វគ្គបណ្តុះបណ្តាល និងតម្រង់ទិសស្តីពីគម្រោង ការស្ម័គ្រចិត្ត ដើម្បីសហគមន៍ខ្ញុំ ធ្វើឡើងដើម្បីផ្តល់ឱកាសដល់យុវជនទទួលបានចំណេះដឹងបន្ថែម សម្រាប់យកចំណេះដឹង ទៅអភិវឌ្ឍន៍ក្នុងសហគមន៍ និងបង្កើតបណ្តាញក្នុងមូលដ្ឋានសម្រាប់ការយល់ដឹងពីគ្នាទៅវិញទៅមក សាមគ្គីភាព និងសហប្រតិបត្តិការ ក្នុងចំណោមយុវជននៅក្នុងសហគមន៍ ជាពិសេសទទួលបានការតម្រង់ទិសថា តើយុវជនជួយសហគមន៍បែបណា និងត្រូវចាប់ផ្តើមការងារដូចម្តេច និងបានផលប្រយោជន៍អ្វីខ្លះ?។
វគ្គបណ្ដុះបណ្ដាលនេះ មានសិក្ខាកាមជាសិស្ស និស្សិត និងយុវជនក្នុងនិងក្រៅសាលា មកពី១២ខេត្ត រួមមានខេត្តកំពត ព្រះសីហនុ កំពង់ស្ពឺ ព្រៃវែង ក្រចេះ ត្បូងឃ្មុំ រតនគិរី បន្ទាយមានជ័យ ឧត្តរមានជ័យ បាត់ដំបង ពោធិ៍សាត់ ព្រមទាំងយុវជនស្ម័គ្រចិត្តជាគ្រូបង្គោលមកពីរាជធានីភ្នំពេញ និងខេត្តសៀមរាប សរុបចំនួនប្រមាណ២៥០នាក់។
មានប្រសាសន៍បើកវគ្គបណ្តុះបណ្ដាលនៅព្រឹកថ្ងៃទី១០ខែកក្កដានេះ លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន នៃក្រសួងអប់រំ យុវជន និងកីទ្បា មានប្រសាសន៍ថា៖ ក្រសួងអប់រំបានដាក់ចេញកម្មវិធី សកម្មភាព និងគោលដៅយុទ្ឋសាស្ត្រជាច្រើន ដើម្បីជួយលើកកម្ពស់តួនាទីរបស់យុវជន ក្នុងការកសាងសហគមន៍ប្រកបដោយនិរន្តរភាព ដោយក្រសួងបានផ្តោតទៅលើគុណភាពអប់រំ រួមមានការអភិវឌ្ឍជំនាញផ្សេងៗ គុណតម្លៃ អាកប្បកិរិយា និងចំណេះដឹងដែលធ្វើឱ្យប្រជាពលរដ្ឋអាចដឹកនាំជីវិតប្រកបដោយការពេញចិត្ត និងសុខភាពល្អនិងផ្តល់ការសម្រេចចិត្តឆ្លើយតបទៅនឹងបញ្ហាប្រឈមនៅកម្រិតតំបន់និងសកល និងផ្តោតសំខាន់ទៅលើគុណភាព និងភាពច្នៃប្រឌិតនិងតម្រូវឱ្យមានការពង្រឹងផ្នែកវិទ្យាសាស្ត្រ បច្ចេកវិទ្យា វិស្វកម្ម និងការអប់រំគណិតវិទ្យា(STEM)។
លោកជំទាវ មានប្រសាសន៍ទៀតថា៖៖កម្មវិធីប្រកួតប្រជែងគម្រោង ការស្ម័គ្រចិត្តដើម្បីសហគម៍ខ្ញុំ បានជ្រើសរើសយកប្រធានបទសំខាន់ៗចំនួន៦ គឺការអប់រំ សុខាភិបាល សេវារដ្ឋបាល ទេសចរណ៍ កសិកម្ម និងបរិស្ថាន ដើម្បីឱ្យយុវជនប្រើប្រាស់សមត្ថភាពជំនាញចូលរួមក្នុងកម្មវិធីអភិវឌ្ឍសហគមន៍ ឆ្លើយតបទៅនឹងទស្សនទានរបស់រាជរដ្ឋាភិបាល យុវជនម្នាក់មានជំនាញមួយយ៉ាងតិចប្រចាំជីវិត និងបង្កើនស្មារតីសាមគ្គីរួបរួមកម្លាំងចូលរួមជាមួយរាជរដ្ឋាភបាល ស្ថាប័ន អង្គការដៃគូ និងបុគ្គលដែលមានបេះដូងនិងបេសកកម្មដូចគ្នា លើការលើកស្ទួយនូវឧត្តមភាព កិត្តិនាមជាតិនិងផ្សព្វផ្សាយឱ្យបានទូលំទូលាយអំពីប្រវត្តិសាស្ត្រ វប្បធម៌ ប្រពៃណី សិល្បៈ ជំនឿសាសនាដែលជាអត្តសញ្ញាណជាតិ និងបន្តលើកកម្ពស់សមត្ថភាពជំនាញ ផលិតភាព ចំណេះដឹង និងបំណិនជីវិតរបស់យុវជន។លោកជំទាវ បន្តថា៖ការជ្រើសរើសប្រធានបទទាំង៦នេះ ពិតជាមានភាពត្រឹមត្រូវពាក់ព័ន្ឋនិងទាន់ពេលវេលានៅក្នុងបរិបទបណ្តុះគំនិតស្មារតី ដើម្បីជាប្រយោជន៍សម្រាប់សហគមន៍ និងរួមចំណែកជាមួយរាជរដ្ឋាភិបាលក្នុងការកសាងធនធានមនុស្សនិងសង្គមកម្ពុជា។
ឆ្លៀតក្នុងឱកាសនោះ លោក ពៅ ពិសិដ្ឋ អភិបាលរងខេត្តសៀមរាប ជឿជាក់យ៉ាងមុតមាំថា៖ វគ្គបណ្ដុះបណ្ដាលនេះ នឹងទទួលបាននូវពុទ្ឋិថ្មី ដល់យុវជនក្នុងសម័យសម្តេចតេជោ សម្រាប់ការតម្រង់គោលដៅជីវិតរបស់ខ្លួនផង ជាពិសេសអាចជួយលើកមុខមាត់កិត្តិយុវជនកម្ពុជាលើឆាកអន្តរជាតិ បង្ហាញមនុស្សទូទាំងពិភពលោកបានស្គាល់ពីតម្លៃរបស់ជាតិខ្មែរ ក្នុងនាមជាអ្នកស្នងមរតកដូនតា ដែលធ្លាប់តែល្បីល្បាញ តាមរយៈប្រាសាទអង្គវត្តជាដើម។
លោក ពៅ ពិសិដ្ឋ បន្ថែមថា៖ តាមរយៈវគ្គបណ្តុះបណ្តាលនេះ សិក្ខាកាមគ្រប់រូបនឹងប្រើប្រាស់ឱកាស ដើម្បីចែករំលែកចំណេះដឹងរបស់ខ្លួនដល់យុវជនទាំង១២ខេត្តដទៃទៀត ដែលស្ថិតក្នុងគម្រោង ហើយកម្មវិធីនៃគម្រោងនឹងបង្កើតការប្រឡងប្រណាំងការងារស្ម័គ្រចិត្តតាមសហគមន៍រយៈពេល៤ខែខាងមុខ ដើម្បីស្វែងរកជ័យលាភីផ្តាច់ព្រ័ត្រនៅថ្ងៃប្រារព្ឋទិវាអន្តរជាតិ អ្នកស្ម័គ្រចិត្ត៥ធ្នូ ដែលមានឈ្មោះថា ការស្ម័គ្រចិត្ត ដើម្បីសហគមន៍ខ្ញុំ ដែលនឹងលើកទឹកចិត្តឱ្យយុវជនបញ្ចេញសមត្ថភាពប្រកួតប្រជែងដណ្តើគម្រោងណាមួយដែលឆ្លុះបញ្ចាំងពីទិដ្ឋភាពជាក់ស្តែងក្នុងសហគមន៍ដែលអ្នកទាំងអស់គ្នាកំពុងរស់នៅ។
អត្ថបទ និង រូបថត : លោក យូ វង្ស
កែសម្រួលអត្ថបទ : លោក សេង ផល្លី
