ក្រុមហ៊ុនអង្គរអាយ ខេមភេនី លីមិតធីត (Angkor Eye Company Limited) បាននាំចូលកន្ត្រកវិលពីប្រទេសជប៉ុនដែលមានកំពស់៨៥ម៉ែត្រ មាន៤៨កន្ត្រក និងអាចផ្ទុកមនុស្សបាន១៩២នាក់ក្នុងពេលតែមួយ មានដាក់នៅក្នុងខេត្តសៀមរាប ដែលមានទីតាំងនៅខាងកើតភូមិវប្បធម៌កម្ពុជា ដោយចាប់បើកការដ្ឋានសាងសង់ កាលពីព្រឹក ថ្ងៃទី៣០ ខែមិថុនា ឆ្នាំ២០១៩នេះ ក្រោមអធិបតីភាព ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ។
លោក ម៉េង ហៀង អគ្គនាយកក្រុមហ៊ុនអង្គរអាយ បានឱ្យដឹងថា ៖ គម្រោងនេះត្រូវតំឡើងនិងសាងសង់ដោយប្រើរយៈ ពេល៦ខែ គ្រោងប្រើប្រាស់ថវិកាសរុបចំនួន៧.២លានដុល្លារអាមេរិក ហើយកម្ពុជា ជាប្រទេសទី១ ដែលបាននាំចូលកន្ត្រកវិលពីប្រទេសជប៉ុន និងមានកម្ពស់ខ្ពស់ជាងគេក្នុងទីផ្សារធំទី៣នៅអាស៊ីអាគ្នេយ៍។
លោក ម៉េង ហៀង បានឱ្យដឹងទៀតថា ៖ មូលហេតុដែលក្រុមហ៊ុនសម្រេចយកទីតាំងនៅខេត្តសៀមរាបសម្រាប់ការវិនិយោគនេះ គឺអាស្រ័យដោយ ខេត្តសៀមរាបសម្បូរទៅ ដោយប្រាង្គប្រាសាទ និងជាខេត្តមានសក្តានុពលលើវិស័យទេសចរណ៍ប្រកបដោយភាពទាក់ទាញបំផុត ហើយនាពេលខាងមុខជាបន្តបន្ទាប់ ក្រុមហ៊ុននឹងសហការជាមួយមន្ទីរទេសចរណ៍ខេត្ត និងបណ្តាសហគមន៍ទេសចរណ៍នានា ដើម្បីចូលរួមផ្សព្វផ្សាយ និងទាក់ទាញទេសចរណ៍ផងដែរ ។
លោក ថាកិយូសិ សិណុមីយា (Taheyoshi Shinomiya) ប្រធានក្រុមប្រឹក្សាភិបាលក្រុមហ៊ុន អង្គរ អាយ ខមភេនី លីមីធីត មានប្រសាសន៍ថា ៖ កន្ត្រកវិលអង្គរអាយ នឹងក្លាយជាគំរោងទី១៤ របស់ក្រុមហ៊ុន CQ Amenic Co ខណៈដែលក្រុមហ៊ុននេះ មានកន្ត្រកវិលចំនួន១៣កន្លែងនៅក្នុងពិភពលោក ហើយក៏ធ្លាប់បានធ្វើការវិនិយោគលើកដំបូងនៅកម្ពុជា សួនទឹកនៅផ្សារទំនើបអ៊ី អន ផងដែរ ហើយកន្ត្រកវិលពីប្រទេសជប៉ុននេះ មានលក្ខណៈពិសេសប្លែកដែលបានផលិតនិងបង្កើតឡើងជាមួយរូបសណ្ឋានលម្អិតដ៏កម្រ ក្នុង ចំណោមកន្ត្រកវិលទាំ១៤០ក្នុងប្រទេសជប៉ុន។
មានប្រសាសន៍ក្នុងឱកាសនោះ ឯកឧត្តម ទៀ សីហាអភិបាលខេត្តបានសម្ដែងនូវការស្វាគមន៍ ការកោតសរសើរនិងថ្លែងអំណរគុណ ចំពោះវិនិយោគិនជាតិ និងអន្តរជាតិ ដែលជឿទុកចិត្តលើការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ហើយបានមកបណ្តាក់ទុននៅកម្ពុជា ក៏ដូចជានៅក្នុងខេត្តសៀមរាប ដែលជាសក្ខីភាពនាថ្ងៃនេះយើងបាននឹងកំពុងធ្វើពិធីសម្ពោធបើកការដ្ឋានសាងសង់មណ្ឌលកម្សាន្តកន្ត្រកវិល លំដាប់ពិភពលោក ដែលត្រូវចំណាយថវិកាជាង ៧លានដុល្លារ ដែលជាការវិនិយោគរួមគ្នារវាងកម្ពុជា-ជប៉ុន។
ឯកឧត្តម ទៀ សីហា មានប្រសាសន៍ទៀតថា៖ ការវិនិយោគនេះដែរ មិនត្រឹមតែធ្វើការទាក់ទាញភ្ញៀវទេសចរជាតិ និងអន្តរជាតិ ដែលចូលមកទស្សនាខេត្តសៀមរាបស្នាក់នៅបានកាន់តែយូរថែមទៀតប៉ុណ្ណោះទេ តែបានស្រូបយកកម្លាំងពលកម្មពីការវិនិយោគនេះបានមួយចំនួនធំផងដែរ ដែលពិតជាបានរួមចំណែកដល់ការជំរុញ និងលើកកម្ពស់ជីវភាពប្រជាពលរដ្ឋ ក្នុងខេត្តកាន់តែប្រសើរឡើងមួយកម្រិតថែមទៀត ។
ឯកឧត្តមអភិបាលខេត្តសៀមរាប បានសម្តែងនូវក្តីជឿជាក់និងរំពឹងថា ៖តាមរយៈនៃការមកវិនិយោគរបស់ក្រុមហ៊ុនអង្គរ អាយ ខមភេនី លីមីធីត ក្រុមហ៊ុន នឹងបន្តបង្កើននូវការវិនិយោគបន្ថែមទៀតនៅព្រះរាជាណាចក្រកម្ពុជា ជាពិសេសខេត្តសៀមរាប លើវិស័យ ផ្សេងៗទៀត ដើម្បីចូលរួមដល់កិច្ចអភិវឌ្ឍន៍ព្រះរាជាណាចក្រកម្ពុជា ក៏ដូចជាខេត្តសៀមរាប និងបានរួមចំណែកដល់ការផ្សព្វផ្សាយអំពីវប្បធម៌ អារិយ្យធម៌ខ្មែរទៅកាន់ភ្ញៀវទេសចរនៅទូទាំងពិភពលោក ឱ្យចូលមកទស្សនាខេត្តសៀមរាប កាន់តែច្រើនឡើង ដែលសកម្មភាពទាំងនេះ ពិតជាបានដើរតួនាទីយ៉ាងសំខាន់ក្នុងការផលិត ផលិតផលទេសចរណ៍ ដែលមិនអាចខ្វះបាន ៕
ខេត្តសៀមរាបនឹងមានកន្ត្រកវិល ខ្ពស់ជាងគេលំដាប់ទី៣ក្នុងតំបន់អាស៊ីអាគ្នេយ៍…
Posted by មន្ទីរព័ត៌មានខេត្តសៀមរាប on Saturday, June 29, 2019
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
