បន្ទាប់ពីទទួលបានដំណឹងដ៏សែនក្តុកក្តួលថា កុមារី រ៉ម រដ្ឋនារី អាយុ ០២ឆ្នាំ បានទទួលមរណភាព ក្នុងឧបទ្ទវហេតុដ៏អកុសល កាលពីវេលាម៉ោងប្រមាណ១១៖០០នាទី នៅថ្ងៃទី៣០ ខែមិថុនា ឆ្នាំ២០១៩ ត្រូវនឹងថ្ងៃអាទិត្យ ១៣រោច ខែជេស្ឋ ឆ្នាំកុរ ឯកស័ក ព.ស.២៥៦៣ នៅភូមិពោធិ៍ សង្កាត់សៀមរាប ក្រុងសៀមរាប ខេត្តសៀមរាប។ នាល្ងាចថ្ងៃទី៣០ ខែមិថុនា ឆ្នាំ២០១៩នេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានចាត់លោក សុខ ថុល នាយករដ្ឋបាលសាលាខេត្ត នាំយកថវិការបស់ ឯកឧត្តម អភិបាលខេត្ត អភិបាលរងខេត្ត ប្រធានមន្ទីរ និងការចូលរួមផ្ទាល់របស់ លោក នួន ពុទ្ធារ៉ា អភិបាលក្រុងសៀមរាប និងថវិការបស់អនុសាខាកាកបាទក្រហមក្រុងសៀមរាប សរុបរួម ៤ ៨២០ ០០០រៀល ដើម្បីចូលរួមបុណ្យសព។
ក្នុងនោះដែរ លោក សុខ ថុល ក៏បានពាំនាំនូវការរំលែកទុក្ខ របស់ ឯកឧត្តម អភិបាលខេត្ត ដោយមានការសោកស្តាយយ៉ាងខ្លាំងចំពោះការកើតឧបទ្ទវហេតុនេះឡើង ក្នុងបរិយាកាសដ៏សែនក្តុកក្តួលនេះ។
លោក សុខ ថុល បន្តថា រដ្ឋបាលខេត្តសៀមរាប និងមន្ត្រីក្រោមឱវ៉ាទ ក៏សូមសម្តែងនូវការសោកស្តាយអាឡោះអាល័យជាអនេក និងសូមចូលរួមរំលែកទុក្ខដ៏សែនក្រៀមក្រំនេះជាមួយលោក រ៉ម រដ្ឋ និងលោកស្រី នល់ សុលី ដែលត្រូវជាមាតា បិតា របស់កុមារី ៕
ព័ត៌មានជាតិ ថ្មីៗ
អត្ថបទ និង រូបភាព ៖ អ៊ិន សីហរិទ្ធ
កែសម្រួល៖ អ៊ុន ណារាជ្យ
