួសារ ( ក៤ ) សេចក្តីចម្លងសំបុត្រកំណើតខ្មេរ សំបុត្រអាពាហ៍ពិពាហ៍ អត្តសញ្ញាណប័ណ្ណសញ្ជាតិខ្មែរ លិខិតឆ្លងដែន ជាដើម ។
ឧត្តមសេនីយឯក ហែម ថេង អគ្គនាយករងនៃអគ្គនាយកដ្ឋានអន្តោប្រវេសន៍ និងជាប្រធានក្រុមការងារទី៥ អំពីការងារបញ្ចប់ ការដកហូតឯកសារដ្ឋបាលកម្ពុជាមិនប្រក្រតីពីជនបរទេស ដែលកំពុងកាន់កាប់ប្រើប្រាស់ និងការទទួលពាក្យសុំជាជនបរទេសអន្តោប្រវេសន្តក្នុងខេត្តសៀមរាប មានប្រសាសន៍ថា ៖ ការសម្រេចបានលើការងារនេះ គឺជាមោទនភាពរបស់កម្ពុជា ដែលត្រូវបានបញ្ចប់ជម្ងឺរ៉ាំរ៉ៃ នៃការគ្រប់គ្រងជនបរទេស សម្ពាធសង្គមបានដាក់បញ្ហាជាច្រើន អំពីការរស់នៅរបស់ជនបរទេសនៅក្នុងមាតុភូមិកម្ពុជា ។ ការគ្រប់គ្រងជនបរទេសដ៏មានប្រសិទ្ធិភាព និង គុណភាព តាមគោលការណ៍របស់រាជរដ្ឋាភិបាល គឺជាការរក្សាបានក្នុងនាមជាប្រទេសមួយ ជារដ្ឋមួយ ដែលមានអធិបតេយ្យភាព បូរណភាពទឹកដី មានរដ្ឋធម្មនុញ្ញ និង ព្រះមាហាក្សត្រ ។
លោកជំទាវ យូ សុភា អភិបាលរងខេត្តសៀមរាប ទទួលបន្ទុកការងារជំរឿន និង គ្រប់គ្រងជនបរទេស ជម្រុញឲ្យសមត្ថកិច្ចជំនាញ និង អាជ្ញាធរដែនដី សហការបន្តវិធានការ គ្រប់គ្រងជនបរទេសអន្តោប្រវេស៍ឲ្យបានម៉ឺងម៉ាត់បំផុត ព្រោះវាអាចទាក់ទងដល់កិច្ចការថែរក្សាសន្តិសុខជាតិ ។ លោកជំទាវ សង្កត់ធ្ងន់ថា បើសិនជាសមត្ថកិច្ចមិនចេញលិខិតខុសច្បាប់ឲ្យជនបរទេសប្រើប្រាស់ទេនោះ តើជនបរទេសទាំងនោះ មានឯកសារខុសច្បាប់មកពីណា ដើម្បីប្រើប្រាស់ ? អ្នកសូកប៉ាន់ និងអ្នកទទួលសំណូក ប្រព្រឹត្តិអំពោះខុសច្បាប់ គឺត្រូវទទួលទោសជាធរមាន ដូចគ្នា ។ លោកជំទាវមានសុតិដ្ឋិនិយមថា ក្រោយពីឱសានវាទនៃការអនុវត្តអនុក្រឹត្យនេះ ការកាន់កាប់ប្រើប្រាស់ឯកសារដ្ឋបាលកម្ពុជាមិនប្រក្រតីនៃជនបរទេស មិនអាចកើតមានឡើងសាជាថ្មីបានឡើយ ដោយសារតែបញ្ហាខ្វះចន្លោះ ធួររលុង ករណីបង្កើតបញ្ហា ត្រូវសមត្ថកិច្ចជំនាញបានរកឃើញអស់ហើយនៅក្នុងបទពិសោធន៍ការងារកន្លងមកនេះ ។
ទោះជាយ៉ាងណាក៏ដោយ លោកជំទាវ យូ សុភា វាយតម្លៃថា សមិទ្ធលការងារនេះ គឺជាការកសាងព្រឹត្តិការណ៍ប្រវត្តិសាស្ត្រ លើការងារគ្រប់គ្រងជនបរទេស ក្នុងសម័យកាល តេជោ សែន ។
អត្តបទនិងរូបភាព៖លោក ងិន គឹមឡេង
