នាព្រឹកថ្ងៃទី២៧ ខែមិថុនា ឆ្នាំ២០១៩ រដ្ឋបាលស្រុកប្រាសាទបាគង បានសហការជាមួយមន្ទីរបរិស្ថានខេត្តសៀមរាប បានប្រព្ធពិធី “ទិវាបរិស្ថានជាតិនិងពិភពលោក ៥ មិថុនា” ក្រោមប្រធានបទ “ការបំពុលខ្យល់” ជាមួយនឹងការចែកកូនឈើចំរុះជាង៥០០០ដើម ដល់វត្តអារាម និងសាលារៀននានា ក្រោមអធិបតីភាពឯកឧត្តមទៀ សីហា អភិបាលខេត្តសៀមរាប។
លោកស៊ុន គង់ ប្រធានមន្ទីរបរិស្ថានខេត្តសៀមរាប បានឲ្យដឹងថា ជារៀងរាល់ឆ្នាំ មនុស្សប្រមាណ៧លាននាក់នៅទូទាំងពិភពលោក បានស្លាប់ដោយការបំពុលខ្យល់អាកាស ដោយមនុស្សប្រមាណជាង ៤ លាននាក់ បានស្លាប់ក្នុងតំបន់អាស៊ីប៉ាស៊ីហ្វិក។ ទិវាបរិស្ថានពិភពលោកឆ្នាំ ២០១៩ និងជម្រុញឱ្យរដ្ឋាភិបាល ឧស្សាហកម្ម សហគមន៍ និងបុគ្គលចូលរួមជាមួយគ្នាដើម្បីស្វែងរកថាមពលកកើតឡើងវិញ បច្ចេកវិទ្យាបៃតង ការកែលម្អគុណភាពខ្យល់នៅក្នុងទីក្រុង តំបន់
និងនៅទូទាំងពិភពលោក។
លោកស៊ុន គង់ បានបន្តថា ដើម្បីចូលរួមក្នុងចលនាពិភពលោក រាជរដ្ឋាភិបាលកម្ពុជា ក៏បានសម្រេចកំណត់យកថ្ងៃទី៥
ខែមិថុនាជា “ទិវាបរិស្ថានជាតិ” ជាមួយនឹងសេចក្ដីអនុម័តនេះ ក្រសួងបរិស្ថាន បានប្រារព្ធទិវាបរិស្ថានជាតិ រួមជាមួយនឹងការប្រារព្ធទិវាបរិស្ថានពិភពលោក។ ចាប់តាំងពីពេលបង្កើតទិវានេះមក យុទ្ធនាការបរិស្ថានជាតិ និងបរិស្ថានពិភពលោកត្រូវបានរៀបចំឡើងនៅទូទាំងប្រទេស គ្រប់រាជធានី-ខេត្ត ហើយព្រឹត្តិការណ៍ធំថ្នាក់ជាតិ ក៏ត្រូវបានរៀបចំឡើងនៅតាមទីតាំងផ្សេងៗគ្នាទូទាំងប្រទេស ដោយបានសហការណ៍ជាមួយអាជ្ញាធរដែនដីគ្រប់លំដាប់ថ្នាក់។
លោកស៊ុន គង់ បានបន្តទៀតថា ការប្រារព្ធទិវាបរិស្ថាន បានបង្ហាញអំពីកម្លាំងដួងចិត្តរបស់មនុស្សម្នាក់ៗ ដែលប្រមូលផ្តុំទៅជាកម្លាំងរួមមួយសម្រាប់ការផ្លាស់ប្តូរជាវិជ្ជមាន។ ការប្រារព្ធទិវាបរិស្ថានពិភពលោកនាពេលកន្លងមកបានផ្តោតសំខាន់ទៅលើការថែទាំភពផែនដី និងធនធានទឹក ស្រទាប់អូហ្សូន ការផ្លាស់ប្តូរអាកាសធាតុ រហោស្ថានកម្ម និងការអភិវឌ្ឍប្រកបដោយចីរភាព។ល។ ទិវាបរិស្ថានពិភពលោក ត្រូវបានប្រារព្ធឡើងក្នុងរូបភាពផ្សេងៗ ដែលក្នុងនោះរួមមានការប្រមូលផ្តុំគ្នានៅតាមផ្លូវ ក្បួនដង្ហែកង់ ការប្រគំតន្ត្រីបៃតង ការនិពន្ធអត្ថបទនិងការប្រកួតផ្ទាំងរូបភាពនៅក្នុងសាលារៀន ការដាំដើមឈើ ការកែច្នៃសំណល់ និងយុទ្ធនាការសម្អាតជាដើម នៅឆ្នាំ២០១៩នេះ ប្រធានបទរបស់ទិវាបរិស្ថានពិភពលោកគឺ “ការបំពុលខ្យល់»។
មានប្រសាសន៍នៅក្នុងពិធីនេះ ឯកឧត្តមទៀ សីហា បានមានប្រសាសន៍ថា ប្រជាពលរដ្ឋ មិនសូវជាមានការចាប់អារម្មណ៍នឹងការបំពុលខ្យល់ទេ ដោយសារថា ពួកគាត់មិនបានមើលឃើញដោយផ្ទាល់ភ្នែក។ ហើយដោយការបំពុលខ្យល់នេះ បានធ្វើឲ្យមានការកើនឡើងនូវកម្តៅផែនដី ប៉ះពាល់ដល់អាយុជីវិត សត្វ និងរុក្ខជាតិ។
ឯកឧត្តមអភិបាលខេត្តសៀមរាប មានប្រសាសន៍បន្តថា ដើម្បីរួមចំណែកទប់ទល់ជាមួយនឹងការបំពុលខ្យល់ក្នុងបរិយាកាសនេះ សូមអំពាវនាវដល់ប្រជាពលរដ្ឋយើង ឲ្យបញ្ឈប់ការកាប់រានព្រៃយកដីធ្វើកម្មសិទ្ធិ បញ្ឈប់ការចោលសំរាម ឬដុតសំរាមផ្តេសផ្តាស និងចូលរួមដាំកូនឈើទាំងអស់គ្នាដើម្បីស្តារគម្របបៃតងឡើងវីញ ។
គួរកត់សម្គាល់ផងដែរថា ទិវាបរិស្ថានជាតិ និងបរិស្ថានពិភពលោកគឺតែងតែប្រារព្ធធ្វើឡើងជារៀងរាល់ឆ្នាំ ហើយឆ្នាំ២០១៩នេះ គឺជាខួបលើកទី២៦ហើយ សម្រាប់ប្រទេសកម្ពុជា ៕
អត្ថបទ និង រូបភាព ៖ ជា ស្រស់
កែសម្រួល ៖ អ៊ុន ណារាជ្យ
