នៅព្រឹកថ្ងៃទី០២ ខែកក្ដដា ឆ្នាំ២០១៩ ដោយមានសំណូមពរ ពីបងប្អូនប្រជាពលរដ្ឋដែលរស់នៅក្នុងភូមិតាវៀនចំនួន ៣០០គ្រួសារ និង តាមការស្នើសុំរបស់សាលាសង្កាត់សាលាកំរើក កម្លាំងគណៈបញ្ជាការឯកភាពរដ្ឋបាលក្រុង ក្រោមការដឹកនាំរបស់លោក នួន ពុទ្ធារ៉ា អភិបាលក្រុងសៀមរាប បានដឹកនាំក្រុមការងារ ចុះអនុវត្តរុះរើរបងដែលបានសាងសង់រំលោភដីចំណីដងផ្លូវសាធារណៈ ស្ថិតក្នុងភូមិតាវៀនសង្កាត់សាលាកំរើក ក្រុង ខេត្តសៀមរាប ដែលធ្វើឲ្យប៉ះពាល់ប្រយោជន៍រួមរបស់បងប្អូនប្រជាពលរដ្ឋសម្រាប់ធ្វើដំណើរឆ្លងកាត់ជាសាធារណៈ។
ក្នុងប្រតិបត្តិការណ៍នេះដែរ ក្រុមការងារបានរុះរើ និងធ្វើការវាយរបងដែលបានរំលោភលើដីចំណីផ្លូវ បានចំនួនពីរខ្សែ ខ្សែទីមួយត្រូវពង្រីកទំហំ ៦ម៉ែត្រ មួយខ្សែទៀតតភ្ជាប់ពីផ្លូវ៦ម៉ែត្រមកពេទ្យនាគទេពកែងផ្លូវផ្សារលើត្រូវពង្រីក ៣ម៉ែត្រ ហើយការពង្រីកផ្លូវនេះ គឺអោយស្របទៅតាមជើងម៉ែត្រដែលគណៈកម្មការដ្ឋបាលបានសម្រេច ដើម្បីបម្រើជាផលប្រយោជន៍រួមរបស់ជាសាធរណៈ។
ក្នុងនោះដែរ អាជ្ញាធរខេត្តក៏សូមអំពាវនាវដល់បងប្អូនប្រជាពលរដ្ឋទាំងអស់ មុននឹងធ្វើរបងផ្ទះ ឬសាងសង់អ្វីមួយត្រូវសុំច្បាប់អនុញ្ញាតពីអាជ្ញាធរពាក់ព័ន្ធជាមុន ជៀសវាងមានការសាងសង់ខុសបច្ចេកទេ ដែលធ្វើប៉ះពាល់ដល់សម្បត្តិសាធារណៈ និងអាចធ្វើអោយខាតបង់នូវប្រយោជន៍រួមរបស់បងប្អូន ៕
អត្តបទនិងរូបភាព៖facebookរដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
