នៅព្រឹកថ្ងៃទី០៨ ខែ កក្កដា ឆ្នាំ២០១៩នេះ ឯកឧត្តម អ៊ាន ឃុន ប្រធានស្តីទីក្រុមប្រឹក្សាខេត្ត និង ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានដឹកនាំប្រតិភូខេត្ត រួមមានឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាព មន្ត្រីអ្នកមុខអ្នកការក្នុងខេត្ត កងកម្លាំងប្រដាប់អាវុធ អាជ្ញាធរក្រុង ស្រុក ឃុំសង្កាត់ បានចូលរួមគោរពវិញ្ញាណក្ខ័ន្ធ និង ចូលរួមរំលែកទុក្ខក្រុមគ្រួសារនៃសពលោកឧត្តមសេនីយ៍ទោ ក័ន្ត សម្បត្តិ ស្នងការរងនគរបាលខេត្ត ដែលបានទទួល មរណភាព កាលពីថ្ងៃទី ០៦ ខែ កក្កដា ឆ្នាំ២០១៩ វេលាម៉ោង១២ថ្ងៃត្រង់ ក្នុងជន្មាយុ៥៧ឆ្នាំ ដោយរោគាពាធ ហើយសពត្រូវបានតំកល់ទុកធ្វើទក្ខិណាទាន ទៅតាមប្រពៃណីសាសនានៅវត្តកេសរារាម ភូមិ តាភុល សង្កាត់ស្វាយដង្គំ ក្រុងសៀមរាប ទៅតាមគន្លងប្រពៃណីព្រះពុទ្ធសាសនា ។
ក្នុងការចូលរួមរំលែកទុក្ខនោះដែរ ឯកឧត្តម អ៊ាន ឃុន និង ឯកឧត្តម ទៀ សីហា និង ប្រតិភូ បានសម្តែងនូវការសោកស្តាយយ៉ាងខ្លាំង នៃការបាត់បង់មន្ត្រីថ្នាក់ដឹកនាំមួយរូបដ៏ឆ្នើមក្នុងជួរកងកម្លាំងប្រដាប់អាវុធ ដែលពោពេញទៅដោយបទពិសោធន៍ បច្ចេកទេស ក្នុងការដឹកនាំ និង បំពេញភារកិច្ច ជូនជាតិមាតុភូមិកន្លងមក ព្រមទាំងបានចូលរួមក្នុងកិច្ចការកសាង និង អភិវឌ្ឍន៍នូវសមទ្ធិផលនានា នៅតាមមូលដ្ឋាននៃកងនគរបាលជាតិ ។
ឆ្លងតាមដំណាក់កាលក្នុងការបំពេញភារកិច្ចរបស់លោកឧត្តមសេនីយ៍ទោ ក័ន្ត សម្បត្តិ ដែលជាថ្នាក់ដឹកនាំមួយដ៏ឆ្នើមក្នុងការបញ្ជាដឹកនាំ ការបំពេញកាតព្វកិច្ចការពារជាតិមាតុភូមិ ក្នុងរយៈពេល៤០ឆ្នាំមកនេះ ហើយការបាត់បង់ស្វាមី លោក ឪពុក ជាទីស្រឡាញ់របស់បងស្រី និងកូនៗ ចៅៗក៏ដូចថ្នាក់ដឹកនាំខេត្ត ស្នងការខេត្ត អធិការនគរបាល ក្រុង ស្រុក និងមន្ត្រីរាជការ ដែលបាត់បង់នូវកម្មាភិបាលឆ្មើមមួយរូប ក៏ដូចការបាត់បង់នូវវត្ថុអ្វីមួយដែលរកតម្លៃអ្វីមកប្រៀបធៀប ផ្ទឹមពុំបាន នៅក្នុងក្រុមគ្រួសារ និង សង្គមជាតិ ។
គណៈប្រតិភូបានធ្វើការបូជាទៀនធូប ដើម្បីឧទ្ទិសជូនដល់ដួងវិញ្ញាណក្ខ័ន្តសពលោកឧត្តមសេនីយ៍ទោ ក័ន្ត សម្បត្តិ សូមឲ្យលោកបានទៅកាន់សុខតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារ បងប្អូន កូនចៅ និង ថ្នាក់ដឹកនាំគ្រប់ជាន់ថ្នាក់ ក្នុងជួរកងកម្លាំងប្រដាប់អាវុធ មន្ត្រីរាជការ ឲ្យទទួលនូវសេចក្តីសុខ និង ឲ្យស្គាល់នូវតែសុខសន្តិភាព សុភមង្គល និង ការអភិវឌ្ឍន៍ប្រទេសជាតិលើគ្រប់វិស័យ ។
ក្នុងនោះដែរឯកឧត្តមអភិបាលនៃគណៈអភិបាលខេត្តសៀមរាប បានប្រគល់នូវលិខិតរំលែកទុក្ខរបស់ខេត្ត និង បច្ច័យ ចំនួន ២លានរៀល ដើម្បីចូលរួមជាមួយក្រុមគ្រួសារនៃសព ឧត្តមសេនីយ៍ទោ ក័ន្ត សម្បត្តិ យកទៅប្រើប្រាស់ក្នុងពិធីធ្វើបុណ្យសពទៅតាមគន្លងប្រពៃណីព្រះសាសនា ៕
អត្ថបទ និង រូបថត : លោក ម៉ី សុខារិទ្ធ
កែសម្រួលអត្ថបទ : លោក លីវ សាន្ត
