តំណាងអង្គការជំនួយផ្នែកច្បាប់នៃកម្ពុជា បានឲ្យដឹងថា អង្គការមួយនេះ នឹងជួយផ្តល់ការប្រឹក្សា ក៏ដូចជាមេធាវី សម្រាប់ការពារផ្លូវច្បាប់ដល់អ្នកសារព័ត៌មានដែលកំពុងមានការប្តឹងផ្តល់នៅតុលាការ។នៅក្នុងកិច្ចប្រជុំអង្គភាពពាក់ព័ន្ធស្ដីពី”គម្រោងការផ្តល់ជំនួយផ្នែកច្បាប់ដល់អ្នកសារពត៌មាន” នាថ្ងៃទី ២៥ ខែ មិថុនា ឆ្នាំ២០១៩ នៅសណ្ឋាគា តារារង្សី ខេត្តសៀមរាប។
លោកសឹង ម៉ុងវិចិត្រ តំណាងអង្គការ ជំនួយផ្នែកច្បាប់នៃកម្ពុជា បានឲ្យដឹងបែបនេះ ដោយមានទទួលបានជំនួយពីអង្គការ អ៊ីនធឺញូរស៍(Internews) ដែលមានស្នាក់ការកណ្តាលនៅប្រទេសអង់គ្លេស អង្គការជំនួយផ្នែកច្បាប់នៃកម្ពុជា បានអនុវត្តគម្រោងស្តីពី “ ការពង្រឹងសមត្ថភាពដល់អ្នកសារពត៌មាន “ឲ្យមានការគោរពច្បាប់និងសីលធម៌ អ្នកសារព័ត៌មាន”។
លោកថា គម្រោងនេះផ្តោតទៅលើសកម្មភាពជាមូលដ្ឋាន៣ធំៗ ៖
ទី១ ការរៀបចំសិក្ខាសាលា និង ផ្សព្វផ្សាយអំពីបច្ចុប្បន្នភាព នៃច្បាប់ពាក់ពន្ធ័ និងច្បាប់សារព័ត៌មានដល់អ្នកសារព័ត៌មាន។
ទី២ ប្រជុំប្រចាំត្រីមាសជាមួយស្ថាប័ន និង អង្គភាពពាក់ពន្ធ័នៅក្នុងខេត្តចំនួន២ សៀមរាប និង បាត់ដំបង។
ទី៣ការពារក្តីពាក់ពន្ធ័ទៅនឹងអ្នកសារព័ត៌មាន និងបើកវគ្គបណ្តុះបណ្តាល ដល់អ្នកព័ត៌មាន ដើម្បីឲ្យពួកគាត់ដឹងថា តើការផ្សាយព័ត៌មានបែបណាឲ្យរួចផុតពីការប្តឹងផ្តល់។
លោកសឹង ម៉ុងវិចិត្រ ក៏បានបញ្ជាក់ដែរថា ក្នុងករណីដែលមានការប្តឹងផ្តល់ ឬមានការគំរាមកំហែងអ្នកសារព័ត៌មាន អាចទាក់ទងមកការិយាល័យអង្គការជំនួយផ្នែកច្បាប់ដើម្បីទទួលបានការប្រឹក្សា ឬការការពារផ្នែកច្បាប់ដោយមិនគិតកម្រៃ។
ឯកឧត្តម ទេស ច័ន្ទគីរី សមាជិកក្រុមប្រឹក្សាខេត្តសៀមរាប បានមានប្រសាសន៍ថា អ្នកសារព័ត៌មានមានតួនាទីសំខាន់នៅក្នុងសង្គម ដូច្នេះដើម្បីចៀសវៀងនូវការប្តឹងផ្តល់ អ្នកព័ត៌មានត្រូវតែប្រកាន់ខ្លួនជាកញ្ចក់ឆ្លុះបញ្ចាំងសង្គម សរសេរព័ត៌មានដែលពិត ត្រឹមត្រូវ រិះគន់បែបស្ថាបនា កុំធ្វើខ្លួនជាអាជ្ញាធរ ជាសមត្ថកិច្ច ឬជាតុលាការ ជាដើម។ ឯកឧត្តមបន្តថា ជាមួយគ្នានេះ ដើម្បីលើកតម្លៃវិស័យសារព័ត៌មាន អ្នកសារព័ត៌មាន ក៏ត្រូវរួមគ្នាប្រយុទ្ធប្រឆាំងនឹងព័ត៌មានក្លែងក្លាយ និងការធ្វើទំនើបកម្មវិស័យសារព័ត៌មាន ឲ្យសមស្របទៅតាមសម័យកាលផងដែរ៕
អត្ថបទ រូបភាព ៖ ជា ស្រស់
