មន្ត្រីចំនួន២០នាក់ មកពីប្រទេសកូឡុំប៊ី នឹងធ្វើការហ្វឹកហ្វឺន រយៈពេល១០ថ្ងៃ នៅក្នុងខេត្តសៀមរាប ដែលជាកិច្ចព្រមព្រៀងរវាង ទីភ្នាក់ងារសហប្រតិបត្ដិការអន្ដរជាតិ JICA-កូឡុំប៊ី និងស៊ីម៉ាក់ ដើម្បីសិក្សាអំពីជំនាញបោសសម្អាតមីន និងយុទ្ធភណ្ឌមិនទាន់ផ្ទុះ នៅកម្ពុជា។
មានប្រសាសន៍ថ្ងៃទី២៤ខែមិថុនា ឆ្នាំ២០១៩ អគ្គនាយករងនៃមជ្ឈមណ្ឌលកំចាត់មីនកម្ពុជា ហៅកាត់ថា ស៊ីម៉ាក់ (CMAC) លោក អ៊ុ ភូមិរ៉ូ បានឲ្យដឹងថា គម្រោងកិច្ចសហប្រតិបត្ដិការអន្តរជាតិ ដែលមានឈ្មោះថា ”ត្បូង ត្បូង” នឹងត្រូវធ្វើឡើងចំនួន៨វគ្គ ដែលវគ្គនេះ គឺជាវគ្គទី៤ហើយ ។
លោក អ៊ុ ភូមិរ៉ូ បានបញ្ជាក់ថា វគ្គទី១ ជំនាញគ្រឿងផ្ទុះកម្រិតទី៣ បានធ្វើឡើងនៅប្រទេសកូឡុំប៊ី។ វគ្គទី២ ជំនាញគ្រូបង្គោលសុនខ ដែលបានរៀបចំនៅវិទ្យាស្ថានហ្វឹកហ្វឺនស៊ីម៉ាក់” TIMA” និងវគ្គទី៣ ការគ្រប់គ្រងទូទៅ ការធ្វើផែនការ ការកំណត់អាទិភាពក្នុងការបោសសម្អាតមីន នៅខេត្តសៀមរាប។ ដោយឡែកវគ្គទី៤ ស្ដីពី”ការបោសសម្អាតផ្ទៃដីចំការមីន និងគ្រាប់យុទ្ធភណ្ឌមិនទាន់ផ្ទុះ” ។ សិក្ខាកាមដែលមកពីប្រទេសកូឡុំប៊ីនេះ មួយចំនួនជាមន្ដ្រីផ្នែកសកម្មភាពមីន មន្ដ្រីរដ្ឋាភិបាល មន្ដ្រីដោះមីន មន្ដ្រីខុទ្ធកាល័យរបស់ប្រធានាធិបតីប្រទេសកូឡុំប៊ី និងអង្គការក្រៅរដ្ឋាភិបាលផងដែរ។
ព្រះរាជាណាចក្រកម្ពុជា ពិតជាមោទកភាពមួយណាស់ ដែលមានប្រទេសជាច្រើននៅលើពិភពលោក មកសិក្សានិងដកបទពិសោធន៍ពីសកម្មភាពកំចាត់មីននៅកម្ពុជា ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
