ព្រឹកថ្ងៃទី ២៦ ខែ មិថុនា ឆ្នាំ២០១៩នេះ នៅរដ្ឋបាលសាលាខេត្តសៀមរាប មានបើកកិច្ចប្រជុំសាមញ្ញលើកទី១ របស់ក្រុមប្រឹក្សាខេត្តសៀមរាប អាណត្តិទី២ ដើម្បីពិនិត្យពិភាក្សា ទៅលើរបាយការណ៍ លទ្ធផលការងាររបស់រដ្ឋបាលខេត្ត ក្រុមប្រឹក្សាខេត្តអាណត្តិទី២ ដែលនៅសេសសល់រយៈពេលបីខែដែលអនុម័តដោយក្រុមប្រឹក្សាខេត្ត និង ធ្វើការផ្សព្វផ្សាយសេចក្តីណែនាំលេខ ០១៥ សណន របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុង និង គំរូបទបញ្ជាផ្ទៃក្នុងរបស់ក្រុមប្រឹក្សា និង ការពិនិត្យ ពិភាក្សាការរៀបចំសេចក្តីព្រាងប្រតិទិន កិច្ចប្រជុំរបស់ក្រុមប្រឹក្សាខេត្ត រយៈពេល១២ខែ និង លើកឡើងនូវបញ្ហាផ្សេងៗ ក្រោមកិច្ចដឹកនាំប្រជុំរបស់ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងមានការអញ្ជើញចូលរួមពីសំណាក់ឯកឧត្តម លោកជំទាវ ជាសមាជិកក្រុមប្រឹក្សាខេត្ត គណៈអភិបាលខេត្ត អាជ្ញាធរជាតិអប្សរា និង អស់លោក លោកស្រី ថ្នាក់ដឹកនាំមន្ទីរ ស្ថាប័ន អង្គភាពជុំវិញខេត្ត ។
ក្នុងនោះដែរ លោក សុខ ថុល នាយករដ្ឋបាលសាលាខេត្ត ក៏បានអាននូវរបាយការណ៍លទ្ធផលការងារ និង ទិសដៅ ដែលត្រូវអនុវត្តបន្តរបស់រដ្ឋបាលខេត្តសៀមរាប ដែលនៅសេសសល់ក្នុងអាណត្តិទី២ របស់ក្រុមប្រឹក្សាខេត្ត និង ការ អាននូវសេចក្តីណែនាំ របស់ក្រសួងមហាផ្ទៃ ស្តីពីការរៀបចំបទបញ្ជាផ្ទៃក្នុង និង គំរូបទបញ្ជាផ្ទៃក្នុងរបស់ក្រុមប្រឹក្សា និង ការពិនិត្យ ពិភាក្សាការរៀបចំសេចក្តីព្រាងប្រតិទិន កិច្ចប្រជុំរបស់ក្រុមប្រឹក្សាខេត្ត រយៈពេល១២ខែ នៃអាណត្តិទី៣ ។ ក្នុងនោះដែរសមាជិកក្រុមប្រឹក្សា ក៏បានធ្វើការពិនិត្យ ពិភាក្សា ទៅលើខ្លឹមសារ នៃសេចក្តីព្រាងបទបញ្ជាផ្ទៃក្នុងរបស់ក្រុមប្រឹក្សា ទៅតាមជំពូកនិមួយៗ យ៉ាងល្អិតល្អន់ និង ស៊ីជម្រៅទៅលើខ្លឹមសារទាំងនោះ ព្រមទាំងសេចក្តីព្រាងប្រតិទិននៃកិច្ចប្រជុំសាមញ្ញរបស់ក្រុមប្រឹក្សាខេត្តទាំង១២ខែផងដែរ ។
មានប្រសាសន៍នាឱកាសនេះដែរ ឯកឧត្តម ទៀ សីហា ក៏បានធ្វើការបញ្ជាក់ជូនដល់ កិច្ចប្រជុំសាមញ្ញលើកទី១ របស់ក្រុមប្រឹក្សាខេត្ត អាណត្តិទី៣ ឲ្យបានជ្រាបច្បាស់ អំពីឋានានុក្រម ពីតួនាទីភារកិច្ចរបស់ក្រុមប្រឹក្សាខេត្ត គណៈអភិបាលខេត្ត ក្នុងនិតិបញ្ញាត និង និតិប្រតិបត្តិ ។ ឯកឧត្តមក៏បានលើក ឡើងផ្តោតទៅលើការងារធនធានរ៉ែ និង សំណង់ គឺ មន្ទីរជំនាញគឺត្រូវយកចិត្តទុកដាក់ខ្ពស់ ចំពោះបញ្ហាសំណង់នៅក្នុងក្រុង ស្រុង ទាំង ចាស់ ទាំងថ្មី អំពីបទដ្ឋានបច្ចេកទេសសំណង់ ក្នុងពេលសាងសង់បានត្រឹមត្រូវទៅតាមបទដ្ឋានបច្ចេកទេស ព្រមទាំងមានច្បាប់អនុញ្ញាតឲ្យ សាងសង់ហើយឬនៅ តែបើរាល់សំណង់ទាំងឡាយណាគ្នាច្បាប់ត្រឹមត្រូវ ហើយខុសទៅនឹងបទដ្ឋានបច្ចេកទេសសាងសង់ គឺត្រូវបញ្ឈប់ ជាបន្ទាន់ ឬ ធ្វើការរុះរើ ដើម្បីធានាដល់សន្តិសុខ សុវត្ថិភាពជាសាធារណៈ ដើម្បីជៀសវាងកុំឲ្យមានកើតឡើងដូចនៅខេត្តព្រះសីហនុ ។
ឯកឧត្តម ទៀ សីហា បន្តថា ចំពោះបញ្ហាការដឹកជញ្ជូនធនធានរ៉ែ និង ជីកកកាយអាចម៌ដី នោះ មន្ទីរជំនាញត្រូវធ្វើការពិនិត្យជាបន្ទាន់ឲ្យឆាប់រហ័ស នៅតាមការដ្ឋាន អំពីច្បាប់អនុញ្ញាត និង ការជីកនោះត្រឹមត្រូវទៅតាមការណែនាំ របស់មន្ទីរជំនាញឬយ៉ាងណា តែបើការដ្ឋានណាគ្មានច្បាប់នោះ ត្រូវធ្វើការផ្អាក់ឬបិទតែម្តង មិនឲ្យធ្វើអាជីវកម្មឡើង ។ ម្យ៉ាងទៀត ចំពោះ ការដឹកជញ្ជូនធនធានរ៉ែ ( ដី , ខ្សាច់ , ថ្ម , ឥដ្ឋ ) នាពេលកន្លងមក បានធ្វើឲ្យប៉ះពាល់ដល់់បរិស្ថានក្នុងក្រុង ដោយខេត្តសៀមរាប ជាតំបន់ គោលដៅរបស់ភ្ញៀវទេសចរណ៍ ចូលមកទស្សនាកម្សាន្ត ។ ដូច្នេះទាំងកម្លាំងសមត្ថកិច្ច មន្ទីរជំនាញពាក់ព័ន្ធ គឺត្រូវរួមសហការគ្នា អនុវត្ត ឲ្យខាងតែបាន ចំពោះបញ្ហារថយន្តដឹកជញ្ជូនដី ដែលធ្វើឲ្យធ្លាក់នៅតាមដងផ្លូវក្នុងក្រុងបន្តទៀត ។
មានមតិបូកសរុបលទ្ធផលនៃកិច្ចប្រជុំនោះ ឯកឧត្តម អ៊ឹង ហឿន ក៏បានលើកនូវសំណូមពរដល់សមាជិកក្រុមប្រឹក្សាខេត្ត ដែលមិនទាន់បានធ្វើការប្រកាស់ទ្រព្យសម្បត្តិ ត្រូវប្រញ៉ាប់ធ្វើជាបន្ទាន់ ព្រមទាំងក្រើនរំលឹកដល់ ថ្នាក់ដឹកនាំមន្ទីរ ស្ថាប័ន អង្គភាពជុំវិញខេត្ត ត្រូវធ្វើការផ្តល់នូវរបាយការណ៍សកម្មភាព លទ្ធផលដែលសាមីមន្ទីរ ស្ថាប័ន អង្គភាពអនុវត្តបានប្រចាំខែនិមួយៗ ទៅតាមការកំណត់របស់ រដ្ឋបាលសាលាខេត្ត និង ត្រូវមានវត្តមានចូលរួមប្រជុំក្រុមប្រឹក្សាខេត្តឲ្យបានគ្រប់មន្ទីរ ស្ថាប័ន អង្គភាពផងដែរ ។
ឯកឧត្តម អ៊ឹង ហឿន មានប្រសាសន៍បន្តថា ម្យ៉ាងទៀតរាល់កិច្ចការសេសសល់ទាំងប៉ុន្មាន គណៈអភិបាលខេត្ត ត្រូវយកនូវរាល់ការងារដែលលើកឡើងក្នុងកិច្ចប្រជុំសាមញ្ញលើកទី១ របស់ក្រុមប្រឹក្សាខេត្តអាណត្តិទី៣ ទៅធ្វើការអនុវត្តប្រតិបត្តិការងារឲ្យទទួលបានលទ្ធផល ប្រកបដោយប្រសិទ្ធភាពខ្ពស់ និង ធ្វើឲ្យជីវភាពរបស់ប្រជាពលរដ្ឋ មានភាពប្រសើរឡើង ក្នុងការចូលរួមអភិវឌ្ឍន៍នៅតាមមូលដ្ឋានឃុំ សង្កាត់ ឲ្យមានការរីកចម្រើនទៅថ្ងៃអនាគត ៕
អត្ថបទ និង រូបភាព ៖ ម៉ី សុខារិទ្ធ
កែសម្រួល ៖ អ៊ុន ណារាជ្យ
