ឯកឧត្តម ទៀ សីហា អភិបាលខេត្តសៀមរាប បានផ្អាកការដ្ឋានស្ដារស្ទឹងសៀមរាប របស់ក្រុមហ៊ុនរាជសី ភ្លាមៗ បន្ទាប់ពីរកឃើញថាក្រុមហ៊ុននេះ បានអនុវត្តន៍ខុសបច្ចេកទេស ផ្ទុយទៅនឹងគម្រោងដែលផ្ដល់ដោយ មន្ទីរសេដ្ឋកិច្ច និង ហិរញ្ញវត្ថុខេត្តសៀមរាប។
មានវត្តមានដោយផ្ទាល់នៅការដ្ឋាននោះ នាថ្ងៃទី៣០ ខែមិថុនា ឆ្នាំ២០១៩ ឯកឧត្តម ទៀ សីហា បានមានប្រសាសន៍ថា គម្រោងស្ដារស្ទឹងសៀមរាបជំហានទី២នេះ នឹងត្រូវចាប់ផ្តើមនៅចុងឆ្នាំ២០១៩ ឬដើមឆ្នាំ២០២០ ដោយទីភ្នាក់ងារសហប្រតិបត្តការអន្តរជាតិកូរ៉េ ហៅកាត់ កយកា (KOICA) ប៉ុន្តែចំពោះគម្រោងដែលក្រុមហ៊ុន រាជសី បានកំពុងអនុវត្តនេះ រដ្ឋបាលខេត្តសៀមរាបពុំបានដឹង ឬអនុញ្ញាតឡើយ។ មួយវិញទៀត ការជីកកកាយដីតាមមាត់ស្ទឹង ដោយក្រុមហ៊ុននេះ តាមការពិនិត្យឃើញថា ពុំមានឯកសារ ពាក់ព័ន្ធនឹងគម្រោងប្លង់ ក្នុងការស្តារស្ទឹងនោះឡើយ ដែលនេះជាសកម្មភាព ជីកដីធ្វើអាជីវកម្មសុទ្ធសាធ លើសពីនោះវាបានបំផ្លាញដើមឈើ ដែលមានសារៈប្រយោជន៍ ក្នុងការទប់ស្កាត់លំហូរទឹក ដែលបណ្ដាលឲ្យច្រោះដីមាត់ច្រាំងស្ទឹង និង ទប់នូវចរន្តទឹកហូរនារដូវវស្សាទៀតផង។
តាមការបញ្ជាក់របស់លោក ម៉ៃ សាម៉េត ចៅសង្កាត់សៀមរាប បានឲ្យដឹងថា បើតាមគម្រោងស្តារស្ទឹងសៀមរាបនេះ គឺជាជំហានទី២ ប៉ុន្តែលោកសង្កេតឃើញថា មានភាពមិនប្រក្រតី ខុសពីគម្រោងរបស់ កយកា (KOICA) ដោយក្រុមហ៊ុនរាជសីនេះ បានជីកយកដីពីមាត់ស្ទឹង យកទៅដាក់ទីកន្លែងផ្សេងពីមាត់ស្ទឹង ឬ អាចថាយកទៅលក់ឲ្យដីឡូត៌មួយកន្លែង ដើម្បីធ្វើផ្ទះល្វែង ។ ដោយបញ្ហាទាំងនេះហើយ ទើបសាលាសង្កាត់ធ្វើសេចក្តីរាយការណ៍ទៅសាលាក្រុង ដើម្បីមានវិធានការក្នុងការទប់ស្កាត់សកម្មភាពនេះ ។
តាមការបញ្ជាក់របស់មន្ត្រីសាលាក្រុងម្នាក់ សុំមិនបញ្ចេញឈ្មោះ បានឲ្យដឹងថា សកម្មភាពការកាយស្តារស្ទឹងនេះ គឺជាគម្រោងរបស់ មន្ទីរសេដ្ឋកិច្ច និង ហិរញ្ញវត្ថុខេត្តសៀមរាប ដើម្បីបើកមុខទឹក សម្រាប់បញ្ចៀសទឹកជំនន់នៅក្នុងរដូវវស្សាតែប៉ុណ្ណោះ មិនមែនទទួលគម្រោងប្លង់ ក្នុងការស្តារស្ទឹងសៀមរាប បន្តពី កយកា (KOICA)ឡើយ ។
លោក គឹម ប៉ុណ្ណា ប្រធានមន្ទីរសាធារណៈការ និងដឹកជញ្ជូនខេត្តសៀមរាប បានបញ្ជាក់បន្ថែមថា គម្រោងស្តារស្ទឹងសៀមរាបជំហាន២នេះ គឺមានប្រវែង៤គីឡូម៉ែត្រ គិតចាប់ពីស្ពានក្រវ៉ាត់ក្រុង ឬស្ពានវត្ត គង់ ម៉ុច ទៅដល់តំបន់ចុងស្រុក ។ គម្រោងស្តារស្ទឹងនេះ រួមមានការស្តារសម្អាតច្រាំងស្ទឹង សាងសង់ស្ពានធំៗ សម្រាប់ឆ្លងស្ទឹងចំនួន៣កន្លែង ស្ថាបនាផ្លូវនៅផ្នែកខាងកើតស្ទឹងមួយខ្សែ និងការស្ថាបនាទំនប់បង្ហៀរនៅចុងស្រុក ។ លោកបានអះអាងថា នៅពេលគម្រោងនេះបានបញ្ចប់ វានឹងផ្តល់សារៈប្រយោជន៍ជាច្រើនដល់ប្រជាពលរដ្ឋក្នុងក្រុងសៀមរាប ក៏ដូចជាខេត្តទាំងមូល។
ជាប្រសាសន៍របស់ឯកអភិបាលខេត្ត បានដាក់បទបញ្ជាឲ្យ ក្រុមហ៊ុន រាជសី ធ្វើការចាក់ដីរៀបចំតាមមាត់ ច្រាំងស្ទឹងឡើងវិញ ឲ្យមានសភាពដូចទៅនឹងគម្រោងរបស់ កយកា (KOICA) ដែលបានកំណត់ ដូចក្នុងគ្រោង ដែលអាជ្ញាធរខេត្តបានអនុញ្ញាតរួចរាល់ហើយនោះ។
លើសពីនោះ មន្ទីរជំនាញមានការពាក់ព័ន្ធ ត្រូវរួមសហការគ្នា ក្នុងការអនុវត្តគម្រោងនេះ ព្រមទាំងត្រូវធ្វើការរក្សាទុកនូវគ្រឿងចក្ររបស់ក្រុមហ៊ុន ដើម្បីធ្វើការដោះស្រាយបន្ត និង រកឲ្យឃើញពីប្រភព ដែលអនុញ្ញាតឲ្យដាក់គ្រឿងចក្រទាំងនេះ។
សូមរំលឹកថា គម្រោងស្ដារស្ទឹងសៀមរាប ដើម្បីរៀបចំកែលំអតាមមាត់ស្ទឹងសៀមរាប ដែលជាប្រាក់កម្ចី របស់រដ្ឋាភិបាលកម្ពុជា ពីសាធារណរដ្ឋកូរ៉េ ដែលជំហានទី១នេះដែរ បានចាប់ផ្ដើមនៅថ្ងៃទី២០ ខែកុម្ភ: ឆ្នាំ២០១២ ហើយចាប់ពីចំណុចតំបន់ស្ពាននាគ ទៅដល់ស្ពានក្រវ៉ាត់ក្រុង ឬស្ពាន វត្ត គង់ ម៉ុច ក្នុងក្រុងសៀមរាប។
រូបភាព៖facebook រដ្ឋបាលខេត្តសៀមរាប/Siem Reap Provincial Hall
