នាថ្ងៃទី១១ខែកក្កដាឆ្នាំ២០១៩នេះ ប្រជាការពារក្នុងភូមិបុស្សក្រឡាញ់ បានជួយជាកម្លាំង ក្នុងការសាងសង់ផ្ទះមួយខ្នង ដែលជញ្ជាំងធ្វើអំពីឈើ និងដំបូលប្រក់ស័ង្កសី ដល់គ្រួសារខ្វះខាតមួយគ្រួសារ រស់នៅក្នុងភូមិ បុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប។
លោក ខាន់ ង៉ិក ប្រធានប្រជាការពារក្នុងភូមិបុស្សក្រឡាញ់បានមានប្រសាសន៍ថា៖ ក្នុងភូមិបុស្សក្រឡាញ់ មានប្រជាការពារ សរុបជាង៤០នាក់ តែចំនួន ដែលមកជួយសាងសង់ផ្ទះមួយខ្នងនេះ នៅមកមិនទាន់អស់គ្នានៅឡើយទេ។
លោកបន្តថា ដោយមើលឃើញពីភាពខ្វះខាតរបស់គ្រួសារនៅក្នុងភូមិផងរបងជាមួយនេះ ទើបលោកបានស្នើរឲ្យកម្លាំងប្រជាការពារ នៅក្នុងភូមិទាំងអស់មកជួយសាងសង់ផ្ទះមួយខ្នងនេះ ។ ហើយការជួយនេះ មិនបានគិតប្រាក់កម្រៃពលកម្មនោះទេ គឺវាជាទឹកចិត្ត និងជាកម្លាំងសាមគ្គីក្នុងមូលដ្ឋាន។
លោកថាប្រជាការពារក្នុងភូមិបុស្សក្រឡាញ់ និងបន្តជួយការងារមនុស្សធម៌នេះបន្តទៀត តាមលទ្ធភាពដែលអាចធ្វើទៅបាន។
លោក មឿន វ៉ែន ជាម្ចាស់ផ្ទះ បានថ្លែងអំណរគុណយ៉ាងខ្លាំង ដល់ក្រុមប្រជាការពារ ដែលបានមកជួយសាងសង់ផ្ទះជូនពួកគាត់ ក្នុងពេលដែលពួកគាត់កំពុងជួបបញ្ហាខ្វះខាតខ្លាំង ដោយមិនដឹងថាថ្ងៃណាទើបមានលុយគ្រប់សម្រាប់ជួលជាងមកធ្វើផ្ទះ បានស្នាក់នៅសមរម្យនឹងគេ។
លោកពិតជាមានទឹកចិត្តសប្បាយរីករាយខ្លាំងណាស់ នៅពេលបានឃើញរូបរាងផ្ទះរបស់គាត់ កំពុងសាងសង់ជិតរួចហើយដោយកម្លាំងរបស់ប្រជាការពារក្នុងភូមិបុស្សក្រឡាញ់។
អត្ថបទ និង រូបភាព : លោក អ៊ិន សីហរិទ្ធ
កែសម្រួលអត្ថបទ : លោក សេង ផល្លី
