ដើម្បីផ្ដល់ភាពងាយស្រួលដល់ការបំពេញការងារ និងពន្លឿនសកម្មភាពជួសជុល ស្រះទឹកខាងជើង នៃប្រាសាទអង្គរវត្ត អាជ្ញាធរជាតិអប្សរា នឹងពង្រីកបរិវេណការដ្ឋានជួសជុល ប៉ុន្តែការងារជាក់ស្ដែង នៅមិនទាន់កំណត់ពីពេលវេលានៅឡើយទេ។
តាមការចុះផ្សាយក្នុងហ្វេសប៊ុកផ្លូវការរបស់អាជ្ញាធរជាតិអប្សរា បានស្នើឲ្យសាធារណជន ពិសេស ភ្ញៀវទេសចរជាតិ-អន្តរជាតិ មគ្គុទ្ទេសក៍ទេសចរ យោគយល់ចំពោះការបិទមិនឱ្យដំណើរការផ្នែកខ្លះនៃស្រះខាងជើងមួយរយៈ និងសូមឲ្យទៅថតរូបនៅស្រះខាងត្បូងជំនួសវិញ ដើម្បីទុកលទ្ធភាពឲ្យអ្នកជំនាញបំពេញការងារជួសជុលអភិរក្សបេតិកភណ្ឌបុរាណខ្មែរមួយនេះ ប្រកបដោយភាពស្រួល និង គុណភាព។
សូមរំលឹកថា ស្រះទឹកខាងជើង នៃប្រាសាទអង្គរវត្ត ត្រូវបានរៀបចំធ្វើកំណាយ មុននឹងជួសជុលតាំងថ្ងៃទី២៣ ខែមេសា ឆ្នាំ២០១៨មកម្ល៉េះ។ ហើយស្រះខាងជើងប្រាសាទអង្គរវត្ត គឺជាទីតាំងផ្តិតរូបភាពដ៏ទាក់ទាញរបស់ភ្ញៀវទេសចរជាតិ-អន្ដរជាតិ ដែលចូលចិត្តថតរូបភាពឆ្លុះកំពូលប្រាង្គទាំង៣របស់ប្រាសាទនៅក្នុងស្រះទឹកនេះ។ ដោយសារពេលវេលានៃអាយុកាល ធ្វើឱ្យស្រះនេះរាក់ និងមានកំណកដីកាន់តែរាក់ទៅៗ ទើបធ្វើឲ្យពិបាកក្នុងការបញ្ចូលទឹកនារដូវប្រាំង។ មូលហេតុនេះហើយ ទើបនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការនៃអាជ្ញាធរជាតិអប្សរា រៀបចំគម្រោងស្ដារស្រះនេះកាលពីដើមឆ្នាំ២០១៨។ បច្ចុប្បន្នអ្នកជំនាញការកំពុងដំណើរការ ការជួសជុលស្រះនេះតាមលំនាំដើមនៃរចនាសម្ព័ន្ធរបស់ស្រះ៕
អត្ថបទ និង រូបភាព : លោក ម៉ាត់ អារីហ្វីន
កែសម្រួលអត្ថបទ : លោក សេង ផល្លី
