លោកវសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងថា នៅវេលាម៉ោង១៤និង១០នាទី ថ្ងៃទី១៥ ខែកក្កដា ឆ្នាំ២០១៩ រថយន្តទេសចរមួយគ្រឿង ពណ៌លឿង ម៉ាកHYUNDAI COUNTY ពាក់ស្លាកលេខ ភ្នំពេញ 3E: 6998 ឆ្នាំផលិត 2004 អ្នកបើកបរឈ្មោះ កែវ មករា អាយុ២៨ឆ្នាំ រស់នៅខេត្តកណ្តាល ដឹកអ្នកដំណើរសរុបចំនួន ២៨ នាក់ ពីរាជធានីភ្នំពេញមកលេងភ្នំគូលែន លុះចុះមកវិញជាន់ហ្វ្រាំងមិនស៊ី ក្រឡាប់ធ្លាក់ជម្រាលភ្នំបណ្តាលឲ្យមនុស្សរងរបួសសរុបចំនួន១២នាក់ ក្នុងនោះមានស្ត្រីចំនួន០៩នាក់ រួមមាន របួសធ្ងន់ចំនួន០២នាក់ និងរងរបួសស្រាលចំនួន១០នាក់ នៅត្រង់ចំណុច ផ្លូវចុះពីលើភ្នំគូលេនថ្មីខាងកើត ស្ថិតនៅភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប ។
អ្នករងរបួសទាំង១២នាក់នោះ រួមមាន ៖
១. ឈ្មោះ កែម សីហា ភេទប្រុស អាយុ៣០ឆ្នាំ របួសស្រាល ( រយៈជើងខាងក្រោយ ) ,
២. ឈ្មោះ សុត សំអុន ភេទស្រី អាយុ៤៣ឆ្នាំ របួសត្រង់ស្មាខាងឆ្វេង ,
៣. ឈ្មោះ ផាត សោភា ភេទស្រី អាយុ៤៨ឆ្នាំ របួសហត់ខ្លាំងខុសពីធម្មតា ,
៤. ឈ្មោះ ងួន សារ៉ាន់ ភេទស្រី អាយុ៥៧ឆ្នាំ របួសស្រាល ,
៥. ឈ្មោះ ងួន សុគុណ ភេទស្រី អាយុ៥៧ឆ្នាំ របួសស្រាល ( រឹងថ្គាម ) ,
៦. ឈ្មោះ ពេជ្រ ច័ន្ទបូរមី ភេទស្រី អាយុ១១ឆ្នាំ របួសបាក់ដងកាំបិតខាងឆ្វេង ,
៧. ឈ្មោះ សុខ សុវណ្ណរ៉ា ភេទប្រុស អាយុ៣៨ឆ្នាំ របួសស្រាល ,
៨. ឈ្មោះ ហួន សុគន្ធារី ភេទស្រី អាយុ៤៣ឆ្នាំ របួសហើមជង្គង់ទាំង២ និងបាក់កដៃខាងឆ្វេង ,
៩. ឈ្មោះ ប៉េន សុហាន ភេទប្រុស អាយុ៤១ឆ្នាំ របួសបាក់ដៃខាងស្ដាំ ,
១០. ឈ្មោះ លឿង គឹមសៀង ភេទស្រី អាយុ៣៨ឆ្នាំ របួសស្រាល ( ត្រង់ក្បាល) ,
១១. ឈ្មោះ គីម ចំរើន ភេទស្រី អាយុ៤៦ឆ្នាំ របួសត្រង់ក្បាលនិងច្រមុះ អាចនិយាយបាន និង
១២. ឈ្មោះ ប៉ុក សុគុណ ភេទស្រី អាយុ៤៧ឆ្នាំ របួសក្បាលពកចំហៀងឆ្វេង ។
លោកវសេនីយ៍ឯក ស៊ុន អេង បានឲ្យដឹងទៀតថា ក្នុងហេតុការណ៍នោះបង្កឡើងដោយខ្លួនឯង ហើយអ្នករងរបួសទាំងអស់បានដឹកទៅពិនិត្យនៅមន្ទីរពេទ្យបង្អែកស្រុកសូទ្រនិគម ចំពោះរថយន្តវិញ ត្រូវបានកម្លាំងសមត្ថកិច្ច យកមករក្សាទុកនៅអធិការដ្ឋាននគរបាលស្រុក ដើម្បីដោះស្រាយតាមនីតិវិធី ៕
អត្ថបត និង រូបថត ៖ លោក ជា ស្រស់ និង លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
