ខេត្តសៀមរាបថ្ងៃទី២៧ខែមិថុនាឆ្នាំ២០១៩-លោក លី សំរិទ្ធ អ្នកនាំពាក្យរដ្ឋបាលខេត្តសៀមរាប បានឱ្យដឹងថា ប្រសិនជាគ្មានការប្រែប្រួលទេគម្រោងស្តារស្ទឹងសៀមរាបជំហានទី២និងចាប់ផ្តើមនៅចុងឆ្នាំ២០១៩ឬដើមឆ្នាំ២០២០ ដោយគ្រោងចំណាយថវិកាប្រមាណ៣០លានដុល្លាអាមេរិក ជាជំនួយរបស់កូរ៉េខាងត្បូង។លោកបានបញ្ជាក់ថា ចំពោះផលប៉ះពាល់រហូតមកដល់បច្ចុប្បន្ននេះអាជ្ញាធរដោះស្រាយបានចំនួន៩០%ហើយ។
លោក កង ចាន់ត្រា អនុប្រធានមន្ទីរសាធារណៈការនិងដឹកជញ្ជូនខេត្តសៀមរាប បានថ្លែងប្រាប់ដែរថា គម្រោងស្តារស្ទឹងសៀមរាបជំហាន២នេះ គឺមានប្រវែង៤គីឡូម៉ែត្រ គិតចាប់ពីស្ពានក្រវ៉ាត់ក្រុងឬស្ពានវត្តគង់ម៉ុចទៅដល់តំបន់ចុងស្រុក។ហើយគម្រោងស្តារស្ទឹងសៀមរាបនេះ គឺមានការស្តារសម្អាតច្រោះងស្ទឹង សាងសង់ស្ពានឆ្លងស្ទឹងធំៗចំនួន៣កន្លែង ស្ថាបនាផ្លូវនៅផ្នែកខាងកើតស្ទឹងមួយខ្សែ ស្ថាបនាទំនប់បង្ហៀនៅចុងស្រុក។ហើយនៅពេលគម្រោងនេះបានបញ្ចាប់ និងផ្តល់សារៈប្រយោជន៍ជាច្រើនដល់ប្រជាជន។
លោក នួន ពុទ្ធារ៉ា អភិបាលក្រុងសៀមរាប បានឱ្យដឹងដែរថា ដោយសារតែគម្រោងនេះ និងចាប់ផ្តើមនៅចុងឆ្នាំ២០១៩ឬដើមឆ្នាំ២០២០ ដូច្នេះដើម្បីដោះស្រាយបញ្ហាទឹកជំនន់នៅក្នុងរដូវវស្សានេះ អាជ្ញាធរខេត្តបានកំពុងធ្វើការកាយស្ទឹងសៀមរាបផ្នែកខ្លះ ដើម្បីឱ្យទឹកហូរបានលឿនជៀសវាងមានការស្ទះទឹកដែលអាចបណ្តាលឱ្យលិចក្រុងសៀមរាបបាន។
លោកបានបញ្ជាក់ថា សកម្មភាពកាយនេះ គឺមិនមានធ្វើអ្វីឱ្យធំដុំនោះទេគ្រាន់តែកាយឱ្យមានមុខទឹកហូរបាលឿនប៉ុណ្ណោះ ហើយសម្រាប់ការងារផ្សេងៗទុកសម្រាប់អនុវត្តនៅក្នុងគម្រោងដែលមាន។
លោក នួន ពុទ្ធារ៉ា បានបន្តថា ក្រៅពីគម្រោងស្តារស្ទឹងសៀមរាបនេះ អាជ្ញាធរក្រុងក៏មានគម្រោងស្តារប្រឡាយទឹកដែលមានស្រាប់នៅក្រុងនាពេលឆាប់ៗនេះ ដើម្បីឱ្យទឹកហូបានលឿន ក្នុងគោលបំណងធ្វើយ៉ាងណាកុំឱ្យមានទឹកលិចនៅក្នុងសៀមរាបនៅក្នុងរដូវវស្សានេះ៕
អត្ថបទ និង រូបភាព៖ ឃុត សៅ
