ការហ្វឹកហ្វឺនរៀនសូត្ររយៈពេល៤៥ថ្ងៃ របស់នាយទាហាន ពលទាហាន កងវរសេនាតូចលេខ១ តំបន់ប្រតិបត្តិការសឹករងសៀមរាប ចំណុះយោធភូមិភាគទី៤ ប្រចាំឆ្នាំ២០១៩ នៅទីបញ្ជាការវរៈសេនាតូចការពារព្រំដែនលេខ៤០៨ អូរកូនតឹង ស្ថិតនៅភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប ត្រូវបានបិទបញ្ចប់ហើយ ក្រោមអធិបតីភាព ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ឯកឧត្តម ឧត្តមសេនីយ៍ទោ ស៊ុន គឹមថៃ មេបញ្ជាការរង តំណាង ឯកឧត្តម មេបញ្ជាការយោធភូមិភាគទី៤។
មានប្រសាសន៍ នៅព្រឹកថ្ងៃទី០៦ ខែកក្កដា ឆ្នាំ២០១៩នេះ ឯកឧត្តម ទៀ សីហា បានថ្លែងនូវការកោតសរសើរចំពោះការយកចិត្តខ្ពស់ ការបង្ហាត់ហ្វឹកហ្វឺនរបស់គ្រូយោធាចារ្យ នៃតំបន់ប្រតិបត្តិការសឹករងសៀមរាបដល់កម្មសិក្សាការី ជានាយទាហាន ពលទាហាន វរៈសេនាតូចការពារព្រំដែនលេខ៤០៨ ឲ្យកាន់តែយល់អំពីច្បាប់កងយោធពលខេមរភូមិន្ទលើការកំណែទម្រង់បួនយ៉ាងរបស់រាជរដ្ឋាភិបាលកម្ពុជា សំដៅរួមចំណែកការកាត់បន្ថយភាពក្រីក្ររបស់ប្រជាជន។ តាមរយៈ វគ្គហ្វឹកហ្វឺននេះ នាយទាហាន នាយទាហានរង និងពលទាហាន ពិតជាបានពង្រឹង និងបង្កើនសមត្ថភាពសាកសមជាកម្លាំងកងយោធពលខេមរភូមិន្ទ ដើម្បីត្រៀមលក្ខណៈការពារអធិបតេយ្យភាពដែនដី នៃព្រះរាជាណាចក្រកម្ពុជា ចៀសផុតពីការឈ្លានពានរបស់សត្រូវ។ វគ្គហ្វឹកហ្វឺននេះដែរ ក៏ជាការឆ្លើយតបទៅនឹងវិស័យអភិវឌ្ឍន៍ការងារ កងទ័ព ដែលតម្រូវឲ្យមានការយកចិត្តទុកដាក់ និងជាទុនក្នុងការកសាងប្រភពធនធានមនុស្សរបស់កងយោធពលខេមរភូមិន្ទផងដែរ។
ថ្លែងក្នុងឱកាសនោះដែរ ឯកឧត្តម ឧត្តមសេនីយ៍ទោ ស៊ុន គឹមថៃ ក៏បានសង្កត់ធ្ងន់ចំពោះការអនុវត្តឲ្យបានខ្ជាប់ខ្ជួន និងគាំទ្រនូវអនុសាសន៍ចតុកោណរបស់រាជរដ្ឋាភិបាលកម្ពុជា ព្រមទាំងមានការអត់ធ្មត់ ដោយឈរលើការគោរពនូវបទបញ្ញត្តិទាំង០៨ របស់កងយោធពលខេមរភូមិន្ទ ដោយមានការទំនាក់ទំនងល្អរវាងគ្នានឹងគ្នានៅតាមព្រំដែនរវាងប្រទេសជិតខាង ក្នុងការបន្តការគ្រប់គ្រងទាំងវិស័យយោធា និងសេដ្ឋកិច្ច ដើម្បីបញ្ចៀសនូវជម្លោះរវាងប្រទេសទាំងពីរ ។
ឯកឧត្តម ឧត្តមសេនីយ៍ទោ ស៊ុន គឹមថៃ ក៏បានផ្ដាំផ្ញើដល់សិក្ខាកាមទាំងអស់ ត្រូវយកចិត្តទុកដាក់គោរពអង្គការវិន័យសណ្ដាប់ធ្នាប់ គឺត្រូវនាំគ្នាគោរពច្បាប់ចរាចរណ៍ ព្រមទាំងត្រូវយកចិត្តទុកដាក់ថែទាំ សម្ភារៈអាវុធយុទ្ធភណ្ឌ ដែលបានបំពាក់ និងត្រូវបង្កើនយកចិត្តទុកដាក់លើការហ្វឹកហ្វឺនបន្ថែមឲ្យបានជាប្រចាំ សំដៅបង្កើនសមត្ថភាព និងធនធានមនុស្ស តាមអង្គភាព ត្រៀមលក្ខណៈនូវគ្រប់វិនាទីលើការគ្រប់គ្រងកម្លាំងក្នុងការធានារ៉ាប់រងបានទាន់ពេល នៅមានពេលមានសភាពការណ៍កើតឡើងណាមួយ ជាពិសេសក្នុងការចុះជួយសង្គ្រោះប្រជាពលរដ្ឋរងគ្រោះ ដោយគ្រោះធម្មជាតិ និងឧបទ្ទវហេតុផ្សេងៗ សំខាន់សន្តិសុខទេសចរណ៍ និងកសាងអង្គភាព ចិញ្ចឹមសត្វ បង្កបង្កើនផលក្នុងការទ្រទ្រង់ជីវភាពកងទ័ព និងគ្រួសារទ័ព។ ជាមួយគ្នាផងដែរ សិក្ខាកាមទាំងអស់ ត្រូវចូលរួមការងារប្រឡងប្រណាំងលើការកសាងអង្គភាព និងអនាម័យ សុខភាព បរិស្ថាន និងការចូលរួមសហការជាមួយអាជ្ញាធរមូលដ្ឋាន កម្លាំងសមត្ថកិច្ចជំនាញក្នុងការទប់ស្កាត់បទល្មើសព្រៃឈើ កាត់បន្ថយវប្បធម៌អន្តរាគមន៍ និងសកម្មក្នុងការអនុវត្តនូវគោលនយោបាយភូមិ/ឃុំមានសុវត្ថិភាពនៅតាមមូលដ្ឋាន ដែលអង្គភាពបានឈរជើង ដើម្បីរក្សាសន្តិសុខជូនដល់ប្រជាជន៕
អត្ថបទ និងរូបភាព ៖ លោក អ៊ិន សីហរិទ្ធ និងលោក ងិន គឺមឡេង
កែសម្រួលអត្ថបទ ៖ លោក សេង ផល្លី
