នៅព្រឹកថ្ងៃទី២៧ ខែមិថុនា ឆ្នាំ២០១៩ម្សិលមិញនេះ គណះបញ្ជាការឯកភាពរដ្ឋបាលស្រុកពួក ដឹកនាំដោយលោក ស៊ិន ចាន់ថុល អនុប្រធានគណៈបញ្ជាការឯកភាពរដ្ឋបាលស្រុក និង មានការចូលរួមពី ខណ្ឌរដ្ឋបាលជលផល ផ្នែករដ្ឋបាលជលផលស្រុកក្រឡាញ់ ស្រីស្នំ អង្គរជុំ សូទ្រនិគម និង សហគមន៍នេសាទល្វា រួមទាំងកម្លាំងប៉ុស្តិ៍នគរបាលរដ្ឋបាលល្វា បានចុះធ្វើការឃាត់ត្រាក់ទ័រដែលកំពុងធ្វើសកម្មភាពឈូសឆាយដីព្រៃលិចទឹកតំបន់៣ ក្នុងដែននេសាទឃុំល្វា ស្រុកពួក ខេត្តសៀមរាប ។
តាមការបញ្ជាក់របស់លោក ស៊ិន ចាន់ថុល អនុប្រធានគណៈបញ្ជាការឯកភាពរដ្ឋបាលស្រុក និង ជាអភិបាលស្តីទីស្រុកពួក តាម រយៈទូរស័ព្ទដៃ បានឲ្យដឹងថា ក្នុងពេលកន្លងមក អាជ្ញាធរស្រុក ក៏បានបើកប្រតិបត្តិការ ក្នុងការទប់ស្កាត់ និងបង្ក្រាបបទល្មើស ការឈួស ឆាយ ភ្ជួររាស់រានដីព្រៃលិចទឹក នៅក្នុងតំបន់បី ក៏ត្រូវរងការរឹះគន់ពីបណ្តាញប្រព័ន្ធសារព័ត៌មានសង្គម ដោយបានចោទប្រកាន់ដល់ កម្លាំងចម្រុះស្រុកថា មានការជម្រិតទារប្រាក់ពីម្ចាស់ត្រាក់ទ័រ ដែលជាអ្នកស៊ីឈ្នួលភ្ជួរដីឲ្យគេ ។
លោកក៏បានឲ្យដឹងទៀតថា ក្នុងកិច្ច ប្រតិបត្តិការពេលនេះ ក៏មានបណ្តាញអ្នកសារព័ត៌មានមួយចំនួន ក៏បានទៅជួយអន្តរាគមន៍ ចំពោះការឃាត់ត្រាក់ទ័រ ដែលបានធ្វើសកម្ម ភាពផ្ទាល់នៅក្នុងតំបន់ព្រៃលិចទឹក ទាំងពីរគ្រឿងនេះផងដែរ ។
ក្នុងប្រតិបត្តិការណ៍នេះដែរ គណៈបញ្ជាការឯកភាពរដ្ឋបាលស្រុក បានដកហូតត្រាក់ទ័រ ចំនួនពីរគ្រឿង ម៉ាកគូបូតា (KUBOTA.M6040S.U) ពណ៌ក្រហម នៅតំបន់វាលខ្សាច់ស្ថិតក្នុងភូមិស្ទឹងព្រះស្រុកឃុំល្វា ស្រុកពួកខេត្តសៀមរាប និងបានឃាត់អ្នកបើកបរចំនួនពីរនាក់ ក្នុងនោះទី១.ឈ្មោះ សឿម សាវន់ ភេទប្រុសអាយុ២៦ឆ្នាំ, ទី២.ឈ្មោះ វ៉ន រិទ្ធិ ភេទប្រុសអាយុ៣៣ឆ្នាំ អ្នកទាំងពីរ មានទីលំនៅភូមិស្ទឹងព្រះស្រុក ឃុំល្វា ស្រុកពួក ខេត្តសៀមរាប ដែលកំពុងធ្វើសកម្មភាពភ្ជួរដីប្រមាណ ២៥ហិចតា ស្ថិតនៅក្នុងតំបន់៣ របស់អាជ្ញាធរបឹងទន្លេសាប ។
បច្ចុប្បន្ននេះករណីនេះ ត្រូវបានខ័ណ្ឌរដ្ឋបាលជលផល កសាងសំណុំរឿង និង មនុស្ស២នាក់ បញ្ជូនទៅសាលាដំបងខេត្តសៀមរាបដើម្បីដោះស្រាយទៅតាមនីតិវិធីនៃច្បាប់ ចំពោះត្រាក់ទ័រ២គ្រឿង ត្រូវបានរក្សាទុកបណ្តោះអាសន្ននៅប៉ុស្តិ៍នគរបាលរដ្ឋបាលល្វារងចាំដោះស្រាយនៅពេលក្រោយ ៕
អត្ថបទ និង រូបភាព ៖ ម៉ី សុខារិទ្ធ
កែសម្រួល ៖ អ៊ុន ណារាជ្យ
