ពុទ្ធិកសាកលវិទ្យាល័យព្រះសីហនុរាជ និងក្រុមហ៊ុនផ្កាឈូក សហការជាមួយ សាលាគណខេត្តសៀមរាប រដ្ឋបាលខេត្តសៀមរាប មន្ទីរធម្មការនិងសាសនាខេត្តសៀមរាប ពុទ្ធិកវិទ្យាល័យរាជបូណ៌ ព្រមទាំងសមាគមជីវិតនិងក្តីសង្ឃឹម បានរៀបចំកម្មវិធី «ឈ្វេងយល់ពីបុណ្យអាសាឡ្ហបូជា» ដើម្បីបញ្ជ្រាបការយល់ដឹងដល់ពុទ្ធសាសនិក លើវិស័យព្រះពុទ្ធសាសនា។
កម្មវិធីនេះប្រារព្ធឡើងនៅឧបដ្ឋានសាលាវត្តរាជបូណ៌ក្រុងសៀមរាប ខេត្តសៀមរាប កាលពីរសៀលថ្ងៃទី១១ខែកក្កដាឆ្នាំ២០១៩ ក្រោមព្រះអធិបតីភាព ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ និងជាឧត្តមទីប្រឹក្សាគណៈសង្ឃនាយក ជាសមាជិកថេរៈសភាសង្ឃ និងជាព្រះចៅអធិការវត្តរាជបូណ៌ និងព្រះវត្តមាន ព្រះសុមង្គលសិលាចារ្យ អាភាករោ ជុំ គឹមឡេង ព្រះមេគណខេត្ត ព្រមទាំងព្រះថេរានុត្ថេរៈជាច្រើនអង្គ និងវត្តមានដ៍ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តនិងលោកជំទាវ ថ្នាក់ដឹកនាំមន្ទីរអង្គភាពស្ថាប័ននានាក្នុងខេត្ត សិស្សានុសិស្ស និងប្រជាពុទ្ឋបរិស័ទសរុបប្រមាណជាង៧០០អង្គ នាក់។ ដោយមាន ការយាងនិមន្ត ពីសំណាក់ព្រះសង្ឃ ព្រមទាំងអ្នកជំនាញពុទ្ធចក្រ និងអាណាចក្រ ល្បីៗធ្វើជាវាគ្មិនផងដែរ។
ឧបាសក អៀង សុធារ៉ា នាយកក្រុមហ៊ុនផ្កាឈូក និង ក្រុមហ៊ុន សៀង គ្រុប បានមានប្រសាសន៍ថា កម្មវិធី ឈ្វេងយល់ពី បុណ្យអាសាឡ្ហនេះ ជាកម្មវិធី ដែលបានទទួលការអនុញ្ញាតជាពិសេស ពីសម្តេចព្រះសង្ឃនាយក តាមព្រះរាជចំណារចុះថ្ងៃទី ១២ ខែមិថុនា ឆ្នាំ ២០១៩ តបទៅនឹងលិខិតស្នើសុំការគាំទ្រក្នុងការរៀបចំកម្មវិធីឈ្វេងយល់នេះ ព្រះរាជចំណារនោះ បានឃើញ និង ឯកភាព អនុញ្ញាតឱ្យរៀបចំចាត់ចែងឲ្យបានសមរម្យ ដើម្បីជាគុណប្រយោជន៍ដល់ព្រះពុទ្ធសាសនា និង សង្គមជាតិយើងផង។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍គាំទ្រនិងចាត់ទុកសកម្មភាពទាំងនេះ បង្ហាញអំពីព្រះទ័យ និងទឹកចិត្តដ៏ល្អ និងជាគំរូរបស់ព្រះតេជគុណ ព្រះថេរានុត្ថេរៈ ពុទ្ធបរិស័ទទាំងអស់ ដែលជាអ្នកស្រឡាញ់ព្រះពុទ្ធសាសនា ក្នុងការលើកតម្លៃលើគុណធម៌ និងជនជាទីសក្ការៈធំធេងចំពោះជាតិ និងសាសនា ក្នុងបំណងពង្រឹង និងលើកកម្ពស់សាសនាព្រះពុទ្ធឱ្យបានរីកចំរើនខ្លាំងក្លា តាមពុទ្ធប្បញ្ញត្តិ និងព្រះពុទ្ធោវាទសំដៅធ្វើការអភិរក្ស និងអភិវឌ្ឍន៍នូវសាសនាជារបស់រដ្ឋយើងនេះសម្រាប់ជាគ្រឿងអប់រំចរិយាធម៌ និងការធានានូវសាមគ្គីភាពប្រជាជាតិ ដោយហេតុថាមូលធន នៃព្រះពុទ្ធសាសនាគឺជាកម្លាំងដ៏ចំបាច់របស់ប្រទេស ស្របតាមឆន្ទៈដ៏មោះមុតរបស់រាជរដ្ឋាភិបាល ដែលតែងតែខិតខំប្រឹងប្រែងគ្រប់បែបយ៉ាង ដើម្បីអភិវឌ្ឍន៍សង្គមជាតិមួយប្រកបដោយសុខសន្តិភាព សុខដុមរមនា និងការអភិវឌ្ឍប្រកបដោយចីរភាព។
ឯកឧត្តមអភិបាលខេត្ត បានមានប្រសាសន៍បន្ថែមថា៖កម្ពុជា ក្រោមកិច្ចដឹកនាំប្រកបដោយគតិបណ្ឌិត របស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ហេដ្ឋារចនាសម្ព័ន្ធរូបវ័ន្តទាំងផ្នែកអាណាចក្រ និងពុទ្ធចក្រ ដូចជាផ្លូវថ្នល់ ស្ពាន ទំនប់ទឹក ប្រឡាយ សាលារៀន មន្ទីរពេទ្យ ស្រះទឹក អណ្តូងទឹក ព្រះវិហារ ឧបដា្ឋនសាលា សេនាសនៈ និងពិធីសាសនានា ត្រូវបានអភិវឌ្ឍន៍ឡើងវិញយ៉ាងឆាប់រហ័ស នឹកស្មានពុំដល់ ពិសេសព្រះពុទ្ធសាសនា ត្រូវបានកំណត់ក្នុងរដ្ឋធម្មនុញ្ញថាជា «សាសនារបស់រដ្ឋ»។ លើសពីនេះ វិស័យពុទ្ធិកសិក្សាក៏មានការរីកចម្រើនជាបន្តបន្ទាប់ ដោយសព្វថ្ងៃយើងមានសាលាធម្មវិន័យ ចាប់តាំងពីថ្នាក់ត្រី ថ្នាក់ទោ ថ្នាក់ឯក និងសាលាពុទ្ធិកសិក្សាបឋមសិក្សា ពុទ្ធិកវិទ្យាល័យ រហូតដល់ពុទ្ធិកសាកលវិទ្យាល័យថែមទៀតផង។ ប្រការទាំងនេះ បញ្ជាក់ច្បាស់ពីការយកចិត្តទុកដាក់របស់រាជរដ្ឋាភិបាលកម្ពុជាក្នុងការគាំទ្រ គាំពារ និងឧបត្ថម្ភគ្រប់បែបយ៉ាងដល់ពុទ្ធសាសនិក និងព្រះតេជគុណ ព្រថេរានុត្ថេរៈគ្រប់ព្រះអង្គ។
ឯកឧត្តម ទៀ សីហា បានស្នើ និងសំណូមពរ ដល់ក្រុមហ៊ុនផ្កាឈូក បន្តសហការជាមួយ សាលាគណខេត្តសៀមរាបសូមបន្តឱ្យមានកម្មវិធីឆ្វេងយល់ពីបុណ្យអាសាឡ្ហបូជានៅឆ្នាំក្រោយៗទៀត ដើម្បីជាលំអានសម្រាប់កូនចៅជំនាន់នេះនិងជំនាន់ក្រោយរបស់យើង បានយល់ជ្រួតជ្រាបកាន់តែច្បាស់អំពីគុណតម្លៃនៃព្រះពុទ្ឋសាសនា ដែលជាសានារបស់រដ្ឋ។ ជាមួយគ្នានោះ ឯកឧត្តម ទៀសីហា បានមានប្រសាសន៍ថា៖ អាជ្ញាធរខេត្តនឹងដាក់ផ្ទាំងប៉ាណូរូបភាពសំខាន់ៗរបស់ព្រះពុទ្ឋបរមគ្រូនៅតាមដងផ្លូវសាធារណៈសំខាន់ៗក្នុងក្រុងសៀមរាប និងបានសំណូមពរដល់គណៈសង្ឃ សាលាគណខេត្ត និងអាជ្ញាធរគ្រប់ថ្នាក់ និងសមត្ថកិច្ចតាមមូលដ្ឋាន ត្រូវសហការគ្នាទប់ស្កាត់ចំពោះជនខិលខូចដែលបន្លំខ្លួនជាព្រះសង្ឃដើរបិណ្ឌបាត្រ បង្កឱ្យប្រជាពុទ្ឋបរិស័ទបាត់បង់ជំនឿលើព្រះពុទ្ឋសាសនា នាំឱ្យខូចតម្លៃព្រះពុទ្ឋសាសនាដែលជាសាសនារបស់រដ្ឋ និងប៉ះពាល់ព្រះកិត្តិយសដល់ព្រះភិក្ខុសង្ឃដែលគោរពប្រតិបត្តិបានត្រឹមត្រូវតាមធម៌វិន័យដែលព្រះសម្មាសម្ពុទ្ឋបានបញ្ញតិមក។
អត្ថបទ និង រូបភាព : លោក យូ វង្ស
កែសម្រួលអត្ថបទ : លោក សេង ផល្លី
