អនុគណៈកម្មាធិការអាស៊ានផ្នែកវប្បធ៌មនិងកិច្ចប្រជុំលើកទី៨បណ្តាញកិច្ចសហប្រតិបត្តិការវប្បធម៌អាស៊ាន បូកបី
ក្រសួងវប្បធម៌និងវិចិត្រសិល្បៈនៃព្រះរាជាណាចក្រកម្ពុជា នៅសណ្ឋាគារសុខាល័យខេត្តសៀមរាប ក្រោមអធិបតីភាព ឯកឧត្តម សំរាំង កំសាន្ត រដ្ឋលេខាធិការក្រសួងវប្បធម៌និងវិចិត្រសីល្បៈ និងវត្តមានមន្ត្រីជំនាញខាងវប្បធម៌ មកពីប្រទេសក្នុងតំបន់អាស៊ានទាំង១០ និងអាស៊ានបូកបី មានប្រទេសចិន ជប៉ុន កូរ៉េខាងត្បូង ហើយកិច្ចប្រជុំនេះមានរយៈពេលពីរថ្ងៃ គឺចាប់ពីថ្ងៃទី២៥ដល់២៦ខែមិថុនាឆ្នាំ២០១៩ ។
ថ្លែងបើកកិច្ចប្រជុំ ឯកឧត្តម ឯកឧត្តម សំរាំង កំសាន្ត បានមានប្រសាសន៍ថា៖កិច្ចប្រជុំនេះពិតជាមានសារៈសំខាន់ណាស់សម្រាប់ប្រទេសក្នុងតំបន់និងប្រទេសដៃគូសហប្រតិបត្តិការជាមួយអាស៊ាន ក្នុងការពង្រឹងនិងពង្រីកកិច្ចសហប្រតិបត្តិការ ផ្លាស់ប្តូរទស្សនៈគំនិតយោបល់គ្នាទៅវិញទៅមកពាក់ព័ន្ឋទៅនឹងវិស័យវប្បធម៌ ដើម្បីថែរក្ស អភិវឌ្ឍ និងអភិរក្សវិស័យវប្បធម៌ និងពិភាក្សាលើបញ្ហារួមដូចជាការអភិវឌ្ឍន៍ធនធានមនុស្សនៅក្នុងវិស័យវប្បធម៌ឧស្សាហកម្មធុនតូចនិងមធ្យមនិងការលើកកម្ពស់បេតិកភណ្ឌវប្បធម៌ ក្នុងប្រទេសរៀងខ្លួនក៍ដូចជាក្នុងតំបន់។
ឯកឧត្តម មានប្រសាសន៍បញ្ជាក់ថា គណៈកម្មាធិការពារវប្បធម៌អាស៊ាន (COCI) បានបង្កើតឡើងនៅខែតុលាឆ្នាំ 1978 ក្នុងគោលបំណង ដើម្បីលើកកម្ពស់កិច្ចសហប្រតិបត្តិការប្រកបដោយប្រសិទ្ធភាព ក្នុងវិស័យវប្បធ៌មនិងពត៌មានដើម្បីលើកកំពស់ការយល់ដឹងរវាងគ្នាទៅវិញទៅមកពង្រឹងចំណងសាមគ្គីភាពជាមួយប្រជាជនក្នុងតំបន់អាស៊ាន និងមានសកម្មភាពជាច្រើនទៀតដើម្បីលើកកម្ពស់ទេពកោសល្យនិងលើកកម្ពស់អន្តរកម្មក្នុងចំណោមអ្នកជំនាញអាស៊ាន រាប់បញ្ចូលទាំង អ្នកនិពន្ធ វិចិត្រករនិងអ្នកគាំទ្រប្រព័ន្ធផ្សព្វផ្សាយជាដើម។
ឯកឧត្តម បន្តថា ទំនាក់ទំនងសន្ទនាលើផែនការសកម្មភាពពាក់ព័ន្ឋជាមួយវិស័យវប្បធម៌តំបន់អាស៊ាន ជាមួយ ប្រទេសដៃគូសហប្រតិបត្តិការ មាន អាស៊ានចិន អាស៊ានកូរ៉េ និងអាស៊ានជប៉ុន បាននឹងកំពុងអនុវត្តន៍រួមគ្នាជាច្រើនឆ្នាំ ទទួលបានលទ្ឋផលប្រកបដោយផ្លែផ្កាដើម្បីបង្ហាញពីវប្បធម៌អាស៊ាននិងធ្វើឱ្យកាន់តែសម្បូរបែបនៃវប្បធម៌ចំរុះនៅក្នុងតំបន់និងក្រៅតំបន់។
លោក ហេង សុផាឌី សាកលវិទ្យាធិការស្តីទី នៃសាកលវិទ្យាល័យភូមិន្ទវិចិត្រសីល្បៈ និងជាប្រធានដឹកនាំកិច្ចប្រជុំ មានប្រសាសន៍ថា កិច្ចប្រជុំទាំងពីរនេះធ្វើឡើងដើម្បីពង្រឹងនិងពង្រីកកិច្ចសហប្រតិបត្តិការជាមួយបណ្តាប្រទេសក្នុងតំបន់អាស៊ាន ដោយផ្តោតទៅលើវិស័យវប្បធម៌ក្នុងតំបន់ ចែករំលែកចំណេះដឹងផ្សេងៗដល់គ្នាទៅវិញទៅមកពាក់ព័ន្ឋទៅនឹងវប្បធម៌ ប្រពៃណីទំនៀមទំលាប់នៃការរស់នៅរបស់ប្រជាជននៃបណ្តាប្រទេសក្នុងតំបន់អាស៊ាន និងប្រទេសដៃគូក្នុងបណ្តាញសហប្រតិបត្តិការវប្បធម៌ អាស៊ានបូក៣ មានចិន កូរ៉េ និងជប៉ុនផងដែរ ដើម្បីរកឱ្យឃើញនូវការរីកចម្រើន និងផ្លាស់ប្តូរយោបល់គ្នាទៅលើគម្រោងផ្សេងៗពាក់ព័ន្ឋទៅនឹងការអភិរក្ស និងលើកតម្លៃវប្បធម៌នៃបណ្តាប្រទេសក្នុងតំបន់និងប្រទេសដៃគូសហប្រតិបត្តិការ។
លោក ហេង សុផាឌី បន្តថា កិច្ចប្រជុំនេះធ្វើឡើងក្នុងមួយឆ្នាំម្តង ទៅតាមលំដាប់អក្ខរក្រមឈ្មោះប្រទេសក្នុងតំបន់អាស៊ាន នេះជាលើកទី៣សម្រាប់កម្ពុជាធ្វើជាម្ចាស់ផ្ទះនិងដឹកនាំកិច្ចប្រជុំ ខណៈដែលឆ្នាំក្រោយកិច្ចប្រជុំនេះគ្រោងនឹងប្រព្រឹត្តិទៅនៅកោះស៊ូម៉ាត្រាប្រទេសណ្ឌូណេស៊ីនៅអំឡុងខែកក្កដាឆ្នាំ២០២០ ៕
អត្ថបទ និង រូបភាព ៖ យូ វង្ស
កែសម្រួល ៖ អ៊ុន ណារាជ្យ
