ប្រធានអង្គការសិល្បៈសហសម័យ នៃប្រទសជប៉ុន ស្នើឯកឧត្តម ហង់ ពៅ អគ្គនាយកអាជ្ញាធរជាតិអប្សរា គម្រោងពិព័រណ៍សិល្បៈសហសម័យទាក់ទងនឹងអរិយធម៌ខ្មែរ នៅតាមរមណីយដ្ឋានអង្គរ ដើម្បីផ្សព្វផ្សាយវប្បធម៌ ប្រពៃណីខ្មែរដ៏ផូរផង់ឱ្យបានទូលំទូលាយទៅកាន់ពិភពលោកថែមទៀត។
បន្ទាប់ពីមានជំនួបសម្ដែងការគួរសម រវាងឯកឧត្តម ហង់ ពៅ និងលោក អាតស៊ូស៊ី យ៉ាសាគី (Atsushi Yazaki) ប្រធានអង្គការសិល្បៈសហសម័យជប៉ុន ថ្ងៃទី២៤ ខែមិថុនា ឆ្នាំ២០១៩ លោក អាតស៊ូស៊ី យ៉ាសាគី បានបញ្ជាក់ជូន ឯឯកឧត្តមអគ្គនាយកអាជ្ញាធរជាតិអប្សរាថា គម្រោងពិព័រណ៍សិល្បៈសហសម័យនេះ គឺធ្វើទៅតាមរដូវកាល និងមិនមែនជាលក្ខណៈពិព័រណ៍អចិន្ត្រៃយ៍ឡើយ ដែលមាននឹងមានការដាក់តាំងនូវវត្ថុសិល្បៈបង្កើតថ្មីលក្ខណៈសហសម័យ ដែលឆ្លុះបញ្ចាំងអំពីអរិយធម៌ខ្មែរនៅតាមរមណីយដ្ឋានអង្គរ។
ឆ្លើយតបនឹងបំណងខាងលើ ឯកឧត្តម ហង់ ពៅ បានសម្តែងការគាំទ្រចំពោះគំនិតដ៏ល្អប្រសើរ ព្រោះគម្រោងនេះជាការបង្កើតគំនិតថ្មីដោយមានការច្របាច់បញ្ចូលគ្នារវាងវប្បធម៌និងសិល្បៈ។ ទោះជាយ៉ាងណា ឯកឧត្តម បានស្នើដល់ភាគីជប៉ុនឲ្យធ្វើការសិក្សាលម្អិត លើគម្រោងនេះបន្ថែមទៀត ជាពិសេសពាក់ព័ន្ធនឹងការជ្រើសរើសទីតាំង ជៀសវាងសំដៅតែប្រាសាទអង្គរវត្ត តែគួរពិនិត្យលើទីតាំងរមណីយដ្ឋានផ្សេងដទៃទៀត។
ឯកឧត្តមអគ្គនាយកក៏បានអញ្ចើញ លោកប្រធានអង្គការសិល្បៈសហសម័យជប៉ុន ឲ្យមកធ្វើបទបង្ហាញអំពីគម្រោងនេះក្នុងកិច្ចប្រជុំគណៈកម្មាធិការអន្ដរជាតិសម្របសម្រួល កិច្ចគាំពារ និងអភិវឌ្ឍន៍តំបន់ប្រវត្តិសាស្ត្រអង្គរ ហៅកាត់ថាអាយស៊ីស៊ី-អង្គរ នៅខែធ្នូ ឆ្នាំ២០១៩នាពេលខាងមុខនេះផងដែរ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
