វគ្គបណ្តុះបណ្តាល ស្តីពីការបង្កើត និងពង្រឹងស្ថាប័នជនក្រីក្រ របស់គម្រោងលើកកម្ពស់ជីវភាពប្រជាជនក្រីក្រ(លាភ) រៀបចំឡើងដោយរដ្ឋបាលខេត្តសៀមរាប ជាគម្រោងមួយដើម្បីលើកកម្ពស់ ដល់ជីវភាពប្រជាជនក្រីក្រខេត្តសៀមរាប និងសក្តានុពល និងស្ថានភាពក្រីក្ររបស់ប្រជាជនខេត្តសៀមរាប។
មានប្រសាសន៍ នៅព្រឹកថ្ងៃទី១០ ខែកក្កដា ២០១៩ លោក សុខ ថុល នាយករដ្ឋបាល និងជាប្រធានគ្រប់គ្រងថ្នាក់ខេត្ត បានបង្ហាញថា វគ្គបណ្តុះបណ្តាលនេះ នឹងចែករំលែកនូវចំណេះដឹង សមត្ថភាព ដល់សិក្ខាកាម ដែលមកពីក្រុមការងារគម្រោងថ្នាក់ខេត្ត ក្រុមការងារគម្រោងថ្នាក់ជាតិ អ្នកសម្របសម្រួលឃុំ សង្កាត់ អង្គការដៃគូរ និងទីប្រឹក្សាគម្រោង ក្នុងការអនុវត្តគម្រោង ដើម្បីយកទៅជួយដល់បងប្អូនប្រជាពលរដ្ឋក្រីក្រ នៅមូលដ្ឋាន ឃុំ-សង្កាត់ គោលដៅគម្រោង និងដើម្បីកែលម្អ លើកកម្ពស់ជីវភាពរស់នៅឲ្យមានភាពប្រសើរឡើង តាមរយៈគម្រោងលាភនេះ។
លោក សុខ ថុល បានបន្ថែមថាវគ្គបណ្តុះបណ្តាលនេះ ក៏នឹងចែករំលែកចំណេះដឹង អំពីការបង្កើតគោលការណ៍ និង នីតិវិធីក្នុងការបង្កើតក្រុមជួយខ្លួនឯង និងវគ្គបណ្តុះបណ្តាលបំប៉នចំនួន៣ ម៉ូដុលបន្ថែមទៀត រួមមាន ការវិភាគអំពីភាពក្រីក្រ ការគ្រប់គ្រងក្រុម និង ការកត់ត្រាបញ្ជីស្នាម ដល់ក្រុមជួយខ្លួនឯងឲ្យយល់ច្បាស់អំពី គោលការណ៍នានា ដើម្បីឈានទៅដល់ទំលាក់ទុនឧបត្ថម្ភគម្រោង (Seed Grant) ដល់ក្រុមជួយខ្លួនឯង។
សូមជម្រាបថា វគ្គបណ្តុះបណ្តាលនេះ ធ្វើឡើងរយៈពេល ០៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០១៩ ដែលគ្រូបង្គោល នឹងធ្វើបទបង្ហាញ តម្រង់ទិស និងពិភាក្សាអំពីទ្រឹស្តីគន្លឹះសំខាន់ៗ ព្រមទាំងធ្វើលំហាត់អនុវត្ត ដូចជា ៖
១-ការអភិវឌ្ឍន៍ជំនាញវិជ្ជាជីវៈ
២-ការចាត់អាទិភាពគម្រោងហេដ្ឋារចនាសម្ព័ន្ធមូលដ្ឋាន
៣-ការវិភាគអំពីភាពក្រីក្រ ៖ តើភាពក្រីក្រជាអ្វី? មូលហេតុ និងផលប៉ះពាល់នៃភាពក្រីក្រ, វដ្តនៃភាពក្រីក្រ, តើយើងត្រូវលុបបំបាត់ភាពក្រីក្រដោយរបៀបណា?
៤-ការគ្រប់គ្រងក្រុមជួយខ្លួនឯង ៖ អ្វីទៅហៅថាក្រុមជួយខ្លួនឯង? សារៈសំខាន់នៃការប្រជុំក្រុម, ការកាត់បន្ថយជម្លោះ , លក្ខណៈសម្បត្តិរបស់ក្រុមជួយខ្លួនឯង, គោលបំណង និងគោលការណ៍នៃការបង្កើតក្រុម, តួនាទី និងការទទួលខុសត្រូវរបស់ក្រុមជួយខ្លួនឯង
៥-ការកត់ត្រាបញ្ជីស្នាម ៖ សារសំខាន់នៃការកត់ត្រា ,របៀបកត់ត្រាសៀវភៅក្រុមសន្សំ, សៀវភៅបញ្ជីសន្សំ និងកម្ចី, និងសៀវភៅកំណត់ហេតុប្រជុំក្រុម៕
អត្ថបទ និង រូបថត : លោក គឿន វេត
កែសម្រួលអត្ថបទ : លោក សេង ផល្លី
