តំណាងឯកឧត្តមអភិបាលខេត្តសៀមរាប ជួបសួរសុខទុក្ខភ្ញៀវទេសចរជនជាតិកូរ៉េ ត្រូវដើមឈើដួលសង្កត់ នៅប្រាសាទបេងមាលា

នៅថ្ងៃទី១០ ខែកក្កដា ឆ្នាំ២០១៩នេះ លោក សុខ ថុល នាយករដ្ឋបាលសាលាខេត្តសៀមរាប តំណាងឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប បានជួបសួរសុខទុក្ខ លោក LEE JINMYUNG អាយុ ៦៧ឆ្នាំ ជាភ្ញៀវទេសចរជនជាតិកូរ៉េ ផ្ទាល់មន្ទីរពេទ្យអន្តរជាតិរ៉ូយ៉ាល់អង្គរ ខេត្តសៀមរាប ដែលបានជួបឧបទ្ទវហេតុ ដើមឈើដួលសង្កត់កាលពីវេលាម៉ោងជិត៤រសៀល ថ្ងៃទី០៥ ខែកក្កដា ឆ្នាំ២០១៩ ខណៈកំពុងដើរទស្សនាប្រាសាទបេងមាលា ស្ថិតនៅភូមិបេងមាលា ឃុំបេងមាលា ស្រុកស្វាយលើ ខេត្តសៀមរាប។

លោក សុខ ថុល បាននាំនូវប្រសាសន៍សួរសុខទុក្ខពីសំណាក់ឯកឧត្ដមអភិបាលខេត្ត ថ្នាក់ដឹកនាំខេត្តទាំងអស់ដល់ក្រុមគ្រួសារ នៃជនរងគ្រោះ និងបានសំដែងនូវការសោកស្ដាយ ចំពោះឧបទ្ទវហេតុ ដែលបានកើតឡើងបណ្ដាលឲ្យមានគ្រោះថ្នាក់បែបនេះ។

ក្រុមគ្រួសារលោក LEE JINMYUNG ដែលជាជនរងគ្រោះ ក៏បានថ្លែងអំណរគុណដល់ ឯកឧត្ដម អភិបាល នៃគណៈអភិបាលខេត្ត និងថ្នាក់ដឹកនាំខេត្តទាំងអស់ ដែលបានយកចិត្តទុកដាក់ ចុះសួរសុខទុក្ខដល់គ្រួសាររបស់គាត់ ដែលបានរងគ្រោះ ក៏ដូចជាប្រជាជន ប្រជាពលរដ្ឋ ភ្ញៀវជាតិ អន្តរជាតិ ដ៏ទៃទៀត និងថ្លែងអំណរគុណដែលបានចំណាយពេលដ៏មានតម្លៃ ក្នុងការចុះសួរសុខទុក្ខនេះ។

សូមរំលឹកថា ក្នុងឧបទ្ទវហេតុ ដើមឈើដួលសង្កត់ នៅរសៀលថ្ងៃទី០៥ ខែកក្កដានោះ ភ្ញៀវទេសចរជនជាតិកូរ៉េ ម្នាក់បានរងរបួសធ្ងន់ និងភ្ញៀវទេសចរជនជាតិកូរ៉េម្នាក់ទៀត រងរបួសស្រាល៕