ចាប់ពីថ្ងៃទី១២ ដល់ថ្ងៃទី១៣ ខែកក្កដានេះ នៅសួនច្បារព្រះអង្គចេកព្រះអង្គចម ក្រុងសៀមរាប ចំឡើងដោយទីភ្នាក់ងារជាតិមុខរបរ និងការងារ (NEA) ក្រោមការគាំទ្រពីសាលាខេត្តសៀមរាប សហភាពសហព័ន្ធយុវជនកម្ពុជាខេត្តសៀមរាប និង អង្គការអន្តរជាតិខាងការងារ (ILO) និងទីភ្នាក់ងារស្វីសសម្រាប់ការអភិវឌ្ឍនិងកិច្ចសហប្រតិបត្តិការ (SDC) បានផ្ដល់ឱកាសការងារជាង៥ពាន់កន្លែង សម្រាប់ប្រជាពលរដ្ឋក្នុងខេត្តសៀមរាប និងទូទាំងប្រទេសកម្ពុជាធ្វើការដាក់ពាក្យភ្លាមៗដោយមិនគិតកម្រៃសេវា។
នៅក្នុងពិធីបើកពិព័រណ៍ការងារ និងផលិតភាព ថ្ងៃទី១២ ខែកក្កដានេះ គេឃើញមាន វត្តមានអញ្ជើញចូលរួម របស់ឧត្តមបណ្ឌិត ពេជ សោភ័ន រដ្ឋលេខាធិការប្រចាំការ តំណាងឯកឧត្តមបណ្ឌិតអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវ: លោក ហ្គ្រាអីមី បាក់ឃ្លី (Graeme Buckley) នាយកការិយាល័យអង្គការ អាយឡូ(ILO) ប្រចាំប្រទេសថៃ កម្ពុជា និងឡាវ លោក ស៊ីម៉ុន ជាំងខើ (Simon Junker) អនុប្រធានទីភ្នាក់ងារស្វីស (SDC) លោក នាក់ ណេរ៉ុន អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប រួមជាមួយ លោក លោកស្រី ដែលជាតំណាងក្រសួង-ស្ថាប័ន, គ្រឹះស្ថានអប់រំបណ្តុះបណ្តាល, អង្គការជាតិ-អន្តរជាតិ, សមាគមនិយោជក, សហជីព, ដៃគូអភិវឌ្ឍន៍, ជាសិស្ស-និស្សិតក្នុងខេត្តសៀមរាប ចូលរួមក្នុងពិធីនេះផងដែរ។
មានប្រសាសន៍បើកពិធីពិព័រណ៌ការងារ និងផលិតភាព សៀមរាប ឆ្នាំ២០១៩នេះ ឯកឧត្តមបណ្ឌិត ពេជ សោ បញ្ជាក់ថា ព្រឹត្តិការណ៍នេះ ត្រូវបានរៀបចំឡើងក្នុងគោលបំណងពង្រឹងយន្តការ វេទិកាការងារ តាមរយៈការបង្កើតឱកាសនូវជួបជុំគ្នាដោយងាយស្រួលរវាងភាគីពាក់ព័ន្ធទាំងអស់ក្នុងទីផ្សារការងារ, ការទទួលបានឱកាសការងារ និងជ្រើសរើសកម្លាំងពលកម្មដោយទូលំទូលាយ, ការជំរុញយុទ្ធនាការលើកកម្ពស់ផលិតភាពសំដៅបញ្ជ្រាបការយល់ដឹង និងកែប្រែផ្នត់គំនិត ដើម្បីខិតខំបង្កើនផលិតភាពក្នុងការងារ។
លោក ហ្គ្រាអីមី បាក់ឃ្លី លើកឡើងថា៖ “ពិព័រណ៍ការងារ និងផលិតភាពសៀមរាបនៅក្នុងឆ្នាំ២០១៩នេះ គឺជាកន្លែងជួបជុំដ៏ងាយស្រួលសម្រាប់សិស្ស-និស្សិត យុវជន និងអ្នកស្វែងរកការងារ ជាមួយក្រុមហ៊ុន និយោជកដែលមានតម្រូវការកម្លាំងពលកម្មនៅក្នុងខេត្ត។ យុវជនអាចធ្វើការសម្រេចចិត្តដាក់ពាក្យស្វែងរកការងារភ្លាមៗ, សាកសួរព័ត៌មានអំពីតម្រូវការជំនាញ, ពិនិត្យលើគោលការណ៍បុគ្គលិករបស់ក្រុមហ៊ុន និងត្រៀមខ្លួនចូលទីផ្សារការងារបានល្អប្រសើរ។ លើសពីនេះ ព្រឹត្តិការណ៍នេះក៏ត្រូវបានរៀបចំឡើង ដើម្បីចូលរួមអបអរខួប១០០ឆ្នាំរបស់អង្គការ អាយឡូ(ILO) និងខួប៥០ឆ្នាំ នៃការចូលជាសមាជិកភាពរបស់កម្ពុជាក្នុងអង្គការនេះផងដែរ។
នេះជាឱកាសដ៏កម្ររកបាន សម្រាប់អ្នកចូលរួមទាំងអស់ ក្នុងការបង្កើតបណ្តាញទំនាក់ទំនង ជាមួយអ្នកជំនាញផ្នែកធនធានមនុស្ស អ្នកផ្តល់ការអប់រំបណ្តុះបណ្តាល និងធុរជនសំខាន់ៗ ដែលមានវត្តមាននៅក្នុងឱកាសនៃការតាំងពិព័រណ៍នេះ។ ឱកាសការងារប្រមាណ ៥ពាន់កន្លែង នៅក្នុងពិព័រណ៍រយៈពេលពីរថ្ងៃនេះ ការងារក្នុងវិស័យសំខាន់ៗដែលកំពុងមានសក្តានុពលជាច្រើន ព្រមទាំងមានសកម្មភាពធុរកិច្ចខ្លាំងក្លានៅក្នុងខេត្តសៀមរាបផងដែរ មានជាអាទិ៍៖ ទេសចរណ៍ សណ្ឋាគារ និងបដិសណ្ឋារកិច្ច ភោជនីយដ្ឋាន និងម្ហូបអាហារ សេវាដឹកជញ្ជូន ធនាគារ និងគ្រឹះស្ថានមីក្រូហិរញ្ញវត្ថុ និងអចលនវត្ថុ ជាដើម។ លើសពីនេះ ពិធីនេះរំពឹងថា នឹងមានអ្នកចូលរួមទស្សនាប្រមាណ១ម៉ឺននាក់ ដើម្បីសិក្សាពីឱកាសការងារ និងដាក់ពាក្យធ្វើការ។
មានប្រសាសន៍ក្នុងឱកាសនោះដែរ លោក នាក់ ណេរ៉ុន បានវាយតម្លៃខ្ពស់ ចំពោះពិព័រណ៌ការងារដ៏មានសារសំខាន់មួយនេះ ដែលវាបានឆ្លើយតបយ៉ាងទាន់ពេលវេលា និងមានប្រសិទ្ធភាពសម្រាប់ជួយសម្រួលដល់និយោជកក្នុងការស្វែងរកម្លាំងពលកម្ម ក៏ដូចជាឱ្យយុវជន ឬអ្នកស្វែងរកការងារធ្វើទាំងអស់ អាចស្វែងយល់ពីឱកាសការងារ ដែលកំពុងមានសក្កានុពល និងតម្រូវការក្នុងទីផ្សារក្នុងខេត្តសៀមរាប ពិសេសក្នុងវិស័យទេសចរណ៍និងសេវាកម្មផ្សេងៗ។
គួររំឭកថា កន្លងមកពិព័រណ៍ការងារដូចគ្នានេះ ត្រូវបានរៀបចំឡើងចំនួន ២លើករួចមកហើយនៅក្នុងខេត្តសៀមរាបនេះ កាលពីឆ្នាំ២០១២ និងឆ្នាំ២០១៤ ដោយទទួលបានការគាំទ្រពីនិយោជក អ្នកស្វែងរកការងារ និងសាធារណជនប្រកបដោយជោគជ័យត្រចះត្រចង់៕
អត្ថបទ និង រូបភាព : លោក ម៉ាត់ អារីហ្វីន និងលោក ស៊ាន សុផាត
កែសម្រួលអត្ថបទ : លោក សេង ផល្លី
