នារសៀលថ្ងៃទី ០១ ខែ កក្កដា ឆ្នាំ២០១៩នេះ លោក អ៊ឹង សុភ័ណ នាយកទីចាត់ការអន្តរវិស័យ សាលាខេត្តសៀមរាប បានមានប្រសាសន៍ថា សុំឱ្យអាជ្ញាធរក្រុង ស្រុកទាំង១២ ចុះរុះរើស្លាកយីហោ ប៉ាណូ ផ្សព្វផ្សាយពាណិជ្ជកម្ម ដែលគ្មានច្បាប់ ឬអស់សុពលភាព នៅលើចិញ្ចើមផ្លូវសាធារណៈ ដើម្បីរៀបចំសោភ័ណភាព និងប្រមូលចំណូលបន្ថែមអភិវឌ្ឈន៍មូលដ្ឋានរបស់ខ្លួន។
លោក អ៊ឹង សុភ័ណ បានឱ្យដឹងថា អាជ្ញាធរក្រុង ស្រុក ត្រូវបន្តផ្សព្វផ្សាយដល់ប្រជាពលរដ្ឋក្នុងមូលដ្ឋានរបស់ខ្លួន មុនដំឡើងស្លាកសញ្ញា ស្លាកយីហោ ប៉ាណូ ផ្សព្វផ្សាយពាណិជ្ជកម្ម ត្រូវសុំច្បាប់អនុញ្ញាត ដោយទំហំក្រោម៤ម៉ែត្រការ៉េ ជាការផ្តល់សេវាដោយរដ្ឋបាលក្រុង ស្រុក និងទំហំលើសពី៤ម៉ែត្រការ៉េ ត្រូវសុំនៅអង្គភាពច្រកចេញចូលតែមួយរបស់រដ្ឋបាលខេត្តសៀមរាប ។
ព័ត៌មានជាតិ ថ្មីៗ
លោក អ៊ឹង សុភ័ណ បន្តថា រដ្ឋបាលក្រុងស្រុក ត្រូវត្រួតពិនិត្យឱ្យបានច្បាស់លាស់មុនចេញច្បាប់អនុញ្ញាតដំឡើងផ្ទាំងផ្សព្វផ្សាយផ្សេងៗដូចជា ការប្រើប្រាស់ពាក្យពេចន៍ អក្ខរាវិរុទ្ធ ទំហំនៃអក្ខរាវិរុទ្ធ ការប្រើប្រាស់ភាសាបរទេស ដែលមាននៅលើផ្ទាំងយីហោ ផ្ទាំងពាណិជ្ជកម្ម ផ្ទាំងសញ្ញា និងទីតាំងជាដើម ។
គួរំលឹកថា យុទ្ធនាការ ចុះរុះរើស្លាកយីហោ ប៉ាណូ ផ្សព្វផ្សាយពាណិជ្ជកម្ម ដែលគ្មានច្បាប់ ឬអស់សុពលភាព ដឹកនាំដោយលោក នាក់ ណេរ៉ុន អភិបាលរងខេត្តសៀមរាប ហើយយុទ្ធនាការនេះ ចាប់ផ្តើមតាំងពីថ្ងៃទី ០៣ ខែ មិថុនា ដល់ថ្ងៃទី ០១ ខែ កក្កដា ឆ្នាំ២០១៩នេះ ក្រុមការងារចម្រុះ បានចុះរុះរើ និងធ្វើកិច្ចសន្យា ឱ្យប្រជាពលរដ្ឋ និងក្រុមហ៊ុននានា កាត់ស្លាកសញ្ញា ស្លាកយីហោ ប៉ាណូ ផ្សព្វផ្សាយពាណិជ្ជកម្មដែលគ្មានច្បាប់អនុញ្ញាតបានចំនួន ៣១៣ ផ្ទាំង ។
ជាមួយគ្នានេះ កន្លងមកលោក នាក់ ណេរ៉ុន បានអំពាវនាវឲ្យប្រជាពលរដ្ឋ ឬក្រុមហ៊ុនឯកជន ដែលមានស្លាកយីហោ ប៉ាណូផ្សព្វផ្សាយពាណិជ្ជកម្ម ត្រូវចូលរួមសហការជាមួយក្រុមការងារចម្រុះរបស់រដ្ឋបាលខេត្ត និងមន្ទីរអង្គភាពព័ន្ធពាក់ ដើម្បីអនុវត្តការងារឱ្យមានប្រសិទ្ធភាព ហើយបើសិនជាមានចម្ងល់ ពាក់ព័ន្ធជាមួយនឹងការសុំច្បាប់ ដើម្បីដំឡើង ស្លាកយីហោប៉ាណូ ផ្សព្វផ្សាយពាណិជ្ជកម្មផ្សេងៗ ត្រូវទំនាក់ទំនងសួរព័ត៌មានជាមួយអាជ្ញាធរ ឃុំ សង្កាត់ ក្រុង ស្រុក ឬមករដ្ឋបាលខេត្ត ៕
អត្ថបទ និង រូបភាព ៖ បុង ឆវ័ន , វ៉ាន់ លីហួង
