យុវនិស្សិតនៃវិទ្យាស្ថានខេមអេដ ប៊ីស្សនីសស្គូល ចំនួន ២៥០នាក់ បានរៀបកម្មវិធីជិះកង់ក្នុងតំបន់រមណីដ្ឋានអង្គរចំងាយ៨គីឡូម៉ែត្រ ចាប់ពីចំណុចទីធ្លាអង្គរឃ្យុងយូផ្លូវ៦០ម៉ែត្រ ទៅកាន់ប្រាសាទអង្គរវត្ត ក្នុងគោលបំណងដើម្បីប្រមូលថវិកាបរិច្ចាគនៅសាលាបឋមសិក្សាព្រះដាក់ ឃុំព្រះដាក់ ស្រុកបន្ទាយស្រី រួមជាមួយនឹងការបង្កើនឲ្យនិស្សិតយល់ដឹងអំពីវប្បធម៌ អរិយធម៌ខ្មែរ ក៏ដូចជាចូលរួមក្នុងសកម្មភាពសង្គមនិងកីឡា ព្រមទាំងបង្កើននូវសាមគ្គីភាព និងភាពសប្បាយរីករាយ បន្ទាប់ពីពួកគេបានខិតខំប្រឹងប្រែងរៀនសូត្រក្នុងឆមាសកន្លងមកនៅវិទ្យាស្ថានខេមអេដប៊ីហ្សនេសស្គូល។
គណៈគ្រប់គ្រងនិស្សិតបានឱ្យដឹងថា នេះមិនមែនជាលើកទី១ទេដែលសាលាបានរៀបចំឱ្យមានកម្មវិធីជិះកង់ ដើម្បីសុខភាពនិងការងារសង្គម ខណៈដែល កន្លងមកវិទ្យាស្ថាននេះតែងបានរៀបចំកម្មវិធីសិក្សានិងកំសានផ្សេងៗជាច្រើនទៀតសម្រាប់និស្សិតក្នុងន័យផ្តល់ឱកាសឱ្យពួកគេបានចូលរួមឱ្យបានច្រើនជាមួយសកម្មភាពសង្គម បង្កើនភាពជឿជាក់និងចេះម្ចាស់ការលើខ្លួនឯង មានដូចជា ការបោះតង់សម្រាប់និស្សិតឆ្នាំទីមួយ ការចុះកម្មសិក្សាទៅតាមស្ថាប័ន និងអង្គការផ្សេងៗនៅក្នុងប្រទេស និងក្រៅប្រទេស ។
វិទ្យាស្ថានខេមអេដប៊ីហ្សនេសស្គូល គឺជាគ្រឹះស្ថានអន្តរជាតិមួយដែលបណ្តុះបណ្តាលជំនាញគណនេយ្យ និងហិរញ្ញវត្ថុ កម្រិតបរិញ្ញាបត្រ និងសញ្ញាបត្រគណនេយ្យករជំនាញ ACCA CAT ព្រមទាំងជំនាញខ្លីៗដូចជាច្បាប់ពន្ធដារ និងច្បាប់ពាណិជ្ជកម្មកម្ពុជា ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
