នៅវេលាម៉ោង ជិត៤រសៀល កាលពីថ្ងៃទី០៥ខែកក្តដាម្សិលមិញនេះ ភ្ញៀវទេសចរណ៍ជនជាតិកូរ៉េ ០២នាក់ ត្រូវបានដើមឈើបាក់សង្កត់លើ ខណៈកំពុងដើរទស្សនាប្រាសាទបេងមាលា ស្ថិតនៅភូមិបេងមាលា ឃុំបេងមាលា ស្រុកស្វាយលើ ខេត្តសៀមរាប។
តាមការឲ្យដឹងពី នគរបាលការពារបេតិកភណ្ឌខេត្តសៀមរាប ឈរជើងនៅប្រាសាទនោះ បាននិយាយថា បុរសជាភ្ញៀវទេសចរ ទាំង២នាក់នោះ ម្នាក់បានរងរបួសជាទម្ងន់ ដោយដើមឈើ សង្កត់ចំក្បាលដួលបែកក្បាល ចេញឈាមតាមមាត់ និងច្រមុះ ចំណែកឯម្នាក់ទៀត រងរបួសស្រាលដោយគ្រាន់តែមែកឈើវាត់ចំ នៅចំណុចមុខផ្លូវចូលប្រាសាទខាងត្បូង។ ហេតុការណ៍នោះ កើតឡើងក្រោយពេល គាត់ឆែកសំបុត្រចូលប្រាសាទ នៅពេលដើរចូលក្នុងប្រាសាទបានបន្តិច ស្រាប់តែមានខ្យល់យ៉ាងខ្លាំង លាយឡំនិងភ្លៀងផងដែរ ។
បន្ទាប់ពីគ្រោះថ្នាក់ភ្លាមៗនោះ នគរបាលការពារបិតិកភណ្ឌនៅប្រាសាទនោះ ព្រមទាំងកម្លាំងប៉ុស្តិនគរបាលរដ្ឋបាលបឹងមាលារួមនិងមគ្គុទេសទេសរបស់ភ្ញៀវរងរបួសនោះ បានទាក់ទងរថយន្តដឹកសង្គ្រោះបន្ទាន់របស់មន្ទីពេទ្យរ៉ូយ៉ាល់អង្គរក្នុងក្រុងសៀមរាប ដើម្បីធ្វើការសង្គ្រោះ ។
សូមជម្រាបថា រហូតមកទល់ថ្ងៃទី០៦ ខែមិថុនានេះ សមត្ថកិច្ចព្យាយាមទាក់ទងសួរ មគ្គុទេសទេសរបស់ភ្ញៀវរងរបួសនោះដែរ ប៉ុន្តែមិនមានអ្នកណាដឹងពីស្ថានភាពរបស់ភ្ញៀវទេសចរទាំងពីរនាក់នោះឡើយ។
សូមជម្រាបដែរថា ដើមឈើដែលបាក់រលំនោះ គឺជាដើមសង្កែមានទំហំមុខកាត់០.១៥សង់ទីម៉ែត្រ និងប្រវែងប្រហែល១០ម៉ែត្រ ក្នុងហេតុការណ៍បាក់រលំនោះ វាមិនបានបង្កធ្វើឲ្យខូចខាត ឬប៉ះពាល់ដល់ថ្មប្រាសាទឡើយ ។
អត្ថបទ និងរូបភាព ៖ លោក ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
