ក្នុងឱកាសរុក្ខទិវាថ្នាក់ខេត្តឆ្នាំ២០១៩នេះ មន្ទីរកសិកម្មរុក្ខប្រមាញ់និងនេសាទខេត្តសៀមរាប បានត្រៀមកូនឈើចម្រុះប្រមាណជា២២០០ដើម មានប្រភេទកូនឈើក្រញូង ឈើទាលកូនឈើគគីរនឹងនាំគ្នាដាំលើផ្ទៃដីប្រមាណជាង២ហិកតា ។
លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់និងនេសាទខេត្ត មានប្រសាសន៍ឱ្យដឹងថា កន្លងមកយើងបានបំរុងដីនៅទីតាំងនេះសម្រាប់ជា សួនអនុស្សាវរីយ៍អាពាហ៍ពិពាហ៍ដាំកូនឈើ តែដោយសារទីតាំងនេះនៅឆ្ងាយពុំមានអ្នកមកដាំ និងដោយមិនចង់ទុកដីទំនេរយូរទើបសម្រេច យកឱកាសរុក្ខទិវាឆ្នាំ២០១៩ មកដាំកូនឈើនៅទីតាំងនេះ ដើម្បីកុំឱ្យដីនៅសល់ទំនេរ និងបញ្ចៀសបានពីការទន្ទ្រានឬវាតយកដីពីក្រុមជនខិលខូចមួយចំនួនផងដែរ។
លោក ទា គឹមសុទ្ឋ បញ្ជាក់ថា ទោះបីថាសួនអនុស្សាវរីយ៍មិនមានដំណើរការ តែយើងបានរៀបចំបង្កើតសួនអនុស្សាវរីយ៍ ទេសចរណ៍ម្នាក់ ដើមឈើមួយដើម នៅក្នុងចំការពូជឈើក្រញូងនៅកន្តួតខ្នារក្រៅ ដោយមានការអញ្ជើញចូលរួមដាំជាអនុស្សាវរីយ៍ពីសំណាក់ប្រមុខថ្នាក់ដឹកនាំជាន់ខ្ពស់ក្នុងជួររាជរដ្ឋាភិបាល និង ថ្នាក់ដឹកនាំក្រសួង ស្ថាប័ន អង្គភាព ថ្នាក់ជាតិ ថ្នាក់ខេត្ត អ្នកទេសចរណ៍ អង្គការសង្គមស៊ីវិល វិនិយោគិនជាតិនិងអន្តរជាតិ បានចូលរួមដាំជាបន្តបន្ទាប់ទៀតផង។
លោក ទា គឹមសុទ្ឋ បន្តថា៖ការដាំកូនឈើសម្រាប់រុក្ខទិវាថ្នាក់ខេត្តឆ្នាំនេះ គឺយើងប្រើប្រាស់ថវិការដ្ឋ ចំពោះការដាំជាលក្ខណៈចំការឆ្នាំនេះគឺយើងពុំមានថវិកាសម្រាប់ចំណាយក្នុងការដាំនោះទេ ប៉ុន្តែយើងបានបែងចែកកូនឈើចំនួន១៥០០០ដើមជូនទៅប្រជាពលរដ្ឋនិងមន្ត្រីរាជការមួយចំនួនក្នុងខេត្តយកទៅដាំ និងត្រៀម១០០០០ដើមទៀតសម្រាប់ចែកជូនដល់មន្ទីរបរិស្ថានខេត្តសម្រាប់យកទៅដាំនៅលើខ្នងភ្នំគូលែន។
លោកប្រធានមន្ទីរ បានបញ្ជាក់ទៀតថា ដោយអនុវត្តតាមគោលនយោបាយកំណែទម្រង់ព្រៃឈើរបស់រាជរដ្ឋាភិបាលកម្ពុជា ក្រោមកិច្ចដឹកនាំរបស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លើការគ្រប់គ្រងអភិរក្សធនធានព្រៃឈើ សំដៅធានាឲ្យបាននូវការអភិវឌ្ឍសេដ្ឋកិច្ចសង្គម និង បរិស្ថាន សម្រាប់មនុស្សជំនាន់បច្ចុប្បន្ន ក៏ដូចទៅថ្ងៃអនាគត ជាលទ្ធផលមន្ត្រីរដ្ឋបាលព្រៃឈើ បានអនុវត្តទៅតាមច្បាប់ស្តីពីព្រៃឈើ និង ការងារគ្រប់គ្រង អភិរក្ស អភិវឌ្ឍន៍ វិស័យព្រៃឈើ ក្នុងឆមាសទី១ ឆ្នាំ២០១៩ ដោយទប់ស្កាត់ការកាប់ទន្ទ្រានដីព្រៃឈើ និង បង្ក្រាបបទល្មើសការដឹកជញ្ជូនឈើខុសច្បាប់ជាដើមទទួលបានលទ្ឋផលជាវិជ្ជមាន ។ គោលដៅយូរអង្វែងរបស់ប្រទេសជាតិយើង គឺការអភិរក្ស និងការគ្រប់គ្រងធនធានធម្មជាតិ ជីវចំរុះ និងប្រព័ន្ធអេកូឡូស៊ីប្រកបដោយប្រសិទ្ធភាព ដើម្បីរួមចំណែកក្នុងការកាត់បន្ថយភាពក្រីក្ររបស់ប្រជាជន និងការអភិវឌ្ឍន៍សេដ្ឋកិច្ចសង្គមឱ្យបានប្រសើរឡើង និង ប្រែក្លាយមូលដ្ឋានក្នុងតំបន់នេះឲ្យមានទេសភាពល្អ ប្រកប ដោយគម្របពណ៌បៃតង កាន់តែស្រស់ត្រកាលឡើង ។
សូមបញ្ជាក់ថា សម្រាប់រុក្ខទិវាថ្នាក់ខេត្តសៀមរាបឆ្នាំ២០១៩នេះ គឺនឹងប្រព្រឹត្តិទៅនៅថ្ងៃទី៣ ខែកក្កដា ឆ្នាំ២០១៩ ស្ថិតនៅភូមិស្នាតេជោ ឃុំបល័ង្គ ស្រុកប្រាសាទបាគងខេត្តសៀមរាប ៕
អត្ថបទ និង រូបភាព ៖ យូ វង្ស
កែសម្រួល៖ អ៊ុន ណារាជ្យ
