សមត្ថកិច្ចនគរបាលខេត្តសៀមរាប បានឲ្យដឹងថា កាលពីវេលាម៉ោង១១ថ្ងៃត្រង់ ថ្ងៃទី០៣ ខែកក្កដា ឆ្នាំ២០១៩ ម្សិលមិញនេះ មានករណីអគ្គិភ័យឆេះបន្ទប់ឃ្លាំងស្តុកសម្ភារជួសជុល នៃខារ៉ាអូខេហ្គាឡាក់ស៊ី ស្ថិតនៅក្រុមទី១២ ភូមិដកពោធិ៍សង្កាត់ស្លក្រាម ក្រុងសៀមរាប ។
សមត្ថកិច្ច បន្តថា មូលហេតុដែលបង្កឲ្យមានអគ្គីភ័យនេះ គឺបណ្ដាលមកពីឆេះឌីសង់ទ័រភ្លើង ហើយនៅក្នុងករណីអគ្គីភ័យនេះ បានបណ្តាលឲ្យរងការខូចខាតសម្ភារប្រើប្រាស់មួយចំនួន រួមមានគ្រែ និងពូក ប៉ុន្តែពុំបណ្ដាលឲ្យរងគ្រោះដល់មនុស្សឡើយ ។
សូមបញ្ជាក់ផងដែរថា ក្នុងប្រតិបត្តិការណ៍នេះ សមត្ថកិច្ចបានប្រើប្រាស់ទឹកនៃរថយន្តពន្លត់អគ្គីភ័យចំនួន ០៩គ្រឿង ក្នុងចំណោមរថយន្តពន្លត់អគ្គិភ័យចេញអន្តរាគមន៍ ចំនួន០៥គ្រឿង ក្នុងនោះរថយន្តអគ្គីភ័យរបស់ស្នងការខេត្តចេញអន្តរាគមន៍០២គ្រឿង ប្រើទឹកអស់០៣ឡាន និងរថយន្តពន្លត់អគ្គិភ័យរបស់កងអាវុធហត្ថខេត្ត ចេញអន្តរាគមន៍ ចំនួន៣គ្រឿង ប្រើទឹកអស់៦ឡាន ហើយបានពន្លត់ឲ្យរលត់ទៅវិញទាំងស្រុង នៅម៉ោងប្រមាណ ១រសៀលនាថ្ងៃដដែល ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួល ៖ អ៊ុន ណារាជ្យ
