នាព្រឹកថ្ងៃទី០១ ខែកក្កដា ឆ្នាំ២០១៩នេះ នៅសាលប្រជុំសាលាខេត្តសៀមរាប មានបើកកិច្ចប្រជុំមួយស្ដីពីការរៀបចំពិព័រណ៍ពាណិជ្ជកម្មមិត្តភាពកម្ពុជាឥណ្ឌូនេស៊ី នៅក្នុងក្រុងសៀមរាប ខេត្តសៀមរាប ក្រោមការដឹកនាំរបស់ឯកឧត្តម ស៊ាង ថៃ អនុរដ្ឋលេខាធិការក្រសួងពាណិជ្ជកម្ម , លោកស្រី យូ សុភា អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប និង លោក សោម កាក់ ជាមន្ត្រីរបស់ស្ថានទូតឥណ្ឌូណេស៊ី ប្រចាំព្រះរាជាណាចក្រកម្ពុជា ដោយមានការចូលរួមពីសំណាក់លោក លោកស្រី ជាថ្នាក់ដឹកនាំ និង មន្ត្រីអ្នកមុខអ្នកការនៃក្រសួងពាណិជ្ជកម្ម និង មន្ទីរអង្គភាពពាក់ព័ន្ធនានាក្នុងខេត្ត ។
ឯកឧត្តម ស៊ាង ថៃ អនុរដ្ឋលេខាធិការក្រសួងពាណិជ្ជកម្ម មានប្រសាសន៍ថា ដើម្បីចូលរួមអបអរសាទរខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និង សាធារណរដ្ឋឥណ្ឌូនេស៊ី ក្រសួងពាណិជ្ជកម្ម នៃព្រះរាជាណាចក្រកម្ពុជា នឹងរៀបចំពិព័រណ៍ពាណិជ្ជកម្មមិត្តភាពកម្ពុជាឥណ្ឌូនេស៊ី ក្នុងយុទ្ធនាការទិញផលិតផលខ្មែរឆ្នាំ២០១៩ ដែលនឹងប្រព្រឹត្តទៅចាប់ពីថ្ងៃទី១៩ ដល់ថ្ងៃទី២១ ខែកក្កដា ឆ្នាំ២០១៩ នៅសួនសាធារណៈមាត់ស្ទឹងសៀមរាប ទល់មុខព្រះរាជដំណាក់ក្រុងសៀមរាប ខេត្តសៀមរាប និង ជាលើកទីមួយ សម្រាប់ពិធីតាំងពិព័រណ៍ពាណិជ្ជកម្មមិត្តភាពកម្ពុជាឥណ្ឌូនេស៊ី ក្នុងឱកាសខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងប្រទេសកម្ពុជា និង ប្រទេសឥណ្ឌូនេស៊ី ។
ឯកឧត្តម ស៊ាង ថៃ មានប្រសាសន៍ទៀតថា ការរៀបចំពិព័រណ៍នេះឡើង ក្នុងគោលបំណងបំផុសគំនិតច្នៃប្រឌិត និង ជំរុញការលើកទឹកចិត្តដល់សិប្បករ ផលិតករ និង សេវាករកម្ពុជា ខិតខំផលិតទំនិញ និង សេវាកម្មថ្មីៗ ប្លែកៗ សម្រាប់បម្រើទីផ្សារទាំងក្នុង និង ក្រៅប្រទេស ជាពិសេសជួយលើកកម្ពស់ការធ្វើធុរកិច្ច លើវិស័យវត្ថុអនុស្សាវរីយ៍ ផលិតផលកែច្នៃពីសូត្រខ្មែរ សម្ភារផ្ទះបាយ ផលិតផលសិប្បកម្ម ម្ហូបអាហារ និង ភេសជ្ជៈ សេវាបោះពុម្ភ និង ផ្សព្វផ្សាយ ក្នុងការស្វែងរកដៃគូពាណិជ្ជកម្ម និង ពង្រីកទីផ្សារ ហើយនាឱកាសនេះ ធុរជននឹងបានស្វែងយល់បទពិសោធន៍លើការកែច្នៃ ការវេចខ្ចប់ ការដាក់ស្លាកសញ្ញាលើផលិតផលរបស់ខ្លួន អនុលោមតាមលក្ខខណ្ឌតម្រូវរបស់ទីផ្សារ ខណៈមកដល់បច្ចុប្បន្ននេះ យើងទទួលបានស្តង់ចំនួន១០០ស្តង់ សម្រាប់សម្រាប់ពិធីតាំងពិព័រណ៍ពាណិជ្ជកម្មមិត្តភាពកម្ពុជាឥណ្ឌូនេស៊ី នេះ ។
លោក សោម កាក់ ជាមន្ត្រីរបស់ស្ថានទូតឥណ្ឌូណេស៊ី មានប្រសាសន៍ថា ខេត្តសៀមរាប ជាគោលដៅនៃភ្ញៀវទេសចរលើពិភពលោកចូលមកទស្សនា ហើយក៏ជាខេត្តស្ថិតនៅក្នុងបេះដូងរបស់ប្រជាពលរដ្ឋឥណ្ឌូនេស៊ីផងដែរ ខណៈដែលកិច្ចការទំនាក់ទំនងសហប្រតិបត្តិការរវាងកម្ពុជា ឥណ្ឌូនេស៊ី គឺមានពីយូលង់មកហើយ គឺក្នុងសតវត្សទី៨ ទី៩មកម្លេះ ដែលកម្ពុជាមានទំនាក់ទំនងល្អ តាមរយៈវិស័យពាណិជ្ជកម្ម , ទេសចរណ៍ និង វប្បធម៌ ហើយតាមរយៈនៃការតាំងពិព័រណ៍នេះដែរនឹងជំរុញនៃកិច្ចទំនាក់ទំនងសហប្រតិបត្តិការកម្ពុជា-ឥណ្ឌូនេស៊ី ឲ្យកានតែដំណើរការរីកចម្រើនបន្តទៀតផងដែរ ។
លោកស្រី យូ សុភា អភិបាលរងខេត្តសៀមរាប មានប្រសាសន៍ថា ក្នុងនាមឯកឧត្ដម ទៀ សីហា អភិបាលខេត្តសៀមរាប សូមគាំទ្រទាំងស្រុងចំពោះការរៀបចំពិព័រណ៍ពាណិជ្ជកម្មមិត្តភាពកម្ពុជាឥណ្ឌូនេស៊ី ក្នុងយុទ្ធនាការទិញផលិតផលខ្មែរឆ្នាំ២០១៩ ដែលនឹងប្រព្រឹត្តទៅចាប់ពីថ្ងៃទី១៩ ដល់ថ្ងៃទី២១ ខែកក្កដា ឆ្នាំ២០១៩ នៅសួនសាធារណៈមាត់ស្ទឹងសៀមរាប ទល់មុខព្រះរាជដំណាក់ក្រុងសៀមរាប ពីព្រោះវាជាឱកាសមួយដ៏ល្អប្រសើរណាស់ សម្រាប់សិប្បករ ផលិតករ និង សេវាករក្នុងខេត្តសៀមរាប បានស្វែងយល់បទពិសោធន៍លើការកែច្នៃ ការវេចខ្ចប់ ការដាក់ស្លាកសញ្ញាលើផលិតផលរបស់ខ្លួន អនុលោមតាមលក្ខខណ្ឌតម្រូវរបស់ទីផ្សារ ។
លោកស្រី យូ សុភា មានប្រសាសន៍ទៀតថា អាជ្ញាធរខេត្តសៀមរាប បានត្រៀមលក្ខណៈរួចហើយសម្រាប់ការចូលរួមសហការជាមួយក្រសួងពាណិជ្ជកម្ម និង ស្ថានទូតឥណ្ឌូណេស៊ី ប្រចាំព្រះរាជាណាចក្រកម្ពុជា ដើម្បីធ្វើឲ្យការរៀបចំពិព័រណ៍ពាណិជ្ជកម្មមិត្តភាពកម្ពុជាឥណ្ឌូនេស៊ីនៅខេត្តសៀមរាបនេះ ទទួលបានលទ្ធផលល្អប្រសើរ ដូចជា បញ្ហាសន្តិសុខ បញ្ហាសណ្ដាប់ធ្នាប់សាធារណៈ បញ្ហាអនាម័យបរិស្ថាន និង ការជួយថែទាំសុខភាពទូទៅ ដោយដាក់ប្រចាំការនូវសេវាសុខាភិបាលសម្រាប់សង្គ្រោះបឋម ៕
អត្ថបទ ៖ លោក លីវ សាន្ត
រូបថត ៖ លោក ស៊ាន សុផាត
