នៅព្រឹកថ្ងៃទី០៧ ខែកក្កដា ឆ្នាំ២០១៩នេះ សាលាអាយឃីដយូស៊ីម៉ាសកម្ពុជាសាខាខេត្តសៀមរាប និងសាខាខេត្តបាត់ដំបង បានរៀបចំប្រឡងវិញ្ញាបនបត្រកម្រិតអន្តរជាតិលើកទី៥ នៅសណ្ឋាគារសោមាទេវីខេត្តសៀមរាប ដែលមានសិស្សានុសិស្សជាកុមារាកុមារី ទាំងពីរសាខាសរុបចំនួន៧០០នាក់ ស្របទៅតាមកម្រិតសិក្សារបស់ពួកគេ ចាប់ពីថ្នាក់ដំបូងរហូតដល់ថ្នាក់ ហៃអ័រ ប៊ី (B)ដើម្បីវាស់ស្ទង់ការសិក្សារបស់ពួកគេស្របតាមកម្រិតនីមួយៗ និងក្រោយប្រឡងជាប់ពួកគេនឹងទទួលបានវិញ្ញាបនបត្រកម្រិតអន្តរជាតិពីប្រទេសម៉ាឡេស៊ី ។
កញ្ញា ហេង រចនា នាយិការគ្រប់គ្រងយូស៊ីម៉ាសកម្ពុជា មានប្រសាសន៍ថា ៖ កម្មវិធីបង្រៀន យូស៊ីម៉ាស ជាកម្មវិធីបង្រៀនមួយមានលក្ខណៈប្លែកពីគេ លំដាប់អន្តរជាតិ អាយ អេស អូ (ISO) ផ្នែកអភិវឌ្ឍន៍ខួរក្បាលកុមារពីប្រទេសម៉ាឡេស៊ី និង ជាកម្មវិធីក្រៅម៉ោងសិក្សាចំណេះដឹងទូទៅ ដែលសិក្សាតាមបច្ចេកទេសដោយប្រើម្រាមដៃ៦មានលក្ខណៈល្អប្លែកជាងគេតែមួយគត់ជាមួយ អាបាកឹស ABACUS នៃកម្មវិធី UCMAS ដែលបង្កឱ្យមានភាពរីកចម្រើនលូតលាស់សមត្ថភាពខួរក្បាលវៃឆ្លាតទាំងសងខាងរបស់កុមារ ជាទុនសម្រាប់ឧត្តមសិក្សា និងអនាគតល្អប្រសើររបស់ពួកគេ។
កញ្ញា នាយិកា បន្តទៀតថា កម្មវិធីនេះមិនគ្រាន់តែធ្វើឱ្យកុមារពូកែគណនាលេខរហ័សប៉ុណ្ណោះទេ ថែមទាំងឱ្យកុមារមានខួរក្បាលវៃឆ្លាតទាំងសងខាង និងធ្វើឱ្យកុមារពូកែផ្តោតអារម្មណ៍ ពូកែអង្កេត ស្តាប់ ចាំ និងមានគំនិតប៉ិនប្រសព្វច្នៃប្រឌិត មានសមត្ថភាពពូកែដោះស្រាយបញ្ហា ខណៈបច្ចុប្បន្ន UCMAS កម្ពុជាមានសាខាចំនួន៥០កន្លែង និងសិស្សកំពុងសិក្សាកើនឡើងជាង១ម៉ឺននាក់ និងបន្តបើកសាខាច្រើនកន្លែងទៀតនៅទូទាំងប្រទេសនាពេលខាងមុខ ហើយជាមួយគ្នានេះ យូស៊ីម៉ាសសាខាខេត្តសៀមរាបក៍មានសិស្សជាង២ពាន់នាក់ផងដែរ។
កញ្ញា ហេង រចនា បញ្ជាក់បន្ថែមទៀតថា នៅចុងឆ្នាំ ២០១៩នេះ យូស៊ីម៉ាសកម្ពុជា នឹងរៀបចំព្រឹត្តិការណ៍ជាលក្ខណៈប្រវត្តិសាស្ត្រដ៏ធំជាងគេបំផុតមួយ គឺធ្វើជាម្ចាស់ផ្ទះសម្រាប់ការប្រឡងយូស៊ីម៉ាសលំដាប់អន្តរជាតិលើកទី២៤នៅរាជធានីភ្នំពេញ ដែលរំពឹងថានឹងមានសិស្សានុសិស្សអន្តរជាតិប្រមាណជា១ម៉ឺននាក់មកពី៨០ប្រទេសចូលរួម ដោយឡែកសម្រាប់កម្ពុជា ក៏រំពឹងថា នឹងមានសិស្សចំនួនពី៣ពាន់ទៅ៤ពាន់នាក់ ចូលរួមការប្រឡងប្រជែងលំដាប់អន្តរជាតិនៅខែធុ្ន ឆ្នាំ២០១៩នេះផងដែរ ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
