សមត្ថកិច្ចនគរបាលខេត្តសៀមរាប បានឲ្យដឹងថា កាលពីវេលាម៉ោង៧និង៣០នាទីយប់ ថ្ងៃទី២៨ ខែមិថុនា ឆ្នាំ២០១៩ មានករណីអំពើហិង្សាដោយចេតនាមានស្ថានទម្ងន់ទោស ដោយឪពុកបង្កើតបានបោកកូនខ្លួនឯង នឹងសសរផ្ទះបាយបណ្តាលឲ្យរងរបួសធ្ងន់ដោយសន្លប់បាត់ស្មារតី ហើយបញ្ជូនទៅសង្គ្រោះបន្ទាន់នៅមន្ទីរពេទ្យកុមារ ប៉ុន្តែជនរងគ្រោះបានស្លាប់នៅវេលាម៉ោង១០និង៤០នាទីយប់ ថ្ងៃ២៨ ខែមិថុនា ឆ្នាំ២០១៩ ។
សមត្ថកិច្ច បានឲ្យដឹងទៀតថា ករណីនេះគឺ ឈ្មោះ ផ្លាយ វិភាត់ ភេទប្រុស អាយុ៣១ឆ្នាំ រស់នៅភូមិតាប្រាក់ ឃុំមានជ័យ ស្រុកប្រាសាទបាគង បានឈ្លោះប្រកែកគ្នាជាមួយប្រពន្ធឈ្មោះ សោម សុខុម អាយុ២៨ឆ្នាំ រឿងទិញបន្លែមិនល្អយកមកធ្វើម្ហូប ហើយឈ្លោះគ្នាមួយពីរ ៗ នៅពេលនោះប្រពន្ធដើរទៅយកទឹក រីឯប្តី បានចាប់លើកកូនឈ្មោះ ផាង ផល្លា ភេទប្រុស អាយុ១ឆ្នាំ២ខែ យកទៅបោកនឹងសសរផ្ទះបាយបណ្តាលឲ្យកូនសន្លប់មិនដឹងខ្លួន ហើយថែមទាំងយកកាំបិតរកកាប់កូនទៀត ប៉ុន្តែបានបងប្អូនស្រែកឃាត់ទើបគេឈប់ ហើយរត់គេចខ្លួនបាត់ ក្រោយមកបងប្អូនយកជនរងគ្រោះទៅសង្គ្រោះបន្ទាន់មន្ទីរពេទ្យកុមារ ។
ករណីនេះ សមត្ថកិច្ចនគរបាលខេត្តសៀមរាបកំពុងស្វែងរកចាប់ខ្លួនជនសង្ស័យខាងលើមកផ្តន្ទាទោសតាមច្បាប់ ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ត
