ក្នុងឱកាសបើកកិច្ចប្រជុំកម្រិតអគ្គនាយកទេសចរណ៍អាស៊ានលើកទី៥០ (ASEAN NTOs) នៅខេត្តសៀមរាប ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា បានស្នើដល់ប្រទេសជាសមាជិកអាស៊ានទាំងអស់ត្រូវខិតខំបង្កើតផលិតផលទេសចរណ៍ថ្មីៗ និងពង្រីការហោះហើរត្រង់បន្ថែមឱ្យបានច្រើនតាមដែលអាចធ្វើទៅបាន ដើម្បីទាក់ទាញភ្ញៀវទេសចរឱ្យបានកាន់តែច្រើន ព្រមទាំងត្រូវដោះស្រាយបញ្ហាប្រឈមនានាមួយចំនួនទៀតផងដែរ ។
ឯកឧត្តម ថោង ខុន មានប្រសាសន៍ទៀតថា អំពីបញ្ហាប្រឈមមួយចំនួនដែលកើតមាននៅក្នុងប្រទេសជាសមាជិកអាស៊ាននោះ ត្រូវមានកិច្ចសហប្រតិបត្តិការដោះស្រាយរួមគ្នា ក្នុងនោះត្រូវជំរុញការធ្វើដំណើរទស្សនាកម្សាន្តផ្ទៃក្នុងអាស៊ានឱ្យបានផុសផុលឡើង សំដៅធ្វើយ៉ាងណាឱ្យទទួលបានកំណើនជាមធ្យម ៤ភាគរយ ក្នុងមួយឆ្នាំ និងជំរុញឱ្យទេសចរអាចធ្វើដំណើរទស្សនាកម្សាន្តបានដោយខ្លួនឯង ពិសេសដំណើរកម្សាន្តឆ្លងប្រទេស ដូច្នេះ សូមឲ្យអង្គប្រជុំ ASEAN NTOs រួមគ្នាពិភាក្សាពីចំណុចដ៏សំខាន់មួយនេះ សំដៅធ្វើយ៉ាងសម្រេចឱ្យបាននូវ «ស្ដង់ដាទេសចរណ៍ម្ហូបអាហារអាស៊ាន» នេះឱ្យបាន ជាពិសេស ត្រូវធ្វើយ៉ាងណាបង្កើតផលិតផលទេសចរណ៍ថ្មីៗឱ្យបានច្រើន ដើម្បីទាក់ទាញទេសចរឱ្យមកទស្សនាកើនឡើងកាន់តែច្រើនថែមទៀត។
សូមបញ្ជាក់ថា កាលពីព្រឹកថ្ងៃទី១០ ខែកក្កដា ឆ្នាំ២០១៩នេះ នៅសណ្ឋាគារបុរីអង្គរ ខេត្តសៀមរាប មានរៀបចំពិធីបើកកិច្ចប្រជុំកម្រិតអគ្គនាយកទេសចរណ៍អាស៊ានលើកទី៥០ (ASEAN NTOs) ជាផ្លូវការ ក្រោមអធិបតីភាពឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា , ឯកឧត្តម ទៀ សីហា អភិបាលខេត្តសៀមរាប និង លោក PG Kamalrudzaman Haji Mohd Ishak អគ្គលេខានៃក្រសួងធនធានឧស្សាហកម្ម និងទេសចរណ៍ នៃប្រទេសប្រ៊ុយណេ ដែលជាប្រធានអង្គប្រជុំ ASEAN NTOs លើកទី៥០ និងកិច្ចប្រជុំពាក់ព័ន្ធ។
កិច្ចប្រជុំ ASEAN NTOs នេះ មានរយៈពេល៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០១៩ ហើយក្រៅពីកិច្ចប្រជុំ ASEAN NTOs អាស៊ាននេះ ក៏មានកិច្ចប្រជុំ ASEAN NTOs បូក៣ ដែលមានប្រទេសចិន ជប៉ុន និងកូរ៉េខាងត្បូង និងមានកិច្ចប្រជុំក្នុងក្របខណ្ឌមជ្ឈមណ្ឌលអាស៊ាន-ចិន , មជ្ឈមណ្ឌលអាស៊ាន-ជប៉ុន និងមជ្ឈមណ្ឌលអាស៊ាន-កូរ៉េខាងត្បូង ព្រមទាំងមានកិច្ចប្រជុំជាមួយដៃគូសន្ទនាផ្សេងទៀតផងដែរ ។
ឯកឧត្តម ទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន នៃក្រសួងទេសចរណ៍នៃកម្ពុជា បានឲ្យដឹងថា កិច្ចប្រជុំ ASEAN NTOs នេះ ផ្ដោតសំខាន់លើការអភិវឌ្ឍទេសចរណ៍ក្នុងតំបន់អាស៊ាន ក្នុងនោះមានការត្រួតពិនិត្យលទ្ធផលការងារ ដែលបានអនុវត្តតាំងពីឆ្នាំ២០១៦ និងដាក់ចេញទិសដៅការងារបន្តរហូតទៅដល់ឆ្នាំ២០២៥ ហើយក្រៅពីនេះ មានការជំរុញកិច្ចសហប្រតិបត្តិការក្នុងក្របខណ្ឌអាស៊ាន និងគម្រោងអភិវឌ្ឍន៍នានា ដែលចូលរួមដល់ការអភិវឌ្ឍក្នុងតំបន់អាស៊ានទាំងមូល ក៏ដូចជាវិស័យទេសចរណ៍កម្ពុជា តាមរយៈការផ្លាស់ប្ដូរបទពិសោធន៍ និងការអនុវត្តស្តង់ដាគុណភាពអាស៊ានរួម និងការបណ្ដុះបណ្ដាលធនធានមនុស្ស ស្របតាមកម្មវិធីបណ្ដុះបណ្ដាលស្ដង់ដាអាស៊ាន ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ដ
