កិច្ចប្រជុំពិភាក្សា សេចក្តីប្រកាស និងកែសម្រូលគណៈកម្មការ Apps របស់ក្រសួង ព័ត៌មាន (Apps Ministry of Information) បានប្រព្រឹត្តទៅនៅព្រឹកថ្ងៃទី ៤ ខែ កក្កដា ឆ្នាំ ២០១៩ ក្រោមវត្តមានប្រធានអង្គប្រជុំ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន និងមានវត្ត អញ្ជើញ ចូលរួម ពីបណ្តាថ្នាក់ដឹកនាំ តាមបណ្តាអគ្គនាយកដ្ឋានទាំង ៥ ចំណុះឲ្យក្រសួង ព័ត៌មាន និងក្រុម ការងាររៀបចំ APPs ក្រសួង ព័ត៌មាន ។
ឯកឧត្តម ហួត ឃាងវេង រដ្ឋលេខាធិការ ក្រសួងព័ត៌មាន ដែលទទួលដឹកនាំក្រុមការងារ រៀបចំ Apps ក្រសួងព័ត៌មាន បានគួសបញ្ជាក់ថា ដោយទទួលបានការអនុញ្ញាតពី ឯកឧត្តម រដ្ឋមន្ត្រី ខៀវ កាញារីទ្ធ Mobile App នេះ គឺបានដំណើរការ រយៈពេល ១ឆ្នាំហើយ ដែលយើងអាចទាញវាមកប្រើបានដោយ ទូរសព្ទ័ដៃវៃឆ្លាត ។ ក្នុងនោះ Mobile Apps នេះ រួមមាន ពត័មានជាតិនិង អន្តរជាតិ ប្រចាំថ្ងៃ ដែលមានប្រភពច្បាស់លាស់ និងពិតប្រាកដ ជាមួយនិងការជូនដំណឹង ឲ្យដឹងនៅលើទូរសព្ទ័ដៃនីមួយៗភ្លាម ដែលមាន Apps ក្រសួងព័ត៌មាន នេះ។
ឯកឧត្តម ហួត ឃាងវេង បានបញ្ចាក់ដែរថា នៅក្នុងកម្មវិធីនេះដែរ មានជា ភាសាអង់គ្លេស បារាំង និង ភាសាចិន ហើយអាចស្តាប់វិទ្យុ បាន ច្រើនជាង ៥០ ប៉ុស្តិ៍ មើលទូរទស្សន៏ខ្មែរបាន ១០ ប៉ុស្តិ៍ អាចទស្សនា កម្សាន្ត សិល្បៈបុរាណ ខ្មែរ ភាពយន្ត និងអាចស្វែងរក ព័ត៌មានផ្សេងៗ ជាច្រើនទៀត ។ រាល់ការផ្សាយព័ត៌មាន នៅលើកម្មវិធីទូរសព្ទនេះ គ្រប់ព័ត៌មានទាំងអស់ ត្រូវបានចែករំលែក ដោយស្វ័យប្រវត្តិ ទៅកាន់បណ្តាញសង្គម Youtube facebook Telegram Channel Twitter Instagram LinkedIn ជាដើម។ ទន្ទឹមនេះ រាល់ឯកសារ ត្រូវបានរក្សាយ៉ាងត្រឹមត្រូវ ដើម្បីទុកឲ្យអ្នកចង់ ស្វែងរកបាន ដោយ ងាយ ស្រួល និងឆាប់រហ័ស ។
នៅក្នុងដំណើរការនៃកិច្ចប្រជុំនោះដែរ ឯកឧត្តម លោកជំទាវ អស់លោក លោកស្រី ជាថ្នាក់ ដឹកនាំ និងតំណាងតាមបណ្តា អគ្គនាយកដ្ឋានទាំង ៥ បានចូលរួមជាមត្តិយោបល់ជាច្រើន ទាំងចំណុចល្អ ចំណុចខ្វះខាត និងចំណុចដែលត្រូវ បំពេញបន្ថែម ដើម្បីធ្វើយ៉ាងណាឲ្យការងារ Apps ក្រសួងព័ត៌មាននេះ ដំណើរការទៅដោយរលូន និងមានការគាំទ្រ ពីអ្នកទស្សនា កាន់តែច្រើន តាមរយៈដំណឹងថ្មីៗ ទាន់ហេតុការណ៏ ស្របតាមទិសស្លោក របស់ ឯកឧត្តម រដ្ឋមន្ត្រី ក្រសួង ព័ត៌មាន គឺ ប្លែក លឿន ទុកចិត្តបាន នៅពេលណាទីណាក៏បាន ។
ឯកឧត្តម រដ្ឋមន្ត្រី ខៀវ កាញារីទ្ធ បានថ្លែងសរសើរចំពោះថ្នាក់ដឹកនាំ និងក្រុមការងារ Apps ក្រសួង ព័ត៌មានទាំងអស់ ដែលបានរួមគ្នាបំពេញកិច្ចការងារយ៉ាងបានល្អ ក្នុងរយៈ ពេលកន្លងមកនេះ ដោយបានប្រមូលផ្តុំ ព័ត៌មាន របស់ក្រសួង ព័ត៌មាន នៅក្នុង Mobile App នេះតែមួយ ដោយ មិនពិបាកស្វែងរកដូចពីមុន ហើយក៏ទទួលបានការសរសើរពី ប្រជាពលរដ្ឋ ក្នុង និងក្រៅ ប្រទសផងដែរ។ ដូច្នេះកិច្ចប្រជុំនាឱកាសនេះ គឺជាការស្វែងយល់ពីគ្នាបន្តទៅមុខ ទៀត ទាក់ទងទៅអ្វីដែលត្រូវបន្ថែម អ្វីខ្លះដែលគួរជៀសវៀង ហើយតើគួរធ្វើយ៉ាងណា ឲ្យ ជំហាន ទៅមុខទៀត ឲ្យរាល់កិច្ចការងារកាន់តែល្អប្រសើរឡើងថែមទៀត សម្រាប់បំរើដល់ អគ្គនាយកដ្ឋានទាំង ៥ ដល់ក្រសួង ព័ត៌មាន និងមន្ទីរ ព័ត៌មាន គ្រប់ខេត្ត ក្រុង ។
តាមរយៈនេះ ឯកឧត្តម រដ្ឋមន្ត្រី បានបញ្ជាក់ថា នៅពេលមាន Apps ក្រសួង ព័ត៌មាន នេះ គឺ ផេកហ្វេសប៊ុក របស់បណ្តា អគ្គនាយកដ្ឋានទាំង ៥ ចំណុះឲ្យក្រសួងព័ត៌មាន មិនត្រូវបានផ្អាកចោលនោះទេ គឺត្រូវតែសកម្មថែម ទៀត ព្រោះថាការងារព័ត៌មាន នេះ គឺត្រូវដាក់រាល់ដំណឹងនិងព័ត៌មាន ត្រូវដាក់ ទៅគ្រប់ប្រពន្ធ័ ទាំងអស់ កុំទុកចន្លោះឲ្យសោះ ដើម្បីអាចឲ្យគេបើកមើលដំណឹង របស់ក្រសួង ព័ត៌មាន បានគ្រប់ ទីកន្លែង និងគ្រប់បណ្តាញផ្សព្វផ្សាយទាំងអស់ ។ ឯកឧត្តម រដ្ឋមន្ត្រី បានផ្តល់ជាចំណុច សំខាន់ៗ ជាច្រើន ដល់ក្រុមការងារ Apps ក្រសួងព័ត៌មាន ពិសេសជម្រុញលើកទឹកចិត្ត ឲ្យមានការរួមសហការសាមគ្គីគ្នា គ្រប់ផ្នែក គ្រប់ជំនាញ ទាំងអស់ ដើម្បីជាផល ប្រយោជន៏ រួម របស់ ក្រសួង ព័ត៌មាន ទាំងមូល ។
ប្រភព ៖ ក្រសួងព័ត៌មាន
