បុរសជាប្ដីម្នាក់ ត្រូវកម្លាំងសមត្ថកិច្ច ស្រុកស្វាយលើ ខេត្តសៀមរាប ឃាត់ខ្លួន ពាក់ព័ន្ធនឹងករណីបានប្រើអំពើហិង្សា លើស្ត្រីជាភរិយារងរបួសធ្ងន់ បណ្ដាលឲ្យស្លាប់។
តាមការរបាយការណ៍របស់លោក វរ:សេនីយ៍ឯក ស៊ុន អេង អធិការដ្ឋាននគរបាលស្រុកស្វាយលើ បានឲ្យដឹងថា មូលហេតុនៃអំពើហិង្សានេះ កើតឡើងនៅថ្ងៃទី១២ ខែកក្កដា ឆ្នាំ២០១៩ បន្ទាប់ពីជនសង្សយ័ជាប្ដីបានផឹកស្រាស្រវឹង ហើយសួររកកូន ហើយស្ត្រីជាប្រពន្ធឆ្លើយថាមិនដឹង ពេលនោះជនសង្ស័យជាប្ដីខឹង បានវាយមកលើប្រពន្ធ បណ្តាលអោយរបួសជើងជាទម្ងន់ បន្ទាប់ពីត្រូវប្ដីវាយស្ត្រីរូបនោះបានរត់ចូលព្រៃ ដើម្បីគេចពីអំពើហិង្សា ដោយមិនបានប្ដឹងសមត្ថកិច្ចឡើយ។
លុះដល់វេលាថ្ងៃត្រង់ ថ្ងៃទី១២ ខែកក្កដា ឆ្នាំ២០១៩ ជនសង្សយ័ជាប្ដី បានត្រឡប់ពីផ្សារស្រែណូយ ដោយស្រវឹងស្រាជោគ ពេលមកដល់ផ្ទះក៏បានសួរ ជនរងគ្រោះជាប្រពន្ធដដែល ថាកូនបងទៅណា ជនរងគ្រោះ បានប្រាប់ថាវាធំហើយមិនដឹងទៅណាទេ ភ្លាមនោះ ជនសង្ស័យក៏ស្ទុះទៅវាយ និងទាត់ធាក់ជនរងគ្រោះរមៀលពេញផ្ទះត្រូវចំមុខ ក្បាល និងដងខ្លួន ធ្វើឲ្យជនរងគ្រោះសន្លប់បាត់ស្មារតី ពេលនោះពុំមានអ្នកភូមិទៅជួយឡើយ ដោយសារគ្រួសារនេះតែងតែឈ្លោះទាស់ទែងគ្នាស្ទើររាល់ថ្ងៃ ចំណែកប្ដីប្រពន្ធទាំងពីរតែងតែផឹកស្រាដូចគ្នា។ ក្រោយពីរងនូវអំពើហិង្សាជនរងគ្រោះពុំបានត្រូវយកទៅព្យាបាលទៅពេទ្យឡើយ ហើយក៏គ្មាននណាដឹងដែរគឺដេកឈឺនៅលើផ្ទះជាមួយកូន ចំនែកប្តីដើរផឹកបាត់ពុំឃើញត្រឡប់មកវិញឡើយ។
លុះមកដល់ថ្ងៃទី១២ ខែកក្កដា ឆ្នាំ២០១៩ ទើបកូនដែលនៅជាមួយរត់មកប្រាប់អ្នកជិតខាងថា ឪពុករបស់ខ្លួន បានវាយម្តាយរហូតដេកស្លាប់ ទើបមានអ្នកភូមិដឹង និងទៅមើល។
តាមការបញ្ជាក់ពីអ្នកជិតខាងគ្រួសារនេះ តែងតែឈ្លោះគ្នាជាញឹកញាប់ ហើយក៏ធ្លាប់បានធ្វើកិច្ចសន្យានៅប៉ុស្តិនគរបាលមូលដ្ឋានកន្លងមកផងដែរ។
អត្ថបទ និង រូបភាព : លោក ថាច់ ពិសុទ្ធ
កែសម្រួលអត្ថបទ : លោក សេង ផល្លី