ពិព័រណ៌ម្ហូបអាហារ សណ្ឋាគារ និងបដិសណ្ឋារកិច្ច លើកទី២ នៅសៀមរាប នាខែតុលាខាងមុខ រំពឹងថានឹងមានបណ្ដាប្រទេសចូលរួមចំនួន ១៦ ច្រើនជាងលើកទី១ នេះបើតាមការលើកឡើងរបស់ លោក អែនឌ្រូ ស៊ីអូ (Andrew Siow) ប្រធានក្រុមហ៊ុន AMB Tarsus Event Group ដែលជាអ្នករៀបចំព្រឹត្តិការណ៍នេះ។
ការតាំងពិព័រណ៌ម្ហូបអាហារ សណ្ឋាគារ និងបដិសណ្ឋារកិច្ច លើកទី២ ខេត្តសៀមរាបធ្វើជាម្ចាស់ផ្ទះនេះ នឹងរៀបចំឡើងរយៈពេល៣ថ្ងៃ ចាប់ពីថ្ងៃទី១០ ដល់ទី១២ ខែតុលា។
លោក អែនឌ្រូ ស៊ីអូ (Andrew Siow) បានរម្លឹកថាព្រឹត្តិការណ៍លើកទី១ ដែលរៀបចំនៅឆ្នាំ២០១៥ ក្នុងខេត្តសៀមរាបដដែលនេះ បានទាក់ទាញអ្នកចូលរួមប្រមាណ៤,០០០នាក់ និងមានប្រទេសចូលរួមចំនួន ៦ប្រទេស មកពីវិស័យបដិសណ្ឋារកិច្ចសណ្ឋាគារ ម្ហូបអាហារ និងសណ្ឋាគារ។ល។ ហើយព្រឹត្តិការណ៍លើកទី២នេះ លោករំពឹងថានឹង មានការចូលរួមពីក្រុមហ៊ុនជាង ១៥០ មកពី១៦ប្រទេស។
បើតាមការបញ្ជាក់ក្នុងសន្និសីទសារព័ត៌មាននៅរសៀលថ្ងៃទី១០ កក្កដា នៅសណ្ឋាគារ អង្គរផាឡេស លោក អែនឌ្រូ បានឱ្យដឹងថា បច្ចុប្បន្នមានប្រទេសចំនួន៧ហើយ ដែលបញ្ជាក់ថានឹងចូលរួមក្នុងកម្មវិធីនេះ ក្នុងនោះរួមមាន ចិន អ៊ីតាលី កូរ៉េ ម៉ាឡេស៊ី តៃវ៉ាន់ ថៃ និងសិង្ហបុរី។ អ្នករៀបចំព្រឹត្តិការណ៍នេះរំពឹងថា ពិព័រណ៌នេះនឹងជួយផ្សព្វផ្សាយឧស្សាហកម្មទេសចរណ៍កម្ពុជា ទាក់ទាញដៃគូពាណិជ្ជកម្ម ក៏ដូចជាបង្កើតនូវឧស្សាហកម្មទេសចរណ៍ថ្មីៗបន្ថែមទៀតសម្រាប់កម្ពុជាក៏ដូចជាខេត្តសៀមរាប។
ស្ថាបនិកសមាគមចុងភៅកម្ពុជា លោក ចាន់ សុភា បានឱ្យដឹងថា កម្មវិធីសំខាន់ៗដែលសមាគមគ្រោងនឹងរៀបចំក្នុងព្រឹត្តិការណ៍ពិព័រណ៌ខាងមុខនេះ មានទាំងការប្រកួតធ្វើម្ហូប និងការប្រកួតធ្វើបង្អែម។ ហើយអ្វីដែលពិសេសនោះ គឺនឹងមានការប្រកួតធ្វើនំបញ្ចុក និងអាម៉ុក សម្រាប់ជនបរទេស ដែលកំពុងរស់នៅក្នុងប្រទេសកម្ពុជា អាចដាក់ពាក្យចូលរួមបានដោយសេរី។ ចំណុចពិសេសមួយទៀត សម្រាប់ព្រឹត្តិការណ៍នេះដែរនោះ គឺជាកម្មវិធីនឹប្រកួតចម្អិនអាហារសម្រាប់ក្មេងក្រោមអាយុ១៦ឆ្នាំ ក្នុងបំណងបំផុសការស្រឡាញ់ការងារចម្អិនអាហារ និងស្គាល់ពីអត្ថប្រយោជន៍នៃការងារមួយនេះ។
លោក ធិម សេរីវុឌ្ឍ ប្រធានការិយាល័យឧស្សាហកម្មទេសចរណ៍ នៃមន្ទីរទេសចរណ៍ខេត្តសៀមរប បានឱ្យដឹងក្នុងសន្និសីទសារព័ត៌មាននៅពេលនោះដែរថា ពិព័រណ៌ខាងលើនេះពិតជាមានសារសំខាន់ណាស់សម្រាប់ខេត្តសៀមរាប ដើម្បីទាក់ទាញភ្ញៀវទេសចរមកបន្ថែម ក៏ដូចជាពង្រឹងនូវសេវាកម្មទេសចរណ៍។
លោកបន្ថែមថា នេះក៏ជាឱកាសដល់ប្រតិបត្តិករទេសចរណ៍កម្ពុជា បង្ហាញពីសិល្បៈនៃការរៀបចំម្ហូបអាហារ ភេសជ្ជៈ និងជំនាញបដិសណ្ឋារកិច្ចឱ្យបរទេសដឹងថា ខ្មែរក៏មានជំនាញនិងស្ដង់ដារៀបចំជាលក្ខណៈអន្ដរជាតិផងដែរ៕
អត្ថបទ និង រូបថត : លោក ម៉ាត់ អារីហ្វីន
កែសម្រួលអត្ថបទ : លោក សេង ផល្លី
