លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានឲ្យដឹងថា នៅចន្លោះវេលាម៉ោង១០ដល់ ម៉ោង១១ ថ្ងៃទី៣០ ខែមិថុនា ឆ្នាំ២០១៩ កុមារីម្នាក់ឈ្មោះ រ៉ម រដ្ឋនារី កើតថ្ងៃទី១៧ខែមេសា ឆ្នាំ២០១៧ បានធ្លាក់ចូលអាងក្រពើ ត្រង់ចំនុចអាងក្រពើក្រោយផ្ទះកុមារីរងគ្រោះ ភូមិពោធិ៍បន្ទាយជ័យ សង្កាត់សៀមរាប ក្រុងសៀមរាប ត្រូវក្រពើខាំហែកស៊ីសល់តែលលាដ៍ក្បាល។
លោក ណុប សារ៉ាក់ បានឲ្យដឹងទៀតថា តាមការសាកសួរឳពុកកុមារីរងគ្រោះបានប្រាប់ថា នៅវេលាម៉ោង១០ គាត់បានជិះម៉ូតូទៅក្នុងភូមិ ដោយទុកកុមារីរងគ្រោះនៅជាមួយម្តាយដែលទើបតែសម្រាលកូនរួច(សសៃខ្ចី)មើលនៅផ្ទះ រហូតដល់ម៉ោង១០ជាងបានត្រឡប់មកវិញ ហើយបានសួររកកូនស្រាប់តែបាត់រកមិនឃើញ ហើយព្យាយាមដើររកជុំវិញផ្ទះនៅតែរកមិនឃើញ ក៏ឡើងទៅមើលក្នុងទ្រុងក្រពើស្រាប់តែឃើញលលាដ៍ក្បាល១ នៅក្នុងទ្រុងក្រពើ ទើបឳពុកកុមារីរងគ្រោះដឹងថាកូនគាត់បានធ្លាក់ចូលទ្រុងក្រពើហើយត្រូវក្រពើស៊ីនៅសល់តែលលាដ៍ក្បាលតែប៉ុណ្ណោះ ៕
អត្ថបទ និង រូបថត : លោក ជា ស្រស់
កែសម្រួលអត្ថបទ : លោក លីវ សាន្ត
