អ្នកស្រឡាញ់បរិស្ថានប្រមាណជាង៣០០នាក់ ក្នុងនោះមកពីខេត្តសៀមរាបចំនួន ១០០នាក់ផងនោះ បាន ចូលរួមដាំកូនឈើ ចំនួន៥០០ដើម នៅតំបន់ព្រៃស្អាក ស្ថិតនៅភូមិអូរផ្អាវ ឃុំ-ស្រុកត្រពាំងប្រាសាទ ខេត្តឧត្តរមានជ័យ ដើម្បីងលើកកម្ពស់ការអប់រំផ្នែកបរិស្ថាន ដែលជាប្រយោជន៍សម្រាប់សហគមន៍និងមនុស្សសត្វទូទៅ។
មានថេរដីកា នៅថ្ងៃទី១៤ ខែកក្កដានោះ ព្រះគ្រូបញ្ញាវិសុទ្ធិកោសល ឥន្ទប្បញ្ញោ ព្រេង សារិទ្ធ គង់នៅវត្តព្រះឥន្ទកោសីយ៍ ក្នុងក្រុងសៀមរាប ខេត្តសៀមរាប បានបង្ហាញថា នេះជាលើកទី២ ហើយដែលព្រះអង្គរៀបចំឱ្យមានការចូលរួមដាំកូនឈើនៅតំបន់ព្រៃស្អាក ក្រៅពីដាំកូនឈើ កម្មវិធីនេះក៏មានការប្រគេនទានចំណាំព្រះវស្សាដល់វត្តអូរផ្អាវផងដែរ។
គួរបញ្ជាក់ថា នារយៈពេលចុងក្រោយនេះ សកម្មភាពដាំកូនឈើនៅតំបន់រមណីយដ្ឋានអង្គរក៏ដូចជាការបំផុសចលនាដាំកូនឈើក្នុងខេត្តសៀមរាប មានសកម្មភាពផុសផុលគួរឱ្យកត់សម្គាល់។ សិស្សានុសិស្ស រួមនិងសាធារណជនជិតឆ្ងាយ បានបង្ហាញវត្តមានចូលរួមក្នុងកម្មវិធីដាំកូនឈើ ដោយពួកគេបង្ហាញពីស្មារតីចង់ចូលរួមការពារបរិស្ថាន និងថែរក្សាព្រៃឈើឱ្យគង់វង្សទៅអ្នកជំនាន់ក្រោយ។ បើយោងតាមរបាយការណ៍ពីអាជ្ញាធរជាតិអប្សរា នារយៈពេលដើមឆ្នាំ២០១៩នេះ ដើមឈើជាង៤ម៉ឺនដើមត្រូវបានចែកជូនប្រជាពលរដ្ឋដើម្បីយកទៅដាំទាំងក្នុងខេត្តសៀមរាបនិងក្រៅខេត្ត។ ហើយកូនឈើដែលបានយកមកដាំនៅខេត្តឧត្តរមានជ័យនេះ គឺទទួលបានការពីនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា។
អត្ថបទ និង រូបភាព : លោក ម៉ាត់ អារីហ្វីន
កែសម្រួលអត្ថបទ : លោក សេង ផល្លី
