នាព្រឹកថ្ងៃទី១៦ ខែកក្កដា ឆ្នាំ ២០១៩នេះ ឯកឧត្តមស៊ិន រុន អនុប្រធានក្រុមការងារថ្នាក់ជាតិ និង ជាប្រធានក្រុមការងារថ្នាក់ខេត្តចុះជួយមូលដ្ឋានស្រុកស្រីស្នំ រួមជាមួយឯកឧត្តម លោក លោកស្រី ជាអនុប្រធាន និង ជាសមាជិកសមាជិកាក្រុមការងារថ្នាក់ជាតិ ថ្នាក់ខេត្ត ថ្នាក់ស្រុក បាននាំយកទៀនព្រះវស្សា គ្រឿងឧបភោគបរិភោគ និង ថវិកាមួយចំនួន ទៅប្រគេនព្រះសង្ឃគង់ក្នុងវត្តទាំង៩ របស់ស្រុកស្រីស្នំ ។
មានប្រសាសន៍ក្នុងឱកាសនោះ ឯកឧត្តម ស៊ិន រុន បានឲ្យដឹងថា ជារៀងរាល់ឆ្នាំក្រុមការងារយើង តែងតែបានរៀបចំពិធីព្រះពុទ្ធសាសនាជាច្រើនតាមប្រតិទិន ក្នុងនោះ ក៏មានពិធីប្រគេនទៀនវស្សានេះផងដែរ ហើយក្នុងនាមពុទ្ធសាសនិកជនដែលកាន់ព្រះពុទ្ធសាសនា តែងតែបានគិតគូរជាប់ជាប្រចាំ ដើម្បីគោរពប្រតិបត្តិតាមគន្លងប្រពៃណីព្រះពុទ្ធសាសនា ដែលជាសាសនារបស់រដ្ឋ ដូច្នេះតាមរយៈនេះ សូមឲ្យប្រជាពុទ្ធបរិស័ទទាំងអស់ រួមសាមគ្គីគ្នាថែរក្សា ការ ពារ និងលើកតម្កើងវិស័យព្រះពុទ្ធសាសនា ឲ្យកាន់តែរីកចម្រើន និងគោរពបដិបត្តិឲ្យខ្ជាប់ខ្ជួនសម្រាប់ជាកេរដំណែលដល់កូនចៅជំនាន់ក្រោយតរៀងទៅ ។
ក្នុងឱកាសនោះដែរ ឯកឧត្តម ស៊ិន រុន បានអុជធូបទៀន និងថ្វាយផ្កាភ្ញីដល់ព្រះពុទ្ឋរូប និងបានឧទ្ទិសបុណ្យកុសលរំលឹកនឹកគុណទៅ ដល់មាតាបិតា ញាតិកាទាំងឡាយដែលបានចែកឋានទៅ ជាពិសេស រំលឹកនឹកគុណ ដល់អតីតវីរយុទ្ឋជន យុទ្ឋនារី និងប្រជាពលរដ្ឋកម្ពុជា ដែលបានពលីជីវិតក្នុងបុព្វហេតុជាតិមាតុភូមិកម្ពុជា សូមឲ្យដួងវិញ្ញាណក្ខ័ន្ធលោកអ្នកទាំងអស់នោះ ទៅកាន់សុខគតិភពជារៀងដរាបទៅ ៕
អត្ថបទ ៖ លោក លីវ សុខុន
រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
