កាលពីរសៀលថ្ងៃទី០៧ ខែកក្កដាម្សិលមិញនេះ ឯកឧត្តមនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និង មេបញ្ជាការនគរបាលជាតិប្រចាំទិសភូមិភាគទី៤ និងទី៥ បានដឹកនាំប្រតិភូមន្ត្រីនគរបាលជាតិ បានប្រារព្ធកិច្ចបំពាក់ឋានន្តរស័ក្តិ បំពេញកិច្ចបច្ឆាមរណៈ ថ្នាក់ឧត្តមសេនីយ៍ទោ ជូនដល់សពលោកឧត្តមសេនីយ៍ត្រី ក័ន្ត សម្បត្តិ ។
ក្នុងឱកាសនោះដែរ ឯកឧត្តមនាយឧត្តមសេនីយ៍ ខេង សុមេធ និង ប្រតិភូ បានគោរពវិញ្ញាណក្ខន្ធសពលោកឧត្តមសេនីយ៍ទោ ក័ន្ត សម្បត្តិ ក្នុងអារម្មណ៍សែនក្ដុកក្ដួលរំជួលចិត្ត អាឡោះអាល័យ និង សោកស្ដាយជាពន់ពេក និង បានចាត់ទុកថា មរណភាពរបស់លោកឧត្តមសេនីយ៍ទោ ក័ន្ត សម្បត្តិ គឺជាទុក្ខដ៏ក្រៀមក្រំបំផុត ក្នុងការបាត់បង់មនុស្សដ៏សំខាន់ ជាទីស្រឡាញ់កក់ក្តៅនៅក្នុងគ្រួសារនៃសព ហើយក៏ជាការបាត់បង់ធនធានមនុស្ស នៅក្នុងអង្គភាព យ៉ាងសោកស្តាយផងដែរ ។
ជាមួយគ្នានេះដែរ ឯកឧត្តមនាយឧត្តមសេនីយ៍ ខេង សុមេធ បាននាំយកថវិកាចំនួន ១២លានរៀល ឧបត្ថម្ភជូនដល់គ្រួសារសព ក្នុងនោះរួមមាន ៖ ថវិកាមិត្តនគរបាលចំនួន ៦លានរៀល , បច្ច័យសទ្ធាផ្ទាល់របស់ឯកឧត្តម ខេង សុមេធ និងលោកជំទាវ ៤លានរៀល និងបច្ជ័យសទ្ធារបស់លោកស្នងការខេត្តសៀមរាប ២លានរៀល ។
ព័ត៌មានជាតិ ថ្មីៗ
គួររលឹកថា លោកឧត្តមសេនីយ៍ត្រី ក័ន្ត សម្បត្តិ ស្នងការរងនៃស្នងការដ្ឋាននគរបាលខេត្តសៀមរាប និងជាប្រធានផែនសេនាធិការ បានទទួលមរណភាពកាលពីវេលាម៉ោង១២ ថ្ងៃត្រង់ នាថ្ងៃទី០៦ ខែកក្កដា ឆ្នាំ២០១៩ ដោយរោគាពាធ ក្នុងជន្មាយុ ៥៧ឆ្នាំ ។
សពលោកឧត្តមសេនីយ៍ទោ ក័ន្ត សម្បត្តិ បានតម្កល់ទុកធ្វើបុណ្យទក្ខិណានុប្បទាន តាមគន្លងប្រពៃណីព្រះពុទ្ធសាសនា នៅវត្តកេសរារាម ហៅ វត្តធម្មយុត្តិ ក្នុងក្រុងសៀមរាប ដើម្បីឧទ្ទិសកុសលជូនដំណើរចុងក្រោយ ដោយក្តីអាឡោះអាល័យបំផុតពីក្រុមគ្រួសារ ញាតិ មិត្ត និងជិតឆ្ងាយនៃសព មន្ត្រីនគរបាលរួមការងារ មន្ត្រីរាជការជុះវិញខេត្ត ក៏បានចូលរួមកាន់មរណទុក្ខផងដែរ ។
បើតាមកម្មវិធីដែលបានគ្រោងទុក ថ្ងៃទី០៨ ខែកក្កដា ឆ្នាំ២០១៩នេះ សពលោកឧត្តមសេនីយ៍ទោ ក័ន្តសម្បត្តិ ត្រូវរៀបចំពិធីដង្ហែចេញកន្លែងតម្កល់សព ប្រទក្សិណតាមដងផ្លូវមួយចំនួនក្នុងក្រុងសៀមរាប និងវិលត្រឡប់មកកាន់វត្តកេសរារាមវិញ រំកិលសពឡើងលើមេរុ រៀបចំពិធីបូជា នៅវេលាម៉ោង ១៨ ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
