គណ:កម្មការខេត្តសៀមរាប លុបបំបាត់ឱសថក្លែងក្លាយ និង សេវាសុខាភិបាលខុសច្បាប់ ដើម្បីកាត់បន្ថយភាពក្រីក្រ បានបើកកិច្ចប្រជុំប្រចាំត្រីមាសរបស់ខ្លួន ក្នុងគោលបំណង ត្រួតពិនិត្យតាមដានរបស់គណ:វិជ្ជាជីវ:សុខាភិបាលខេត្តសៀមរាប ទៅលើការលក់ឱសថហាមឃាត់ ឬក្លែងក្លាយ ឬហួសកាល នៅតាមឱសថស្ថាន និងឱសថស្ថានរង នៅតាមស្រុកក្រុងនីមួយៗ និងត្រួតពិនិត្យកន្លែងថែរក្សាសម្ផស្ស និងលក់គ្រឿងសំអាងគ្មានច្បាប ហើយផ្សព្វផ្សាយប្រាសចាកពីការពិត។
មានវត្តមាន នារសៀលថ្ងៃទី០៩ ខែកក្កដា ឆ្នាំ២០១៩ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានធ្វើបទបង្ហាញ ស្តីពី ច្បាប់ការគ្រប់គ្រងអ្នកប្រកបវិជ្ជាជីវ:សុខាភិបាល ជាច្រើនមាត្រានៃបទប្បញ្ញាត្តិទូទៅ ដែលច្បាប់នេះមានគោលបំណងការពារសុខភាព និងសុវត្ថិភាពរបស់ប្រជាជន តាមរយ:ការផ្តល់នូវយន្តការ ធានាថា រាល់អ្នកប្រកបវិជ្ជាជីវ:សុខាភិបាលទាំងអស់មានគុណវុឌ្ឍិ សមត្ថភាព និង សម្បទា គ្រប់គ្រាន់ក្នុងការប្រកបបែបវិជ្ជាជីវ:របស់ខ្លួន ត្រូវមានការទទួលខុសត្រូវខ្ពស់បំផុត តាមដែលអាចធ្វើទៅបាន។
តាមរយៈ ការពិភាក្សាគ្នាយ៉ាងល្អិតល្អន់ និង ស្ដាប់មតិចូលរួមរបស់សមាជិក សមាជិការួចមក អង្គប្រជុំក៏បានសម្រេចយកខ្លឹមសារសំខាន់ៗរួមមាន៖ ទី១. មន្ទីរសុខាភិបាលខេត្តសៀមរាបត្រូវពង្រឹង ការត្រួតពិនិត្យ ទីតាំងការបើកលក់ឱសថ និងសេវាសុខាភិបាលផ្សេងៗ ឲ្យស្របតាមគោលការណ៍ច្បាប។ ទី២. មន្ទីរសុខាភិបាល ត្រូវសហការជាមួយសមត្ថកិច្ច អាជ្ញាធរមូលដ្ឋាន ចុះត្រួតពិនិត្យជាប្រចាំនៅតាមទីតាំងឱសថស្ថាន និងសេវាសុខភាពផ្សេងៗ ដើម្បីត្រួតពិនិត្យគុណភាពឱសថ ដើម្បីបញ្ឈប់ការចរាចរណ៍ឱសថក្លែងក្លាយ និងរាយការណ៍ជាបន្ទាន់ ដើម្បីលុបបំបាត់ការលក់ផលិតផលអាហារបំប៉ននៅក្នុងសហគមន៍។ ទី៣. មន្ទីរសុខាភិបាល និងអាជ្ញាធរមានសមត្ថកិច្ច ករណីពិនិត្យឃើញទីតាំងណាប្រព្រឹត្តខុសច្បាប អាជ្ញាធរត្រូវអនុវត្តតាមនីតិវិធីច្បាប់ជាធរមាន។ ទី៤. មន្ទីរសុខាភិបាលខេត្តសៀមរាប ត្រូវសហការជាមួយមន្ទីរអប់រំ យុវជន និងកីឡាខេត្ត ចុះបាញ់ថ្នាំមូសនៅតាមសាលាមត្ដេយ្យ និងបឋមសិក្សា និងដាក់អាបេតកម្ចាត់ដង្កូវទឹក។ ទី៥. រដ្ឋបាលក្រុង-ស្រុក ត្រូវសហការជាមួយមន្ទីរសុខាភិបាលខេត្តសៀមរាប ត្រួតពិនិត្យតាមដាន និងរាយការណ៍ និងចាត់វិធានការចំពោះទីតាំងសេវាសុខាភិបាលឯកជន ទាំងឱសថស្ថាន អ្នកប្រកបអាជីវកម្មព្យាបាលជំងឺ និងដើរចាក់ថ្នាំខុសច្បាប់ និងរៀបចំបង្កើតអនុគណៈកម្មការ ថ្នាក់ក្រុង-ស្រុក។ ទី៦. មន្ទីរសុខាភិបាល និងអនុគណៈកម្មការក្រុង-ស្រុក ត្រូវប្រជុំរាល់ត្រីមាស ឆមាស និងប្រចាំឆ្នាំ ឲ្យបានទៀងទាត់ ដើម្បីរាយការណ៍ជូនឯកឧត្តមអភិបាលខេត្ត និងបូកសរុប របាយការណ៍ជូនក្រសួងសុខាភិបាល។
ឆ្លៀតក្នុងឱកាសនោះ គណ:កម្មការខេត្តសៀមរាប លុបបំបាត់ឱសថក្លែងក្លាយ និង សេវាសុខាភិបាលខុសច្បាប់ ដើម្បីកាត់បន្ថយភាពក្រីក្រ បានសំណូមពរឪ្យអាជ្ញាធរដែនដី មេត្តាជួយសហការណ៍ ក្នុងការស្រង់ស្ថិតិចំនួនទីកន្លែងអ្នកប្រកបសេវាឯកជន គ្មានច្បាប់ នៅក្នុងដែនសមត្ថកិច្ចរបស់ខ្លួន ដើម្បីជួយទប់ស្កាត់ ការផ្សព្វផ្សាយ បំពាន ប្រាសចាក ការពិត និងទីតាំងលក់អាហារបំប៉នសុខភាពនៅតាមសហគមន៏។ បន្ថែមពីនោះ នៅពេលដែលមន្ត្រីជំនាញបានធ្វើការដកហូតរឹបអូស ចំពោះឱសថខុសច្បាប់នោះ សូមអាជ្ញាធរដែនដី មេត្តាធ្វើយ៉ាងណាដុតកំទេចចោលទៅតាមនីតិវិធីច្បាបចុះ៕
អត្ថបទ និង រូបថត : លោក ស៊ាន សុផាត
កែសម្រួលអត្ថបទ : លោក សេង ផល្លី
