កាលពីថ្ងៃថ្ងៃទី១៤ ខែកក្កដានេះ នៅខេត្តសៀមរាប គណ:កម្មការមូលបត្រកម្ពុជា ហៅកាត់ថា គ.ម.ក បានរៀបចំសិក្ខាសាលាមួយ ស្ដីអំពី កិច្ចគាំពារវិនិយោគិនក្នុងវិស័យមូលបត្រ នៅកម្ពុជា ក្នុងគោលបំណងលើកកម្ពស់ការ យល់ដឹងអាវកាន់តែស៊ីជម្រៅអំពីកិច្ចគាំពារអ្នកវិនិយោគគិនក្នុងវិស័យមូលបត្រ ជាពិសេសយល់ដឹងអំពីយន្តការ នៃការការពារអ្នកវិនិយោគគិន របស់ គ.ម.ក ក្នុង នាមជាអាជ្ញាធរ។
ថ្លែងក្នុងចំណោម លោក លោកស្រី សាស្ត្រាចារ្យ បុគ្គលិក សិស្សនិស្សិតប្រមាណជាង២០០នាក់ ឯកឧត្តម ស៊ូ សុជាតិ អគ្គនាយកនៃគណ:កម្មការមូលបត្រកម្ពុជា (គ.ម.ក) បានថ្លែងថា ទីផ្សារមូលបត្រកម្ពុជា និងការវិនិយោគទុនលើវិស័យមូលបត្រ ត្រូវបានគណ:កម្មការមូលបត្រកម្ពុជា រៀបចំដាក់ឲ្យដំណើរការ ចាប់ពីឆ្នាំ២០១២ រហូតមកដល់បច្ចុប្បន្ន វិស័យនេះ កំពុងមានមានសន្ទុះគួរឲ្យកត់សំគាល់ ក្នុងនោះមានក្រុមហ៊ុន មូលបត្រសរុបចំនួន៧ បានមកចុះបញ្ជីបោះផ្សាយលក់មូលបត្រ ដើម្បីប្រកបអាជីវកម្ម ដោយឡែកក្រុមហ៊ុនចំនួន៥ បានមកចុះបញ្ជីបោះផ្សាយលក់មូលបត្រផ្នែកកម្មសិទ្ធិ និងក្រុមហ៊ុនចំនួន២ ផ្សេងទៀត បានមកចុះបញ្ជីបោះផ្សាយលក់មូលបត្របំណុលជាសាធារណ:(សហការជាមួយអង្គភាពមីក្រូហិរញ្ញវត្ថុ) ហើយនៅក្នុងពេលឆាប់ៗនេះ នឹងមានក្រុមហ៊ុនដែលមានសក្តានុពលធំៗមួយចំនួនទៀត មកចុះបញ្ជីបោះផ្សាយលក់មូលបត្រផ្នែកកម្មសិទ្ធិ និងក្រុមហ៊ុនមូលបត្របំណុលនៅ គណ:កម្មការមូលបត្រកម្ពុជា ផងដែរ។
ឯកឧត្តម ស៊ូ សុជាតិ បានបន្តថា បើយើងក្រឡេកមើលទៅលើថ្លៃភាគហ៊ុន សន្ទស្សន៍ភាគហ៊ុនទាំងអស់ នៃការជួញដូរបរិមាណ របស់វិនិយោគិន និងមូលធនទីផ្សារ គឺមានការកើនឡើងជាលំដាប់ ទាំងនេះអាចសបញ្ជាក់ឱ្យឃើញពីទំនុកចិត្តរបស់សាធារណជន ចំពោះទីផ្សារមូលបត្រនៅកម្ពុជាមានការកើនឡើង ។ ជាការពិតណាស់ ទំនុកចិត្តពីសាធារណជនមកលើទីផ្សារនាពេលនេះ ពិតជាចំណុចដ៏សំខាន់ និងចម្បងបំផុត ក្នុងនាមជាគណ:កម្មការមូលបត្រកម្ពុជា មានតួនាទីជាអ្នកគ្រប់គ្រង និងអភិវឌ្ឍន៍វិស័យមូលបត្រ ក្នុងព្រះរាជាណាចក្រកម្ពុជា។ តាមរយៈការដាក់ចេញនូវផែនការ និងយុទ្ធសាស្ត្រ ដែលមានលក្ខណៈសមស្របនានារួម មាន៖ វិធានការណ៍ បទប្បញ្ញត្តិសំខាន់ៗ និងការឃ្លាំមើល ជាប្រចាំនូវដំណើរការទីផ្សារ ដើម្បីធានាថាដំណើរទីផ្សារបានប្រព្រឹត្តប្រកបដោយមានសន្តិសុខ សណ្តាប់ធ្នាប់ និងរបៀបរៀបរយ។ ទន្ទឹមនឹងនោះ ប្រសិទ្ធភាពចំពោះការដាក់ ចេញនូវផែនការ និងយុទ្ធសាស្ត្រនេះ គណ:កម្មការមូលបត្រកម្ពុជា បានកំណត់នូវទិសដៅផែនការសកម្មភាព និងយុទ្ធសាស្ត្រនានាដូចជា៖ ការផ្តល់ការអប់រំ ការផ្សព្វផ្សាយ និងការចែករំលែកព័ត៌មាន ចំណេះដឹងថ្មីៗពីវិស័យមូលបត្រទៅដល់គ្រប់បណ្តារតួរអង្គពាក់ ព័ន្ធនានា ក៏ដូចជាវិនិយោគិន និងសាធារណជន ឲ្យបានយល់ដឹងកាន់ច្បាស់លាស់ និងទូលំទូលាយ ។
ឯកឧត្តម បានបន្ថែមថា ដើម្បីសម្រេចឱ្យបាននូវការពង្រឹង និងពង្រីកទំនុកចិត្តវិនិយោគិន សាធារណជនទូទៅ ក៏ដូចជាអ្នកចូលរួមក្នុងទីផ្សារមកលើទីផ្សារមូល បត្រនៅកម្ពុជានេះ យើងត្រូវធ្វើការផ្តោតសំខាន់លើកត្តាជាច្រើន ក្នុងនោះ កិច្ចគាំពារវិនិយោគិន ជាកត្តាមួយដែលត្រូវធ្វើឱ្យប្រសើរឡើង និងផ្តល់ទំនុកចិត្តដោយភាពជឿជាក់។ ទន្ទឹមនោះ ដើម្បីឱ្យកិច្ចគាំពារវិនិយោគិន ឲ្យមានឧត្តមភាព និងភាពប្រសើរឡើង គណ:កម្មការមូលបត្រកម្ពុជា ត្រូវពិនិត្យ និងផ្ទៀងផ្ទាត់លើការរៀបចំបទប្បញ្ញត្តិ ការគ្រប់គ្រង និងកិច្ចការពង្រឹងការអនុវត្តច្បាប់ តម្លាភាពនៃការបង្ហាញឯកសារផ្តល់ព័ត៌មាន ភាពត្រឹមត្រូវក្នុងដំណើរការនៃធ្វើអាជីវកម្ម ការរក្សាព័ត៌មានសម្ងាត់ ការធានានូវការការពារវិនិយោគិននៅពេលក្រុមហ៊ុនក្ស័យធននិងការបង្កើតនូវយន្តដោះស្រាយវិវាទជាដើម។
ឯកឧត្តម បានបញ្ជាក់បន្ថែមថា ក្នុងចំណោមយន្តការពារវិនិយោគិនទាំងអស់ យន្តការការពារតាមរយ:ការដោះស្រាយវិវាទ និងការពង្រឹងការអនុវត្តច្បាប់គឺជាមធ្យោបាយប្រសើរបំផុត ហើយវិធីសាស្ត្រនេះ បានការពារវិនិយោគិនពីការកេងចំណេញ ឬសកម្មភាពល្មើសនីងបទប្បញ្ញត្តិរបស់ក្រុមហ៊ុនមូលបត្រដទៃទៀត ដែលនេះជាច្រកចេញដ៏ល្អ ដើម្បីផ្តល់ឲ្យវិនិយោគិនក៏ដូចជាភាគីជម្លោះក្នុងការនាំយកនូវវិវាទរបស់ខ្លួន ធ្វើការផ្សះផ្សា ឬការដោះស្រាយអាចទទួលយកបាន។ យន្តការការពារតាមរយៈការផ្សះផ្សារ ឬការដោះស្រាយវិវាទនេះមានភាពទន់ភ្លន់ បត់បែនខ្ពស់ ឆាប់រហ័ស ចំណាយតិចរក្សាបាននូវការសម្ងាត់ និងភាពជាឯកជនរបស់វិនិយោគិន ដែលវាបានធ្វើឲ្យភាគីជម្លោះ មានភាពងាយស្រួល ប្រសើរជាងការស្វែងរកដំណោះស្រាយតាមប្រព័ន្ធតុលាការ ៕
អត្ថបទ និង រូបភាព : លោក ស៊ាន សុផាត
កែសម្រួលអត្ថបទ : លោក លីវ សុខុន
