កាលពីថ្ងៃទី១៥ ខែកក្កដា ឆ្នាំ២០១៩នេះ ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ និងលោកជំទាវ ព្រមទាំងក្រុមគ្រួសារ រួមនឹងបុគ្គលិកសណ្ឋាគារបុរីអង្គរខេត្តសៀមរាប បាននាំយកទៀនចំណាំវស្សាទៅប្រគេនព្រះសង្ឃគង់នៅវត្តរាជបូព៌ ស្ថិតក្នុងសង្កាត់សាលាកំរើក ក្រុងសៀមរាប រួមមាន ៖ទៀនវស្សា ០១គូ ,អង្ករចំនួន ២០០គីឡូក្រាម , ប្រេងឆា , អំបិល , មី , ទឹកសុទ្ធ ,ទឹកត្រី ,ទឹកស៊ីអ៊ីវ , ស្ករស និងប្រេងម៉ាស៊ូត ៣០លីត្រ , ថវិកា ២លានរៀល និង ស្លាដកចំនួន៦០ សម្រាប់ប្រគេនព្រះសង្ឃ ចំនួន៦០អង្គ ។
ឯកឧត្តមនាយឧត្តមសេនីយ៍ ឃឹម ប៊ុនសុង មានប្រសាសន៍ថា ការនាំយកទៀនចំណាំវស្សា និងទេយ្យវត្ថុមួយចំនួន យកទៅប្រគេនដល់ព្រះសង្ឃតាមវត្ត គឺទៅតាមគន្លងប្រពៃណីព្រះពុទ្ធសាសនា ដែលជាសាសនារបស់រដ្ឋ ស្របពេលនេះគឺជារដូវកាលដែលបងប្អូនពុទ្ធបរិស័ទកាន់សាសនាព្រះពុទ្ធ ត្រូវធ្វើវដ្តប្រតិបត្តិ ក្នុងកំឡុងដែលព្រះសង្ឃចូលព្រះវស្សា ហើយក៏ជាតម្រូវការ ចាំបាច់របស់ព្រះភិក្ខុសង្ឃគ្រប់អង្គ ត្រូវការនូវទេយ្យវត្ថុនិង ចតុបច្ច័យសម្រាប់ស្វាធ្យាយសិក្សារៀនសូត្រព្រះធម៌គម្ពីរក្បួនខ្នាតផ្សេងៗក្នុងរដូវចូលវស្សារយៈពេល៣ខែ ។
ក្នុងឱកាសនោះដែរ ឯកឧត្តម ឃឹម ប៊ុនសុង បានអុជធូបទៀន និងថ្វាយផ្កាភ្ញីដល់ព្រះពុទ្ឋរូប និងបានឧទ្ទិសបុណ្យកុសលរំលឹកនឹកគុណទៅដល់មាតាបិតា ញាតិកាទាំងឡាយដែលបានចែកឋានទៅ ជាពិសេស រំលឹកនឹកគុណ ដល់អតីតវីរយុទ្ឋជន យុទ្ឋនារី និងប្រជាពលរដ្ឋកម្ពុជា ដែលបានពលីជីវិតក្នុងបុព្វហេតុជាតិមាតុភូមិកម្ពុជា សូមឲ្យដួងវិញ្ញាណក្ខ័ន្ធលោកអ្នកទាំងអស់នោះ ទៅកាន់សុខគតិភពជារៀងដរាបទៅ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
