នាព្រឹកថ្ងៃទី០៦ ខែកក្កដា ឆ្នាំ ២០១៩ នៅសាលាស្រុកជីក្រែង មានរៀបចំ កិច្ចប្រជុំមួយ ស្ដីអំពី ការប្រកាសសមាសភាព និងប្រគល់ភារកិច្ចជូនក្រុមការងារថ្នាក់ជាតិថ្នាក់ខេត្ត ចុះជួយមូលដ្ឋានស្រុកជីក្រែង ដើម្បីត្រួតពិនិត្យ និងគាំទ្រអនុវត្តកម្មវិធីនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា អាណត្តិទី៦នេះ។
មានមតិបើកអង្គប្រជុំឯកឧត្តម ព្រហ្ម សិទ្ធត្ទ្រា រដ្ឋលេខាធិការក្រសួងយុត្តិធម៌ និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកជីក្រែង បានលើកឡើងថា អនុវត្តតាមគោលនយោ បាយចតុកោណទី៤ អាណត្តិទី៥ នៃរាជរដ្ឋាភិបាលកម្ពុជា ក្រុមការងារទាំងអស់នេះធ្លាប់មានរួចមកហើយ តាំងពីអាណិត្តទី៥ នៃរាជរដ្ឋាភិបាល ហើយបានបន្តអនុវត្តនៅក្នុងរាជរដ្ឋាភិបាលអាណត្តិទី៦ នេះទៀត ដោយមានការកែសម្រួលសមាសភាពមួយចំនួន និងបន្ថែមថ្មីមួយចំនួនទៀត ។
តាមរយៈរបាយការណ៍ របស់លោក ពៅ ប៊ុនធឿន បានឲ្យដឹងថា ការរៀបចំអង្គវេទិកាសាធារណៈ កាលពីឆ្នាំ២០១៧-២០១៨ ក្រុមការងារថ្នាក់ស្រុក ចុះមូលដ្ឋានបានផ្ដោតទៅលើការពង្រឹង ការផ្តល់សេវាជូនប្រជាពលរដ្ឋ សេវាអនុត្រានុកូលដ្ឋាន សេវាអគ្គិសនី សេវាទឹកស្អាត សេវារដ្ឋបាលឃុំ សេវាអប់រំ និងសេវាមណ្ឌលសុខភាព។ ជាលទ្ទផល ប្រជាពលរដ្ឋបានចូលរួម លើកជាសំណួរផ្ទាល់មាត់ចំនួន២៣សំណួរ និងសំណួរសសេរចំនួន ៣៨សំណួរ រួមនិងសំណូមពរចំនួន ១១សំណូមពរ ជាសរុបសំណួរ និងសំណូមពរ មានចំនួន៧២ ក្នុងនោះក្រុមការងារបានឆ្លើយបំភ្លឺ នៅនឹងកន្លែងបានចំនួន៥៧សំណួរ ។ ដោយឡែក សំណូមពរចំនួន៧ ដែលនៅសេសសល់ត្រូវតំណាងក្រសួងស្ថាប័នពាក់ព័ន្ធយកទៅពិនិត្យ និងឆ្លើយតបនៅពេលក្រោយ។
មានប្រសាសន៍ក្នុងឱកាសនោះ ឯកឧត្តម ង៉ែត នរិន្ទ្រ អគ្គនាយករង នៃអគ្គនាយកដ្ឋានភស្តុភារ ហិរញ្ញវត្ថុ និងជានាយក នៃអគ្គនាយកដ្ឋានវិស្វកម្ម ក្រសួងការពារជាតិ និងជាអនុប្រធានក្រុមការងារ បានគូសបញ្ជាក់ថា នាពេលកន្លងមក ក្រុមការងារថ្នាក់ជាតិ ថ្នាក់ខេត្ត ថ្នាក់ស្រុក និងថ្នាក់ឃុំ ចុះជួយមូលដ្ឋានស្រុកជីក្រែង បានខិតខំប្រឹងប្រែងយ៉ាងស្វាហាប់ ដើម្បីដោះស្រាយបញ្ហានានារបស់ប្រជាពលរដ្ឋក្នុងមូលដ្ឋាននេះ ដោយឡែក ក្នុងអាណត្តិទី៦ របស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតិតេជោ ជានាយករដ្ឋមន្ត្រី ក្រុមការងារថ្នាក់ជាតិចុះជួយមូលដ្ឋានស្រុកជីក្រែង នឹងបែងចែកសមាសភាពសមាជិកសមាជិកាជា ៣ក្រុម ជំនួសឲ្យការធ្វើការចុះមូលដ្ឋានជារួមដូចនៅអាណត្តិទី៥ ដោយក្នុងមួយក្រុមៗ ទទួលភារកិច្ចចុះមូលដ្ឋានចំនួន ៤ឃុំ ដើម្បីពន្លឿនរយៈនៃការដោះស្រាយបញ្ហា និងសំណូមពររបស់ប្រជាពលរដ្ឋក្នុងមូលដ្ឋាននីមួយៗ ព្រមទាំងជួយដល់ការធ្វើរបាយការណ៍ត្រីមាស អំពីការចុះមូលដ្ឋានបានគ្រប់ឃុំផងដែរ។
សូមជម្រាបថា ការបែងចែកក្រុមការងារថ្នាក់ជាតិចុះជួយមូលដ្ឋានស្រុកជីក្រែង មាន៣ក្រុម ក្រុមទី១ មាន នាយឧត្តមសេនីយ៍ ចៅ ភារុណ ជាប្រធាន ក្រុមទី២ នាយឧត្តមសេនីយ៍ មាស សំអុល ជាប្រធាន ក្រុមទី៣ ឧត្តមសេនីយ៍ឯក ង៉ែត នរិន្ឬ ជាប្រធាន។ សូមជម្រាបដែរថា កិច្ចប្រជុំនេះដឹកនាំដោយ ឯកឧត្តម ព្រហ្ម សិទ្ធត្រា រដ្ឋលេខាធិការក្រសួងយុត្តិធម៌ និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកជីក្រែង ឯកឧត្តម ង៉ែត នរិន្ទ្រ អគ្គនាយករង នៃអគ្គនាយកដ្ឋានភស្តភារ ហិរញ្ញវត្ថុ និងជានាយក នៃអគ្គនាយកដ្ឋានវិស្វកម្ម ក្រសួងការពារជាតិ និងជាអនុប្រធានក្រុមការងារ លោកជំទាវ ពៅ សាវឿន សមាជិករដ្ឋសភាមណ្ឌលសៀមរាប ព្រមទាំងឯកឧត្តម លោកជំទាវ សមាជិក សមាជិកាក្រុមការ ងារថ្នាក់ជាតិ ក្រុមការងារថ្នាក់ខេត្ត និងថ្នាក់ស្រុកចូលរួមចំនួន ៩២នាក់ ក្នុងនោះស្រី១២នាក់។
