ត្រឹមតែរយៈពេល ២៦សប្តាហ៍នៃដើមឆ្នាំ២០១៩នេះប៉ុណ្ណោះ អ្នកជំងឺគ្រុនឈាម ចូលមកសម្រាកព្យាបាល នៅតាមមន្ទីរពេទ្យទាំងអស់នៅក្នុងខេត្តសៀមរាប មានអ្នកជំងឺសរុបទាំងអស់១១,២២៣នាក់ ក្នុងនោះស្លាប់១១នាក់ ជាកុមារអាយុក្រោម១៤ឆ្នាំ ដែលស្មើនឹងអត្រា ០.០៩ភាគរយ ក្នុងនោះដែរអ្នកជំងឺទាំងនោះមកពី ខេត្តកំពង់ធំ បន្ទាយមានជ័យ បាត់ដំបង ព្រះវិហារ ឧត្តរមានជ័យ កំពង់ចាម និងខេត្តមួយចំនួនទៀត។
នេះបើតាមការឲ្យដឹងពី លោក ប៊ូ សារិន ប្រធានកម្មវិធីជំងឺគ្រុនឈាមនៃមន្ទីរសុខាភិបាលខេត្តសៀមរាប តាមរយៈរបាយការណ៍កម្មវិធីជំងឺគ្រុនឈាម កាលពីព្រឹកថ្ងៃទី១២ខែកក្កដាឆ្នាំ២០១៩ ក្នុងពិធីហែរក្បួនផ្សព្វផ្សាយពីការលុបបំបាត់ជំរកមូសខ្លា ការពារគ្រុនឈាម ដែលបានធ្វើឡើងនៅសាលាបឋមសិក្សាមុខនាគក្នុងក្រុងសៀមរាប
លោក ប៊ូ សារិន បញ្ជាក់ថា អ្នកជំងឺរស់នៅក្នុងខេត្តសៀមរាបមានចំនួន៤,៤២៨នាក់ ក្នុងនោះស្លាប់៤នាក់។ ដោយសារជំងឺគ្រុនឈាមបានកើនឡើងជាលំដាប់ នៅឆ្នាំ២០១៩នេះ មន្ទីរសុខាភិបាលខេត្តសៀមរាប បានតាមដានសភាពការណ៍ជំងឺគ្រុនឈាម តាមរយៈអាជ្ញាធរមូលដ្ឋាន និងបានចុះអង្កេត អេពីដេមីសាស្ត្រ-បាណកសាស្ត្រ របស់មូសខ្លាដែលវាពងដាក់ ពាងទឹក អាងទឹក និងការវិវត្តរបស់វា និងបានពន្យល់ដល់ប្រជាពលរដ្ឋតាមមូលដ្ឋានឱ្យពួកគាត់លាងសំអាតពាងទឹក អាងទឹក លុបបំបាត់ និងបំផ្លាញចោលសំបកកំប៉ុង សំបកកង់ឡានចាស់ៗ ដែលមានទឹកដក់ឱ្យបានជាប្រចាំ និងដាក់ថ្នាំអាបេតក្នុងអាងទឹក ពាងទឹក ជាដើមផង ដើម្បីបំបាត់ជំរកមូស ជាពិសេសមូសខ្លាញីដែលជាប្រភពចម្លងជំងឺគ្រុនឈាម។ ជាមួយគ្នានេះ មន្ទីរសុខាភិបាលខេត្ត ក៏បានដាក់ថ្នាំអាបេតចំនួន២០តោន និងបានបាញ់និងត្រៀមបាញ់ថ្នាំសម្លាប់មូសខ្លា នៅតាមបណ្ដាមូលដ្ឋាននានាក្នុងខេត្តសៀមរាប ធ្វើយ៉ាងណាកាត់បន្ថយអត្រាឆ្លងជំងឺ និង ការពារអាយុជីវិតរបស់ប្រជាពលរដ្ឋក្នុងកម្រិតអតិបរមា។
មានប្រសាសន៍សំណេះសំណាល នៅសាលាបឋមសិក្សាមុខនាគក្នុងក្រុងសៀមរាប ក្នុងឱកាសនោះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប បានសម្តែងការសោកស្តាយបំផុត ចំពោះលោកឱពុកអ្នកម្តាយ ដែលបានបាត់បង់កូនជាទីស្រឡាញ់ដោយសារជំងឺគ្រុនឈាម និងបានថ្លែងរំលែកការលំបាក ចំពោះអ្នកបានឆ្លងជំងឺនេះ ដែលកំពុងសម្រាកព្យាបាលនៅតាមមន្ទីរពេទ្យទាំងអស់ផងដែរ។
លោកជំទាវ អំពាវនាវ ដល់អាណាព្យាបាល ក៍ដូចជាអាជ្ញាធរ មន្ទីរស្ថាប័នពាក់ព័ន្ធទាំងអស់ត្រូវផ្សព្វផ្សាយឲ្យបានទូលំទូលាយ ពីវិធីបង្ការជំងឺគ្រុនឈាម ដូចជា រួមគ្នាបំបាត់ជំរកមូស ដោយធ្វើអនាម័យបរិស្ថានជុំវិញលំនៅដ្ឋាន សាលារៀន សម្រានតែក្នុងមុង និងជាពិសេសត្រូវប្រយ័ត្នចំពោះកុមារតូចៗ កុំឱ្យពួកគាត់ងូតទឹកលេង និងដើរលេងក្បែរគុម្ពោតព្រៃផ្តេសផ្តាស។
សូមបញ្ជាក់ថា៖ពិធីហែរក្បួនផ្សព្វផ្សាយពីការលុបបំបាត់ជំងឺមូសខ្លា ការពារគ្រុនឈាមនេះ ធ្វើឡើងដោយយោងតាមការណែនាំរបស់កាកបាទក្រហមកម្ពុជា និងបានឆ្លងការពិភាក្សាក្រុមការងារ រួមជាមួយមន្ទីរ ស្ថាប័នអង្គភាព អាជ្ញាធរមូលដ្ឋានផងដែរ។ ផ្អែកតារបាយការណ៍របស់ កាកបាទក្រហមកម្ពុជាសាខាខេត្តសៀមរាប ថា៖សកម្មភាពនេះបានធ្វើ៥លើកមកហើយនៅស្រុកអង្គរជុំ វ៉ារិន្ទ អង្គរធំ និងក្រុងសៀមរាប ជាលទ្ឋផលអនុវត្តបាន៩៣ភូមិ ដាក់អាបេតបាន១៩,៨៤៤ពាងទឹក នៃខ្នងផ្ទះចំនួន១៣,៣៣៨ខ្នង។
អត្ថបទ និង រូបភាព : លោក យូ វង្ស
កែសម្រួលអត្ថបទ : លោក សេង ផល្លី
